00:00:00 IGIHE NETWORK KN KINYARWANDA EN ENGLISH FR FRANCAIS

Rugby: Lion de Fer yasoje imikino ibanza ya shampiyona idatsinzwe

Yanditswe na IGIHE
Kuya 15 Mutarama 2023 saa 12:45
Yasuwe :

Ikipe ya Lion de Fer yasoje imikino ibanza ya Shampiyona y’Umukino wa Rugby mu Rwanda idatsinzwe, nyuma y’uko yisengereye Kigali Sharks ikayitsinda amanota 20-3, ku wa Gatandatu tariki ya 14 Mutarama 2023.

Nyuma yo kuva mu biruhuko by’iminsi mikuru isoza umwaka wa 2022 no gutangira uwa 2023, Shampiyona ya Rugby yakomeje hakinwa umunsi wa gatanu ari na wo wa nyuma w’imikino ibanza.

Uyu munsi waranzwe n’imikino itatu irimo ibiri yabereye mu Mujyi wa Kigali n’umwe wakiniwe mu Karere ka Kamonyi.

Mu Mujyi wa Kigali, ku kibuga cya Croix Rouge ku Kacyiru, Thousand Hills yahakiriye Muhanga Thunders, mu gihe Lion de Fer yisobanuraga na Kigali Sharks.

Mu Karere ka Kamonyi, Pumas Kamonyi yari yahakiririye Resilience yo mu Karere ka Rusizi.

Thousand Hills yatsinze Muhanga Thunders amanota 40 kuri 6, binayifasha kwicara ku mwanya wa kabiri ku rutonde rwa Shampiyona.

Lion de Fer yari itaratsindwa umukino n’umwe wa Shampiyona mbere yo gukina umunsi wa gatanu, yakomerejeho kuko nubwo yari yatezwe Kigali Sharks nk’iyayikoma mu nkokora, yashoboye gusimbuka uyu mutego, iyitsinda amanota 20-3 binayifasha gukomeza kuyobora urutonde rwa Shampiyona.

Nubwo Lion de Fer yegukanye uyu mukino ariko ntiwayoroheye kuko mu gice cyawo cya mbere byari byananiranye, Kigali Sharks yari yihagazeho yinjizwa amanota atatu gusa.

Mu Karere ka Kamonyi, Pumas Kamonyi yagiye gukina umukino w’umunsi wa gatanu itarabona intsinzi n’imwe. Ntibyayiguye neza kuko yakomereje muri uyu mujyo, nyuma yo kuhasangwa na Resilience ikayihatsindira amanota 54-5.

Nyuma y’isozwa ry’imikino ibanza ku wa Gatandatu, urutonde rw’agateganyo rwa shampiyona ruyobowe na Lion de Fer, ikurikiwe na Thousand Hills, Kigali Sharks ku mwanya wa gatatu, Muhanga ku wa kane, Resilience ku mwanya wa gatanu, mu gihe Pumas Kamonyi ari iya nyuma n’umwanya wa gatandatu.

Biteganyijwe ko imikino yo kwishyura izasubukurwa mu ntangiriro za Gashyantare. Icyo gihe, Muhanga Thunders izakira Pumas Kamonyi, Kigali Sharks yakire Resilience, mu gihe Lion de Fer izisobanura na Thousand Hills mu mukino w’ishiraniro.

Indi nkuru wasoma: Ibyo wamenya ku mukino wa Rugby wuje amacenga n’ubwenge, VAR, ndetse ugakinwa n’abafite ibigango.

Lion de Fer isoje imikino ibanza ya Shampiyona ya Rugby idatsinzwe
Muri Rugby, iyo bibaye ngombwa hakinishwa amaguru hahanwa ikosa cyangwa gutanga umupira
Resilience y'i Rusizi yitwaye neza mu mpera z'iki cyumweru ikura intsinzi mu Karere ka Kamonyi
Kigali Sharks iri ku mwanya wa gatatu
Thousand Hills ni yo iri ku mwanya wa kabiri ku rutonde rw'agateganyo nyuma y'imikino ibanza
Ikipe ya Muhanga Thunders
Ikipe ya Pumas Kamonyi ntiyahiriwe n'imikino ibanza

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .