00:00:00 IGIHE NETWORK KN KINYARWANDA EN ENGLISH FR FRANCAIS

Police HC yageze ku mukino wa nyuma wa ECAHF 2021, Kiziguro SS izahatanira umwanya wa kabiri

Yanditswe na IGIHE
Kuya 3 Ukuboza 2021 saa 08:58
Yasuwe :

Police HC yageze ku mukino wa nyuma w’Igikombe gihuza amakipe yabaye aya mbere mu Karere ka Afurika y‘Iburasirazuba no Hagati (ECAHF), ni nyuma yo gutsinda Ngome HC yo muri Zanzibar ibitego 29-23 mu mukino wa ½ wabaye kuri uyu wa Gatanu.

Mu ntangiriro z’uyu mukino wahuje Police HC na Ngome byasaga nk’aho iyi kipe yo muri Zanzibar iza gutsinda kuko abakinnyi bayo bakinishaga ingufu ndetse ibitego bikagenda byegerana ku mpande zombi. Gusa, ntiyahiriwe n’iminota 30 y’igice cya mbere yarangiye Police HC ifite ibitego 15-11.

Mu gice cya kabiri, Police HC yagarutse ifite ingufu zidasanzwe itangira kugenda iha intera Ngome HC bihanganye kugeza ubwo hajyagamo ikinyuranyo cy’ibitego birindwi mu gihe iminota 60 y’umukino yarangiye ari ibitego 29-23.

Umutoza wa Police HC, IP Antoine Ntabanganyimana, yavuze ko impamvu bagowe n’intangiriro z’uyu mukino ari uko babanje kwiga imikinire ya Ngome HC.

Yagize ati "Ni byo koko byaragaragaye ku mukino twakinnye na Nyuki none n’uyu munsi byagaragaye. Mu gice cya mbere mbanza gufata umwanya nkiga imikinire y’ikipe duhanganye ariko nkirinda kwinjizwa ibitego ngo banjye imbere. Mu gice cya Kabiri murabibona ko iyo tugarutse tuza dukosora byose kuko tuba twamaze kumenya imikinire y’ikipe turi gukina.”

Iri banga, Umutoza IP Ntabanganyimana arihuriyeho na Kapiteni wa Police HC, CPL Duteteriwacu Norbert kuko inshuro nyinshi abanza hanze y’ikibuga.

CPL Duteteriwacu yavuze ko ubu we n’abakinnyi bagenzi be bafite intego yo gukora ibishoboka byose bakisubiza igikombe cya ECAHF.

Abakinnyi ba Police HC muri rusange bashimiye ubuyobozi bwa Polisi y’u Rwanda, abafana ndetse n’itangazamakuru ryo mu Rwanda uburyo bakomeje kubatera ingabo mu bitugu bikabafasha gukomeza kwitwara neza.

Ku mukino wa nyuma uteganyijwe ku wa Gatandatu, Police HC izahura na Cereals yo muri Kenya, yo yatsinze Black Mamba nayo muri Kenya, mu wundi mukino wa ½.

Muri iri rushanwa, ikipe y’abakobwa bo mu Ishuri ryisumbuye rya Kiziguro riherereye mu Karere ka Gatsibo izakina na Cereals y’abakobwa bo muri Kenya, izatsinda izatware umwanya wa kabiri.

Kiziguro izahatanira uyu mwanya nyuma y’uko yatsinzwe na Nairobi Water yo muri Kenya ibitego 32-18.

Iyi kipe yo muri Kenya yahise yegukana irushanwa mu bagore kuko yatsinze imikino ine yose.

Abakinnyi ba Police HC n'aba Ngome HC yo muri Zanzibar basuhuzanya mbere yo gutangira umukino wa 1/2 cy’Igikombe gihuza amakipe yabaye aya mbere mu Karere ka Afurika y‘Iburasirazuba no Hagati (ECAHF)
Police HC yageze ku mukino wa nyuma itsinze Ngome HC yo muri Zanzibar ibitego 29-23
Police HC izahura na Cereals yo muri Kenya ku mukino wa nyuma

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .