Mu mpera z’iki cyumweru ni bwo habaye imikino ya nyuma isoza Shampiyona ya Sitting Volleyball mu bagabo n’abagore, yabereye muri Gymnase ya Komite y’Igihugu y’Imikino y’Abafite ubumuga (NPC Rwanda) i Remera.

Mu bagabo, Ikipe ya Musanze yegukanye Igikombe cya Shampiyona ya Sitting Volleyball ku nshuro ya mbere itsinze iya Gisagara amaseti 3-1 (25-20, 24-26, 25-12, 25-22).

Musanze yari yageze ku mukino wa nyuma itsinze Gasabo amaseti 3-1 (25-16,26-24,17-25,25-20) ku wa Gatandatu mu gihe Gisagara yasezereye Rwamagana iyitsinze amaseti 3-0 (25-15, 25-18, 25-15) muri ½.

Mu bagore, Bugesera Women SVB yisubije Shampiyona ku nshuro ya karindwi itsinze Musanze SVB amaseti 3-1 (23-25, 25-12, 25-14, 26-24).

Muri ½, Bugesera yatsinze Nyarurenge amaseti 3-0 (25-16, 26-24, 25-21) naho Musanze itsinda Rulindo amaseti 3-0 (25-15, 25-19, 25-21).

Umwanya wa gatatu mu bagore wegukanywe n’Ikipe y’Akarere ka Nyarugenge yatsinze iya Rulindo amaseti 2-0 (25-14, 25-13) naho mu bagabo, Intwari za Gasabo yatsinze Rwamagana amaseti 2-0 (25-20, 25-4).

Amakipe ya Ruhango na UR Huye yazamutse mu Cyiciro cya Mbere cy’Abagabo avuye mu cya Kabiri. Mu mukino wayo wa nyuma, UR Huye yatsinze Ruhango amaseti 3-0 (25-6, 25-21, 25-16).

Ni mu gihe Ikipe y’Akarere ka Rubavu na UR Rukara zo zamanutse mu Cyiciro cya Kabiri.

Imikino ya nyuma ya Shampiyona ya Sitting Volleyball yasojwe kuri iki Cyumweru

Musanze yakinnye na Gisagara ku mukino wa nyuma mu bagabo

Ikipe ya Musanze yishimira intsinzi yayihesheje igikombe mu bagabo

Byari ibyishimo kuri Bugesera ubwo yegukana igikombe mu bagore

Intwari za Gasabo yegukanye umwanya wa gatatu mu bagabo

Ikipe ya UR Huye yishimira intsinzi yabonye ku mukino wa nyuma mu Cyiciro cya Kabiri cy'Abagabo

Habyarimana Florent wari uhagarariye Minisiteri ya Siporo, yakurikiye iyi mikino isoza Shampiyona ya Sitting Volleyball

Depite Musolini Eugène yarebye iyi mikino yabereye muri Gymnase ya NPC kuri iki Cyumweru

Umutoza w'Ikipe y'Igihugu ya Sitting Volleyball, Dr. Mosaad Elaiuty (iburyo), na we yakurikiye iyi mikino

Ikipe ya Musanze y'Abagabo yegukanye Shampiyona ku nshuro ya mbere

Byari ibyishimo kuri UR Huye yazamutse yegukanye Igikombe cya Shampiyona y'Icyiciro cya Kabiri

Ikipe ya Bugesera y'Abagore yishimira Igikombe cya Shampiyona yegukanye ku nshuro ya karindwi yikurikiranya