Rwanda Tennis Open 2019 yegukanywe n’Umunya-Kenya

Yanditswe na Eric Tony Ukurikiyimfura
Kuya 2 Ukuboza 2019 saa 11:37
Yasuwe :
0 0

Umunya-Kenya, Ismael Changawa, yegukanye irushanwa rya Tennis rya Rwanda Open 2019 ryabaga ku nshuro ya kabiri, atsinze mugenzi we, Kevin Cheriyot amaseti 2-0 (6-1, 6-2) ku mukino wa nyuma wabaye kuri iki Cyumweru kuri Stade Amahoro i Remera.

Iri rushanwa ryatangiye mu cyumweru gishize, ryabaga ku nshuro ya kabiri nyuma y’irya 2017, ryatewe inkunga na Banki ya Kigali PLC.

Umukino wa nyuma mu babigize umwuga, wahuje abanya-Kenya babiri maze Ismael Changawa aryegukana ku nshuro ya kabiri, atsinze Kevin Cheriyot amaseti 2-0 (6-1, 6-2).

Mu bagore, umukino wa nyuma wahuje Abanyarwandakazi babiri maze Ingabire Meghan aryegukana atsinze Tuyisenge Olive amaseti 2-0 (6-1, 6-1).

Mu bakina ari babiri batabigize umwuga, irushanwa ryegukanwe na Habimana Valens afatanyije na Mugenzi.

Umunyamabanga uhoraho muri Minisiteri ya Siporo, Shema Maboko Didier, wasoje iri rushanwa, yasabye ko ryajya riba buri mwaka kuko ritegure abakinnyi b’Abanyarwanda.

Ati" Rwanda Open ni irushanwa rifasha Abanyarwanda kumenya urwego bahagazeho mu karere, bityo turasaba ko ryaba irushanwa rikinwa buri mwaka kugira ngo rikomeze gutegura abakinnyi bacu."

Ku ruhande rwa Banki ya Kigali yari umuterankunga waryo, Nshuti Thierry uyobora ishami ryo kwamamaza ibikorwa by’iyi banki, yavuze ko bazakomeza gutera inkunga iri rushanwa kuko rifasha Abanyarwanda gutera imbere.

Ati" BK twiyemeje gufasha imikino gutera imbere, Tennis twasanze ari umukino urimo impano, kandi nk’uko twabyiyemeje tugomba gufasha Abanyarwanda gutera imbere."

Muri iri rushanwa hakinnye ibyiciro bitatu by’ingenzi ari byo, ababigize umwuga, abatarabigize umwuga n’abafite ubumuga.

Ismael Changawa yegukanye Rwanda Open atsinze mugenzi we wo muri Kenya
Iri rushanwa rya Tennis ryabaga ku nshuro ya kabiri, ryatewe inkunga na Banki ya Kigali PLC
Nshuti Thierry uyobora ishami rishinzwe iyamamazabikorwa muri BK, afata ifoto n'abanya-Kenya bakinnye umukino wa nyuma mu babigize umwuga
Umunyarwandakazi Ingabire Meghan yatwaye irushanwa mu bagore
Rwanda Tennis Open yabaga ku nshuro ya kabiri

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .