00:00:00 IGIHE NETWORK KN KINYARWANDA EN ENGLISH FR FRANCAIS

Max Verstappen yegukanye Shampiyona y’Isi ya F1 ahigitse Lewis Hamilton (Amafoto)

Yanditswe na Eric Tony Ukurikiyimfura
Kuya 12 Ukuboza 2021 saa 10:20
Yasuwe :

Umuholandi Max Verstappen wa Red Bull yegukanye Shampiyona y’Isi yo gusiganwa mu modoka nto “Formula 1” ku nshuro ya mbere nyuma yo gusiga Lewis Hamilton muri Grand Prix ya nyuma yakiniwe i Abu Dhabi kuri iki Cyumweru.

Lewis Hamilton washakaga kwegukana Shampiyona y’Isi ya Formula 1 ku nshuro ya munani, yayoboye isiganwa rya nyuma kuva ritangiye kugeza mu gace ka nyuma (ka 58).

Isiganwa ryabaye nk’iritangiye bundi bushya ubwo Verstappen yari amaze guhindura amapine habura kuzenguruka inshuro imwe mu gihe Hamilton yari akigendera ku mapine yahoranye.

Verstappen yageze aho atambuka kuri Hamilton mu isiganwa ry’uyu munsi rizavugwa imyaka myinshi mu mateka ya Formula 1, ndetse ni byo byamuhesheje intsinzi kuko bombi banganyaga amanota 369,5 mbere yo kwerekeza i Abu Dhabi.

Yatsinze nyuma yo gukoresha isaha imwe, iminota 30, amasegonda 17 n’ibice 345, arusha amasegonda abiri n’ibice 256 Hamilton wari umukurikiye mu gihe Carlos Sainz Jr wa Ferrari, yabaye uwa gatatu asizwe amasegonda 5,173 na Verstappen. Utwaye isiganwa rimwe rya F1 ahabwa amanota 26, uwa kabiri 18 naho uwa gatatu 15.

Gutsinda k’uyu Muholandi w’imyaka 24, kwatumye yegukana F1 ku nshuro ya mbere ndetse ni umupilote wa 34 ubashije kwegukana iyi Shampiyona y’Isi kuva itangiye gukinwa mu 1950.

Lewis Hamilton wananiwe kuba umukinnyi wa mbere wegukanye F1 inshuro nyinshi mu mateka, aho akomeza kunganya zirindwi n’Umudage Michael Schumacher watwaye iya nyuma mu 2004, yagumye mu modoka umwanya munini nyuma yo gutsindirwa mu muzenguruko wa nyuma.

Ku rundi ruhande, ubwo Verstapoen yatsindaga, yavugije induru akiri mu modoka mu gihe abo babana muri Red Bull bishimiraga intsinzi; yabaye isiganwa rya 10 yegukanye muri uyu mwaka w’imikino wa 2021 mu gihe Hamilton yatwaye amasiganwa umunani.

Mu gihe byari ibyishimo muri Red Bull, abakeba bayo, Mercedes, batanze ibirego bibiri, kimwe kuri Verstappen wanyuze kuri Hamilton mu buryo butemewe ndetse n’ikindi ku byo bavuze ko abashinzwe isiganwa batakurikije amategeko ubwo hari imodoka bemereraga guca ku ishinzwe umutekano hagati mu isiganwa ubwo bari mu muzenguruko wa nyuma.

Amakipe yombi yavuganye n’abashinzwe isiganwa, ariko umwanzuro wafashwe wagaragaje ko ibirego bya Mercedes nta shingiro bifite, bityo Max Verstappen yemezwa nk’uwatwaye Shampiyona y’Isi ya F1 ya 2021.

Hamilton yari ayoboye ndetse afite icyizere cyo gutsinda ubwo abapilote bari bamaze kuzenguruka inshuro 53/58, ariko impanuka ya Nicholas Latifi wa Williams ituma imodoka ishinzwe umutekano w’isiganwa ijya mu muhanda.

Bitewe n’uko hari imodoka bari bazengurutse (bazikoreyeho tour/lap), hari imodoka eshanu hagati ya Hamilton wa mbere na Verstappen wa kabiri. Bwa mbere, abayoboye isiganwa bavuze ko izo modoka zari zasizwe zitaca ku ishinzwe umutekano mu muhanda, ariko nyuma zirabyemererwa, byatumye Verstappen ahita asatira cyane Hamilton.

Icyo gihe, Hamilton yari akiri gukoresha amapine yahinduye kuri lap ya 17 mu gihe ubwo imodoka ishinzwe umutekano mu muhanda yari yinjiye mu isiganwa, Verstappen yagiye guhinduza amapine kandi iyo ari mashya bikaba byorohera umupilote mu muhanda.

Lewis Hamilton yayoboye Grand Prix y'i Abu Dhabi igihe kinini
Habura kuzenguruka inshuro imwe ni bwo Max Verstappen yanyuze kuri Hamilton kugeza amutsindanye isiganwa
Byari ibyishimo muri Red Bull ubwo Max Verstappen yari amaze gutsinda i Abu Dhabi
Hamilton yashakaga gutwara F1 ku nshuro ya munani, ariko ntiyabigezeho
Lewis Hamilton yagiye gushimira Verstappen watwaye Shampiyona y'Isi ya F1 muri uyu mwaka
Max Verstappen yemejwe nk'uwatwaye F1 mu 2021 nyuma yo guteshwa agaciro k'ibirego bya Mercedes

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .