Ni uwa karindwi muri Afurika! Hakizumwami w’imyaka 14 afite intego yo kumenyekanisha u Rwanda muri Tennis (Video)

Yanditswe na Eric Tony Ukurikiyimfura
Kuya 1 Mutarama 2021 saa 11:18
Yasuwe :
0 0

Hakizumwami Junior kuri ubu uri ku mwanya wa karindwi muri Afurika mu cyiciro cy’Abatarengeje imyaka 14, afite intego zo kuba umukinnyi ukomeye muri Tennis, akamenyakinisha u Rwanda muri uyu mukino ku rwego mpuzamahanga.

Hakizumwami ni we mukinnyi uyoboye abandi bakiri bato mu Rwanda no mu karere kagizwe n’ibihugu 13 (u Rwanda, u Burundi, Tanzania, Kenya, Uganda, Sudani y’Epfo, Ethiopia, Seychelles, Comoros, Eritrea, Somalia, Djibouti na Centrafrique).

Mu kiganiro yagiranye na IGIHE, uyu muhungu ufite impano yihariye yo gukina Tennis, yavuze ko intego ye ari ugufasha u Rwanda kumenyekana ku rwego mpuzamahanga mu mukino wa Tennis.

Ati “Ngitangira gukina Tennis nashakaga gukina nka mukuru wanjye witwa Yannick ariko ubu ndashaka kugera ku rwego rwa ba Nadal [Rafael]. Intego yanjye ni ugukina cyane nkatwara amarushanwa menshi ashoboka, nkaba umukinnyi mpuzamahanga wabigize umwuga, nkahagararira igihugu cyanjye neza mu marushanwa nkina kandi nkakora ibishoboka nkagihesha ishema.”

Hakizumwami Junior benshi bita Gapuri, gukina Tennis abikomora ku bo mu muryango we barimo mukuru we, Muvunyi Yannick, watangiye kumutoza kuva akiri muto.

Ati “Natangiye gukina Tennis mu 2013 mfite imyaka irindwi, ndakomeza kugeza n’uyu munsi. Ntibyari byoroshye, natangiye nk’abandi ariko mbikunda, mbigiramo ubufasha bwa mukuru wanjye [Yannick] antoza, anyitaho by’umwihariko. Hamwe naratsindaga, ahandi nkatsindwa, ariko nshyiramo umuhate.”

“Mu muryango wacu dukunda gukina Tennis cyane, na papa wacu yarayikinaga, bakuru banjye barakinnye, umwe aracyakina.”

Yakomeje avuga ko yigeze kugira imbogamizi z’ubushobozi bw’ibikoresho ku buryo byari gutuma areka uyu mukino, ariko umuryango we n’undi muterankunga bamugarurira icyizere cyo gukomeza gukina Tennis akunda.

Ati “Byambayeho gucika intege kubera kubura ibikoresho, kubera kubura ubufasha, ariko umukino narawukundaga, ntabwo numvaga nshaka kuwuvamo. Ni uko gusa numvaga bigoranye gukomeza gukina nta bufasha. Ariko nyuma abantu bagiye bamfasha mu bishoboka, bakamfasha kubona ibikoresho n’ibindi bitandukanye, ubu ndawukunze, numva nakomeza nkakina kandi nkatera imbere.”

“Ubushobozi ku ruhande rwanjye ntabwo buhagije ariko mfite amahirwe ko nabonye umuntu untera inkunga mbere y’uko njya muri Centre [mu Kigo cya Tennis] witwa Josh ufite Restaurant ya Heaven, aramfasha akajya amenyera ibikoresho, imyambaro n’ibindi bitandukanye, akanyishyurira ishuri, akangurira raketi. Ababyeyi bifuza ko nkina nkatera imbere, bantera imbaraga kandi bashaka ko ntwara amarushanwa.”

Nyuma yo kwerekeza mu ishuri rya Tennis ryo muri Kenya mu mwaka ushize, kuri ubu biteganyijwe ko Hakizumwami Junior azerekeza muri Maroc mu ntangiriro z’uku kwezi, akahakomereza amasomo ye asanzwe ndetse akiga Tennis by’umwihariko.

Ati “Muri Kenya byarahagaze ntabwo bizashoboka ko nsubirayo, ariko hari indi gahunda yo kujya mu yindi Centre yo muri Maroc muri uku kwa mbere nkakomerezayo Tennis n’amashuri yanjye. Ninitwara neza, nkakina neza kandi nkiga neza, nshobora kuzabona Kaminuza muri Amerika.”

“Nzaba mfite amahirwe yo gukina amarushanwa menshi, kwitoza bihoraho, kwiga bihoraho, mbese bizamfasha muri Tennis yanjye, gutera imbere, kugira ejo hazaza nkahagararira igihugu cyanjye neza.”

Muvunyi Yannick uvukana na Hakizumwami ndetse akaba ari we wamutoje kuva akiri muto. Yavuze ko yishimira urwego murumuna we agezeho kuko kuri ubu azi icyo ashaka.

Ati “Natangiye kumutoza ari muto, nanjye maze nk’imyaka 10 nkina Tennis. Nari mfite ubunararibonye bwo kuba hari iby’ingenzi namwigisha, urwego agezeho ruranshimisha. Natangiye kumutoza mu 2013 afite imyaka irindwi, ntabwo byari byoroshye ku myaka nk’iyo kuko hari igihe umwana aba atabishaka, ariko ukomeza kumuhatiriza, yageze aho arabikunda kugeza n’uyu munsi.”

“Uko mubona yarazamutse cyane, urwego rwe ni rwiza kandi rurashimishije. Iyo umukinnyi amaze kumenya gukina, hari aho agera akaba azi icyo ashaka.”

Uyu mutoza usanzwe afasha abana ku bibuga bya Cercle Sportif de Kigali mu Rugunga, yasabye bagenzi be gukomeza gufasha abana no kubashishikariza gukina Tennis ari benshi.

Hakizumwami Junior ni we watsinze amarushanwa y’abato ya Tennis aheruka gutegurwa mu Rwanda mu mezi atatu ya nyuma ya 2020.

Yegukanye Shampiyona y’Igihugu mu batarengeje imyaka 14 mu Ugushyingo ndetse n’irushanwa ryari ryateguwe na Umulisa Joselyne uyobora “Youth Tennis Development Programme”, ku bufatanye n’Ishyirahamwe rya Tennis mu Rwanda (RTF) na Hagali Ministry mu mpera z’Ukwakira.

Uyu mukinnyi ari mu bana bafashije u Rwanda kubona itike y’Igikombe cya Afurika cyabereye muri Maroc mu 2018.

Hakizumwami Junior w'imyaka 14 kuri ubu ari ku mwanya wa karindwi muri Afurika mu batarengeje iyo myaka
Hakizumwami azerekeza muri Maroc mu cyumweru gitaha mu kigo kigisha Tennis
Mu myaka ibiri ishize, Hakizumwami yari mu bafashije u Rwanda kubona itike y'Igikombe cya Afurika cy'Abatarengeje imyaka 12 cyabereye muri Maroc

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .