Ibi Niyonkuru Zephanie yabivugiye i Nyanza kuri iki Cyumweru ubwo yasozaga umwiherero wateguwe na Minisiteri ya Siporo ifatanyije n’abafatanyabikorwa bayo.

Iyi gahunda yabaga ku nshuro ya kabiri, izaba ifite umwihariko wayo kuko kuri ubu uretse abakinnyi b’imikino itandukanye, hari hanarimo abana 120 bagaragaje ubumenyi n’umuhate mu gusifura ndetse na 30 bari mu bijyanye no gutanga ubuvuzi bw’ibanze na bo bahawe amahugurwa azabashyira ku rundi rwego.

Ubwo yasozaga uyu mwiherero wanitabiriwe n’abayobozi b’amashyirahamwe atandukanye y’imikino mu Rwanda, Umunyamabanga Uhoraho muri Minisiteri ya Siporo yashimiye aba banyeshuri bahugurwaga, gusa abaha umukoro wo gushyira n’imbaraga mu masomo bazatangira guhera mu kwezi gutaha.

Yagize ati “Turabashishikariza gukomeza gukina muniga kubera ko mutamenya gahunda iri imbere. Ni byiza ko mukina ariko mukanatsinda amasomo kuko bishobora kuzabagirira akamaro mu myaka iri imbere.”

“Minisiteri ya Siporo ku bufatanye n’Ikigo cy’Abafaransa cy’Iterambere (AFD) byafunguye ku mugaragaro uyu mushinga muri Gicurasi 2021 aho kuri gahunda icyiciro cya mbere kizasozwa mu kwezi k’Ukuboza 2024.”

Uretse kuzamura impano z’abana no kubashakira abatoza bagezweho banabihuguriwe, Umushinga w’Isonga wubatse unasana ibibuga 27 biri mu bigo 14 bikorana na wo.

Uretse ibi, Minisports muri gahunda y’Isonga yanateguye igikorwa cyo gushishikariza abana b’abakobwa kwitabira imikino kimaze kuba ubugira kabiri, mu gihe hanashyizweho umunsi wo gushakisha impano “National Talent Day”, wabaye bwa mbere mu mpera za 2023 ukazongera muri Nzeri uyu mwaka.

Abana barenga 700 ni bo basoje umwiherero

Volleyball ni umwe mu mikino yatoranyijwe muri gahunda y'Isonga

Abana bashimiwe umuhate bagaragaje muri ibi byumweru bibiri

Basketball y'ejo hazaza...

Niyonkuru Zephanie yahaye impanuro abana bo mu Isonga

Abagaragaje impano kurusha abandi barahembwe

Stéphane Le Brench, Umujyanama wa mbere muri Ambasade y'u Bufaransa mu Rwanda ni we wari uhagarariye AFD