00:00:00 IGIHE NETWORK KN KINYARWANDA EN ENGLISH FR FRANCAIS

Perezida wa FINA ategerejwe mu Rwanda

Yanditswe na Eric Tony Ukurikiyimfura
Kuya 15 Werurwe 2022 saa 10:57
Yasuwe :

Perezida w’Ishyirahamwe Mpuzamahanga ry’umukino wo Koga (FINA), Hussain Al Musallam, ategerejwe mu Rwanda ku wa Gatatu, tariki ya 16 Werurwe, muri gahunda arimo yo gusura ibihugu bitandukanye byo mu Gace ka Gatatu k’Impuzamashyirahamwe yo Koga muri Afurika (CANA- Zone 3).

Hussain Al Musallam uri mu Burundi, azagera mu Rwanda ku wa Gatatu saa Kumi n’igice mu gihe azakirwa na Minisitiri wa Siporo, Munyangaju Aurore Mimosa, mu gikorwa kizabera muri Radisson Blu ku mugoroba wo ku wa 16 Werurwe.

Biteganyijwe ko iki gikorwa kizaba hagati ya saa Mbili z’umugoroba na saa Yine, kizitabirwa n’abandi barimo abayobozi b’amakipe atandukanye y’umukino wo koga mu Rwanda.

Hussain Al Musallam azazana n’abarimo Visi Perezida wa FINA akaba na Perezida wa CANA, Dr Sam Ramsamy, Umuyobozi Nshingwabikorwa wa FINA, Brent Nowicki, Umuyobozi wa CANA-Zone 3, Dr Donald Rukare n’abakinnyi babiri batwaye Shampiyona y’Isi yo koga, Ranomi Kromowidjojo na Ferry Weertman.

Ibiganiro Perezida wa FINA azagirana n’abayobozi batandukanye barimo Minisitiri wa Siporo, Munyangaju Aurore Mimosa na Uwayo Théogène uyobora Komite Olempike y’u Rwanda, bizibanda ku iterambere ry’umukino wo Koga mu Rwanda muri gahunda y’iri Shyirahamwe Mpuzamahanga yibanda ku kwiga umukino wo Koga kugira ngo umuntu agire imibereho myiza.

Ku wa Kane, Al Musallam azasura Urwibutso rwa Jenoside rwa Kigali ruherereye ku Gisozi n’ishuri rya Green Hills Academy mbere y’uko akomereza muri Uganda.

Umunya- Koweït Al Musallam yatorewe kuyobora FINA muri Nyakanga 2021 aho yasimbuye Umunya-Uruguay Julio Maglione.

Perezida wa FINA, Hussain Al Musallam, azagera mu Rwanda ku wa Gatatu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .