Rafael Nadal yakubise agapira umwana w’umukobwa, mu kumusaba imbabazi aramusoma

Yanditswe na Eric Tony Ukurikiyimfura
Kuya 25 Mutarama 2020 saa 11:10
Yasuwe :
0 0

Umukinnyi wa mbere ku Isi muri Tennis mu bagabo, Umunya-Espagne Rafael Nadal, yakubise agapira umwana w’umukobwa wari mu batoraga udupira, mu kumusaba imbabazi aramusoma.

Ibi byabaye ku wa Kane mu mukino ubwo Nadal yakinaga n’Umunya-Argentine Federico Delbonis mu iseti ya gatatu yari ayoboye n’amanota 4-1 muri Australian Open iri kubera i Melbourne.

Ubwo yasubizagayo agapira, Nadal w’imyaka 33, yagakubise umwana w’umukobwa, Anita w’imyaka 13, ku mutwe.

Abari baje kureba uyu mukino bose bahise bikanga, Rafael Nadal asa n’ugize ubwoba.

Nadal na Delbonis, bombi bagiye kureba niba uyu mukobwa ntacyo yabaye. Nadal yamukuyemo ingofero, amusoma ku itama ndetse amufata ku mutwe, ahabwa amashyi menshi n’abafana.

Nyuma y’umukino, uyu Munya-Espagne yavuze ko ari kimwe mu bintu bikomeye yaboneye mu kibuga mu gihe amaze akina Tennis.

Ati “Kuri we [umukobwa] byashoboka ko bitari ibihe byiza. Yanteye ubwoba mu by’ukuri.”

Rafael Nadal yakomeje gukina ndetse atsinda umukino kuri 6-3 7-6 (4) 6-1, akomeza mu kindi cyiciro, aho yatsinze undi Munya-Espagne, Pablo Carreno Busta uri ku mwanya wa 27 ku Isi, mu mukino wabaye kuri uyu wa Gatandatu.

Umukino ukirangira, nabwo Nadal yarazamutse ajya kureba uyu mukobwa na none, amuha agatambaro (band) yambara ku mutwe, aho yanavuze ko “ari umukobwa ufite umutima ukomeye.”

Australian Open ni ryo rushanwa rikomeye Rafael Nadal amaze kwegukana inshuro rimwe, yaritwaye mu 2009.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza