00:00:00 IGIHE NETWORK KN KINYARWANDA EN ENGLISH FR FRANCAIS

Minisports yahaye umukoro ishyirahamwe ry’umukino wa Golf, naryo riyisaba ubufasha

Yanditswe na Ntabareshya Jean de Dieu
Kuya 25 June 2022 saa 02:40
Yasuwe :

Minisiteri ya Siporo mu Rwanda (Minisports), yasabye abagize ishyirahamwe ry’umukino wa Golf mu Rwanda gushyiramo imbaraga no guharanira kuwuteza imbere ku buryo ugaragaza igihugu ku ruhando mpuzamahanga.

Minisitiri wa Siporo mu Rwanda, Munyangaju Aurore Mimosa, ubwo yari yitabiriye isozwa ry’amarushanwa ya Golf yateguwe mu rwego rwo gusabana n’abitabiriye inama ya CHOGM mu irushanwa riswe Kigali Golf Networking Tournament ryitabiriwe n’abasaga 130.

Minisitiri Munyangaju yagaragaje ko u Rwanda rwishimira intambwe imaze guterwa mu guharanira iterambere ry’uyu mukino.

Yasabye abakinnyi n’abanyamuryango ba Golf muri rusange guharanira guteza imbere uyu mukino ku buryo ushobora kubyazwamo amahirwe y’ishoramari ku Rwanda.

Ati “Hari haciyemo igihe guverinoma y’u Rwanda ishyizeho iki gikorwa, rero ni iby’agaciro ko iri joro ndi aha mbona abaturarwanda n’abashyitsi batangiye kuryoherwa n’umukino wa Golf muri Kigali.”

Yasabye ishyirahamwe ry’umukino wa Golf, ubuyobozi bw’iki kibuga n’abakunzi ba Golf muri rusange kubyaza umusaruro iki kibuga kugira ngo gikomeze gukoreshwa neza kigaragaze u Rwanda nk’icyerekezo gishya cya Golf ku rwego Mpuzamahanga.

Umuyobozi Mukuru w’Ikigo cyubatse ikibuga cya Kigali Golf Course, RUGC , Ngirinshuti Allain yabwiye IGIHE ko urebye hari intambwe imaze guterwa mu guteza imbere umukino wa Golf.

Ati “Mbere y’uko iki kibuga cyubakwa hari abanyamuryango 100 ariko ubu bagera hafi ku banyamuryango 400. Icyerekezo twafashe kugira ngo duteze imbere Golf, twashyizeho ishuri kugira ngo rizajya rifasha abana bakiri bato kugira ngo dutoze abakinnyi b’ejo bakiri mu myaka iri hasi ndetse n’abakuru nabo barigishwa.”

Ngirinshuti yavuze ko hashyizweho gahunda ya Golf Days, aho higishwa abantu umukino wa Golf bahereye ku badafite ubumenyi muri uwo mukino, hakibandwa cyane ku baturiye ikibuga cya Kigali Golf Course ndetse n’abanyeshuri ariko badafite ubushobozi bwo gukina Golf.

Minisitiri Munyangaju akina Golf

Uruhare rwa Minisiteri ruzaba uruhe?

Ubusanzwe Minisiteri ya Siporo ni yo ireberera amashyirahamwe atandukanye y’imikino binyuze mu gushyiraho politiki ihamye igamije guteza imbere iyo mikino no kuyaherekeza mu buryo butandukanye.

Ngirinshuti yabwiye IGIHE ko nk’abafite mu nshingano guteza imbere umukino wa Golf mu Rwanda bagihura n’imbogamizi zikomeye zijyanye ahanini n’amikoro.

Kuri ubu Ishyirahamwe ry’umukino wa Golf mu Rwanda rimaze amezi ritangiye gukora ariko rirasaba ubufasha bwa leta mu guteza imbere umukino wa Golf kugira ngo umenywe n’umubare munini w’abanyarwanda.

Ngirinshuti ati “Izindi Siporo hari amafaranga ahabwa za federasiyo kugira ngo ziteze imbere iyo mikino zishinzwe, dufite amahirwe ko na federasiyo ya Golf mu Rwanda imaze kujyaho. Twifuza ko rero nka guverinoma y’igihugu ibinyujije muri Minisiteri ya Siporo yashyira amafaranga muri iyi federasiyo kugira ngo tubashe kuzana umubare munini w’abo bana badashoboye kwiyishyurira Golf.”

Yagaragaje ko indi mbogamizi bagihura nayo ishingiye ku myumvire yo kumva ko ari umukino ukinwa n’abafite ubutunzi cyangwa atari siporo, bakaba bifuza gukora ubukangurambaga bwisumbuyeho kugira ngo buri wese yumve ko Golf yakinwa na buri wese.

Mu kiganiro cyihariye Minisiteri wa Siporo Munyangaju yagiranye na IGIHE, yavuze ko uruhare rwa Minisiteri mu guteza imbere uyu mukino ari urusanzwe cyane ko inshingano zayo ari izo guteza imbere imikino muri rusange.

Ati “Inshingano za minisiteri ya siporo ni uguteza imbere imikino yose, n’umukino wa Golf nawo urimo. Minisiteri ikorana n’amashyirahamwe y’imikino akaba ari yo ashyiraho gahunda no gukurikirana ko ibikorwa bikorwa bigenda neza.”

Minisitiri Munyangaju yavuze ko ibikorwaremezo byashyizweho na leta ishoyemo amafaranga bityo hakwiye ingamba zo kubibungabunga, kubiteza imbere no gushyiraho ibikorwa bituma abanyamahanga bakomeza kugana u Rwanda binyuze muri Golf.

Iki kibuga gikinirwaho n'ibihangange bitandukanye, aha Mo Farah yari yaryohewe n'umukino ubwo aheruka mu Rwanda
Wari umugoroba w'ibyishimo ku bayobozi barimo guverineri wa BNR Rwangombwa ndetse na Minisitiri Munyangaju

Ibyo wamenya ku mukino wa Golf

Umukino wa Golf ni umwe mu mikino ikunze gukinwa n’abantu bifite. Uyu ni umukino ukinwa umuntu asa n’uhanganye n’ikibuga kurusha kuba uhanganye na mugenzi wawe.

Ikibuga gikinirwamo akenshi kiba gifite imyobo abantu bateramo agapira ishobora kuba 18 cyangwa icyenda ku bibuga bimenyerewe cyane. Iyi nayo iri mu byiciro bitandukanye bigendanye n’intera irimo (Pare).

Nko ku kibuga cya Golf cya Kigali hari imyobo y’ibyiciro bitatu bigizwe n’intera yo hafi ishobora kugirwa na metero hagati ya 100-200 aho ukubitira agapira, intera yo hagati iri hagati ya metero 300-400 ndetse n’intera ya kure ni ukuvuga nko muri metero 500.

N’amanota abarwa hashingiwe ku ntera uwakinnye yakiniyeho, ubumenyi afite muri Golf. Ubusanzwe hari ibyiciro bitatu birimo 0-9 aho hakinwa n’abakinnyi bafite ubumenyi muri Golf, 10-18 igakinwa n’abafite ubumenyi bwisumbuyeho, 18-29 cy’abafite ubumenyi bukiri hasi.

Mu mikinire buri wese ahabwa amahirwe y’inshuro zo gukina ndetse n’uburyo bw’amanota bigendanye n’ubumenyi afite (handicap) nibura kugira ngo umuntu abe akinnye ikibuga cyose, bishobora gutwara amasaha ane ku kibuga gifite imyobo 18 cyangwa amasaha abiri ku gifite imyobo 9.

Uyu mukino ubamo amoko abiri y’ingenzi akunze kwifashishwa cyane harimo Stroke game ikunze gukinwa n’ababigize umwuga ndetse n’ iyitwa Match Game.

Mu gihe ukina Golf witondera cyane kwita ku mupira wawe kuko iyo ukina Golf, uba uhanganye ahanini n’ikibuga ndetse nawe ubwawe, kureba neza aho mugenzi wawe ahagaze kugira ngo ube utamuteza impanuka ndetse no kwita ku kureba ku kibuga ugiye gukiniramo.

Kugeza ubu mu Rwanda hari ikibuga mpuzamahanga cya Golf ari nacyo cyitezweho amahirwe y’ishoramari y’ubukerarugendo mu bijyanye na Siporo mu Rwanda cyane cyane mu bijyanye no guteza imbere imikino itandukanye itaramenyekana.

Kigali Golf Course yitezweho kuzamura u Rwanda ku ruhando mpuzamahanga
Golf ni umukino usaba ubushishozi n'ubuhanga
Ikibuga cya Kigali Golf Course cyashyizwe ku rwego rw'ibibuga mpuzamahanga
Utu tumodoka tuzwi nka Golf Carts ni two dufasha abakinnyi kugera mu bice bitandukanye by'iki kibuga
Keza Jing Han ni umwe mu bitwaye neza
Minisitiri wa siporo Munyangaju yasabye abakoresha ikibuga cya Kigali Golf Course kukibyaza umusaruro

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .