Sebastian Vettel agiye gutandukana na Ferrari

Yanditswe na Eric Tony Ukurikiyimfura
Kuya 12 Gicurasi 2020 saa 07:05
Yasuwe :
0 0

Nyuma y’imyaka itanu akinira Ferrari mu shampiyona yo gusiganwa mu tumodoka duto tunyaruka cyane “Formula 1”, kabuhariwe Sebastian Vettel agiye gutandukana nayo nyuma y’uko ibiganiro byo kongera amasezerano ntacyo bitanze.

Umudage Sebastian Vettel w’imyaka 32, afatwa nk’umwe mu bapilote bakomeye babayeho muri Formula 1 nyuma y’uko yegukanye Shampiyona y’Isi y’uyu mukino inshuro enye.

Mu gitondo cyo kuri uyu wa Kabiri, Umuyobozi wa Ferrari, Mattia Binotti yavuze ko icyemezo cyafashwe ku bwumvikane bw’impande zombi ariko “byari bigoye kukigeraho bitewe n’agaciro ka Sebastian nk’umupilote ndetse n’uwo ari we mu buzima busanzwe.”

Yakomeje agira ari “Igihe cyageze ko dutandukana kugira ngo dushobore kugera ku ntego twifuza.”

Vettel yavuze ko “nta bushake bwari bugihari” bwo kuba impande zombi zakomeza gukorana.

Uyu mugabo ukomoka mu Budage yakomeje ati “Kugira ngo ubone umusaruro mwiza muri uyu mukino, bishingira ku mpande zose zikorana mu bwumvikane busesuye.”

“Ibibazo by’amafaranga ntacyo byangije mu gufata iki cyemezo. Ntabwo ari byo ndebaho iyo ngiye gufata icyemezo runaka, kandi ntabwo bizigera biba. Ibyabaga mu mezi ashize, byatumye twese dutangira gutekereza ibiri ngombwa mu buzima.”

Charles Leclerc wakinanaga na Vettel muri Ferrrari nyuma yo gusinya imyaka itanu mu 2019, yashimiye uyu mugabo uburyo bakoranye, avuga ko nta wundi yigiyeho nk’ibyo yungutse bari kumwe.

Bivugwa ko Sebastian Vettel ashobora gusimburwa n’Umunya-Espagne Carlos Sainz kuri ubu ukinira McLaren, aho we yasimburwa na Daniel Ricciardo wa Renault.

Vettel ashobora kandi yafatwa na McLaren mu gihe yaba yumva akeneye kujya mu ikipe ikiyubaka, bitari ibyo ashobora kuba ari gusezera muri Formula 1.

Lewis Hamilton na we avugwa muri Ferrrari, ariko uyu mugabo w’Umwongereza uzasoza amasezerano ye ku mpera z’uyu mwaka w’imikino biragoye ko yarekurwa na Mercedes.

Red Bull, aho Vettel yatwariye Shampiyona enye afite, yavuze ko idateganya kuzana undi mupilote ukomeye wiyongera kuri Max Verstappen mu gihe na Vettel atifuza gufatanya n’uyu Muholandi.

Abandi bashobora kuvamo ufatwa na Ferrari ni Ricciardo cyangwa Umutaliyani Antonio Giovinazzi ukinira Alfa Romeo.

Ubwo yerekeza muri Ferrari mu 2015, Sebastian Vettel wari ugiye gusimbura Fernando Alonso, yashakaga gutera ikirenge mu cya Michael Schumacker yafatiragaho urugero, uyu wegukanye shampiyona eshanu muri zirindwi za F1 yatwaye, ubwo yakiniraga Ferrari hagati ya 2000 na 2004.

Bivugwa ko amakosa Vettel yakoze mu myaka itatu iheruka, agatsindwa na Lewis Hamilton ndetse no kuba na we yaratengushywe n’imodoka ya Ferrari, biri mu byatumye impande zombi zitazakomezanya.

Sebastian Vettel na Ferrari bananiwe kumvikana ku byo kumwongerera amasezerano
Vettel ashinjwa amakosa mu masiganwa arimo irya US Grand Prix mu 2018
Mu 2016, Vettel yagaragaje kutishimira imodoka ya Ferrari yatwaraga

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .