00:00:00 IGIHE NETWORK KN KINYARWANDA EN ENGLISH FR FRANCAIS

Police BHC na Vision JN mu makipe yageze muri ½ cya Beach Handball (Amafoto)

Yanditswe na IGIHE
Kuya 8 Mutarama 2023 saa 08:45
Yasuwe :

Police BHC ifite igikombe giheruka, ni imwe mu makipe yageze muri ½ cy’irushanwa rya Beach Handball riri kubera ku mucanga i Rubavu, aho ihura na ES Kigoma mu mukino uteganyijwe kuri iki Cyumweru, tariki ya 8 Mutarama 2023.

Ku wa Gatandatu tariki 7 Mutarama, ni bwo ku kiyaga cya Kivu i Rubavu hatangiye irushanwa rya Beach Handball rimara iminsi ibiri, ryitabiriwe n’amakipe icyenda arimo atanu y’abagabo n’andi atatu y’abagore.

Mu bagore hakinwe imikino itatu, aho UR HC yatsinzwe na ES Mukingi amanota 2-0, Kiziguro SS itsinda UR amanota 2-0 mbere yo gutsinda na ES Mukingi 2-0.

Gutsinda imikino yayo yombi byatumye Kiziguro SS igera ku mukino wa nyuma ihuriraho na ES Mukingi kuri iki Cyumweru, guhera saa tanu.

Mu bagabo, naho amakipe yose uko ari atanu yahuye hagati yayo, buri imwe ikina imikino ine kugira ngo hamenyekane ane ya mbere akina ½.

Police BHC ni yo yazamutse ari iya mbere n’amanota umunani, ikurikirwa na Vision Jeunesse Nouvelle yagize amanota atandatu iyanganya na Tengo BHC, mu gihe ES Kigoma yabaye iya kane n’amanota atatu. UR yasezerewe nta nota ibonye kuko yatsinzwe imikino yose.

Muri ½ gikinwa kuri iki Cyumweru guhera saa Yine, Vision JN irahura na Tengo naho Police BHC yisobanure na ES Kigoma guhera saa yine n’igice.

Umukino wa nyuma uteganyijwe guhera saa sita.

Irushanwa rya Beach Handball mu Rwanda rikinwa mu mpera za buri mwaka guhera mu 2006, uretse mu 2020 aho ritabaye kubera COVID-19.

Iriri gukinirwa i Rubavu mu mpera z’iki cyumweru, ryagombaga kuba mu mpera za 2022 ariko rihurirana n’izindi gahunda zari zateguwe n’Ishyirahamwe Nyarwanda ry’Umukino wa Handball (Ferwahand).

Ibyo wamenya ku mukino wa Beach Handball

Umukino wa Beach Handball ni Handball ikinirwa ku mucanga. Uba ugizwe n’ibice bibiri, buri gice kikabarwa ukwacyo. Kugira ngo ikipe itsinde umukino isabwa gutsinda ibice bibiri (ikagira amanota abiri).

Buri gice cy’umukino kigomba kubona ugitsinze. Iyo kirangiye amakipe anganya habaho gutanguranwa igitego kimwe, Golden Goal.

Iyo buri kipe itsinze igice kimwe, indi igatsinda ikindi, buri imwe igira inota rimwe. Icyo gihe, haterwa penaliti eshanu kuri buri kipe.

Iyo birangiye amakipe anganyije, bakomeza gutera penaliti imwe imwe kugeza habonetse itsinze.

Mu kibuga, buri kipe iba igizwe n’abakinnyi bane barimo n’umunyezamu, mu gihe iminota ya buri gice cy’umukino itarenga 10.

Iyo umukinnyi atsinze igitego yikaraze [bigamije gushimisha abafana], kibarwamo ibitego bibiri.

Perezida wa FERWAHAND, Twahirwa Alfred (ibumoso) ari kumwe n'Umunyamabanga Nshingwabikorwa w'iri Shyirahamwe, Niyokwizera Joel
Police BHC yitwaye neza ku munsi wa mbere, itsinda imikino yose
Muri Handball yo ku mucanga, iyo umukinnyi atsinze igitego abanje kwikaraga, kibarwamo bibiri
Amakipe atatu y'abagore yakinnye yasize hamenyekanye abiri akina umukino wa nyuma
Amakipe umunani ni yo yahuriye ku nkengero z'Ikiyaga cya Kivu
Handball yo ku mucanga ni umwe mu mikino iba iryoheye ijisho

Amafoto: FERWAHAND


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .