00:00:00 IGIHE NETWORK KN KINYARWANDA EN ENGLISH FR FRANCAIS

Taekwondo: Dr Hakizimana yijeje kuzasimbuka urukiramende bahanikiwe na komite basimbuye

Yanditswe na IGIHE
Kuya 21 January 2022 saa 01:55
Yasuwe :

Dr Hakizimana David yijeje ko we na bagenzi be bagize Komite nyobozi nshya y’Ishyirahamwe Nyarwanda ry’umukino wa Taekwondo (RTF), bazasimbuka urukiramende bahanikiwe na Komite basimbuye yari iyobowe na Bagabo Placide.

Ibi yabitangaje mu muhango w’ihererekanyabubasha wabaye ku wa Gatatu, tariki ya 19 Mutarama 2022, ubwo we n’abo batorewe hamwe bashyikirizwaga ububasha n’abo basimbuye bari bamaze imyaka ine bayoboye Ishyirahamwe rya Taekwondo mu Rwanda.

Ubwo Dr Hakizimana yagezaga ijambo rye rya mbere ku banyamuryango b’iri Shyirahamwe by’umwihariko abari bitabiriye uwo muhango, yashimye umurava wa Komite nyobozi basimbuye, anakeza umusaruro wayo mu gihe cy’imyaka ine ishize.

Ati “Iyi komite yarakoze cyane muri iyi myaka ine ishize, urebye amarushanwa menshi yaba ayo mu Rwanda n’andi mpuzamahanga, kuzamura abakinnyi mu ntera, kongerera ubushobozi abatoza n’abasifuzi, imishinga itandukanye n’abafatanyabikorwa ndetse n’ibindi byinshi, ni urukiramende mwaduhanikiye, ariko ndabizeza ko tuzarusimbuka ndetse tukarenzaho."

Yakomeje asaba abagize Komite icyuye igihe kuzakomeza kuba hafi batanga umusanzu wabo mu kubaka Taekwondo.

Uyu muyobozi kandi yakomeje avuga ko bimwe mu bikorwa by’ingenzi biri mu migabo n’imigambi ye na Komite ayoboye ari kongera amarushanwa y’imbere mu gihugu no kongera umubare w’amarushanwa mpuzamahanga u Rwanda rwitabira.

Harimo kandi kongerera ubushobozi abakinnyi, abatoza, abasifuzi, abayobozi ndetse n’abakozi mu Ishyirahamwe rya Taekwondo mu Rwanda, gukora iyo bwabaga Taekwondo igashinga imizi mu bigo by’amashuri, kunoza umubano wa RTF n’abafatanyabikorwa ndetse no kubongera.

Mu ijambo rye, Bagabo Placide wahoze ayoboya iri Shyirahamwe, yavuze ko hari byinshi byo kwishimira n’ubwo nta byera ngo de kuko icyorezo cya COVID-19 cyabaye inzitizi ikomeye yatumye batesa imihigo ku rwego bifuzaga.

Ati “Ni byo iyi myaka ine ishize ya manda hari byinshi byakozwe cyangwa byagezweho kandi byo kwishimira ariko sinabura kuvuga ko hari n’ibitarakozwe. Ni manda twazitiwemo n’icyorezo Covid-19. Navuga rero ko umwanya utubanye muto kuko twari dufite imishinga itari iy’imyaka ine gusa ahubwo y’igihe kirambye, ariko nta mpungenge, komite nshya irakomerezaho kandi natwe turahari ngo dukomeze dufatanye kubaka Taekwondo no kuyiteza imbere.”

Yakomeje yizeza kuzakomeza kuba hafi ya nyobozi y’iri Shyirahamwe cyane ko akiri umukozi wayo ushinzwe gukurikirana imishinga (Project Manager) n’ubwo aherutse no gutorerwa umwanya mu nama y’ubuyobozi bw’ihuriro rya Taekwondo muri Afurika (African Taekwondo Union).

Komite nyobozi y’Ishyirahamwe Nyarwanda ry’umukino wa Taekwondo igizwe na Perezida Dr. David Hakizimana, Visi Perezida Mugorewase Elyse Fabrice, Umunyamabanga Mukuru Mbonigaba Boniface n’Umubitsi Nkwiro Patrick.

Izindi nzego zatowe ni abajyanama Ruterana Gilbert na Uwanyirigira Marceline, abagenzuzi ni Niringiyimana Jean Claude, Hakizimana Robert na Nyandwi Théoneste mu gihe abagize akanama nkemurampaka ari: Bagire Alain Irene, Habimana Eric na Bimenyimana Pierre Célestin.

Si ubwa mbere Dr David Hakizimana atorerwa kuyobora Ishyirahamwe rya Teakwondo mu Rwanda kuko ari we waribereye umuyobozi wa mbere ubwo ryashingwaga mu 2010 kugeza ubwo Bagabo Placide yatorerwaga uwo mwanya mu 2018.

Ku wa Gatatu ni bwo habaye umuhango w'ihererekanyabubasha mu Ishyirahamwe ry'umukino wa Taekwondo mu Rwanda
Dr Hakizimana David (iburyo) ni we muyobozi mushya wa RTF aho yasimbuye Bagabo Placide (ibumoso)
Komite Nyobozi nshya ya RTF yiyemeje gukomereza aho icyuye igihe yari igeze

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .