Iri siganwa ryari rigizwe n’uduce tune twakiniwe mu mihanda ya Gasenyi inshuro ebyiri na Ruhuha inshuro ebyiri, ku ntera y’ibilometero 77.

Imodoka eshanu ni zo zarikinnye nyuma y’aho Semana Genese na Huraha Sekamana batabashije gukina.

Kanangire Christian wari utwaye Subaru Impreza ari hamwe na Mujiji Kevin, begukanye “Gako Sprint Rally 2024” bakoresheje iminota 58 n’amasegonda 42.

Ni nyuma yo kuba aba mbere mu gace ka mbere k’i Gasenyi ku ntera y’ibilometero 24 no mu gace ka gatatu n’aka kane, twombi twakiniwe i Ruhuha tureshya n’ibilometero 14,5.

Kalimpinya Queen na Ngabo Olivier, na bo bari muri Subaru Impreza, babaye aba kabiri bakoresheje isaha, iminota icyenda n’amasegonda 56 aho ari na bo bitwaye neza mu gace ka kabiri i Gasenyi.

Umwanya wa gatatu wegukanywe na Gasarabwe Alain wakinanye na Mike Rutuku, aho bombi bakoresheje isaha, iminota 10 n’amasegonda 13.

Rutabingwa Gratien na Munyaneza Irène bari muri Peugeot 106, babaye aba kane naho Gakwaya Claude na Mugabo Claude bari muri Subaru Impreza, baba aba gatanu nyuma yo gukora impanuka mu gace ka mbere i Gasenyi.

Nyuma yo gutsindira mu Bugesera, Kanangire Christian na Mujiji Kevin bahise bayobora Shampiyona y’Igihugu n’amanota 63.

Isiganwa ritaha ni irya Rwanda Mountain Gorilla Rally, riri ku ngengabihe ya Shampiyona Nyafurika, rizakinwa iminsi itatu tariki ya 18-20 Ukwakira 2024.

AMASHUSHO: Kanangire Christian ari kumwe na Mujiji Kevin muri Subaru Impreza, begukanye isiganwa ry’imodoka rya “Gako Sprint Rally 2024” ryakinwe ku wa Gatandatu, tariki ya 14 Nzeri 2024 mu Karere ka Bugesera.

Bombi bahise bayobora Shampiyona y’Igihugu yo gusiganwa mu modoka… pic.twitter.com/GFZXJ2vBhx

— IGIHE Sports (@IGIHESports) September 16, 2024

Kanangire Christian (iburyo) na Mujiji Kevin (ibumoso) begukanye ‘Gako Sprint Rally 2024’ banayobora Shampiyona y'Igihugu yo gusiganwa mu modoka