Kaminuza yo mu Buyapani iri guhugura abatoza n’abayobozi b’imikino itandukanye mu Rwanda

Yanditswe na Eric Tony Ukurikiyimfura
Kuya 19 Kanama 2019 saa 09:52
Yasuwe :
0 0

Guhera kuri iki Cyumweru tariki ya 18 kugeza ku wa Kabiri tariki ya 20 Kanama 2019, mu Rwanda hari kubera amahugurwa y’iminsi itatu ahuje abatoza n’abayobozi b’imikino itandukanye bagera kuri 26, aho atangwa n’inzobere z’abarimu bo muri Kamuniza ya Tusukuba yo mu Buyapani, bakuriwe na Prof. Rakwal Randeep.

Iyi Kaminuza ya Tsukuba yo mu Buyapani ifite ubufatanye na Komite Olempike y’u Rwanda ni yo yizemo Umuyobozi wa Siporo muri Minisiteri y’Umuco na Siporo, Rurangayire Guy Didier, Umusifuzi mpuzamahanga mu mikino ya Basketball, Shema Maboko Didier n’ Umunyamabanga Nshingwabikorwa w’Ishyirahamwe ry’imikino y’Abafite ubumuga (NPC), Nizeyimana Célestin.

Intego y’aya mahugurwa ni ukongerera abatoza n’abayobozi ubumenyi kugira ngo barusheho gutegura abakinnyi bazahagararira u Rwanda mu marushanwa atandukanye arimo Imikino Olempike izabera i Tokyo mu Buyapani mu 2020 no gutegura abazakina iya 2014 izabera i Paris mu Bufaransa nk’uko byagarutsweho na Prof. Rakwal Randeep uyoboye abari gutanga aya mahugurwa.

Ati” Abitabiriye aya mahugurwa bazayungukiramo ubumenyi buzafasha abakinnyi bakiri bato mbere y’uko haba imikino Olempike izabera i Tokyo isigaje umwaka umwe ngo ibe ndetse n’iya 2024 izabera i Paris.”

Ambasaderi w’u Buyapani mu Rwanda, Takayuki Miyashita wari watumiwe muri aya mahugurwa, yavuze ko iyi gahunda ari nziza ku iterambere rya siporo mu Rwanda.

Yasabye kandi abitabiriye amahugurwa barimo abatoza kuzifashisha ubumenyi bazunguka bagafasha abakinnyi kwitegura neza imikino mpuzamahanga itandukanye.

Ati” Ni amahugurwa aziye igihe kuko dusigaje igihe kitageze ku mwaka umwe ngo imikino Olempike ya Tokyo ibe, numvise ko mu Rwanda amagare, Beach Volleyball no gusiganwa ku maguru ari bo bazitabira, ndizere ko bazitwara neza.”

Visi Perezida wa Komite Olempike y’u Rwanda, Bizimana Festus yavuze ko basanzwe ko bakorana n’iyi Kaminuza ya Tsukuba mu rwego rwo guteza imbere siporo n’imicungire yayo.

Ati” Hashize igihe dufatanya n’iyi Kaminuza yo mu Buyapani, hari n’abanyarwanda batatu bamaze kurangizayo. Harimo no kuba Leta zombi zikorana kuko Perezida wa Repubulika yari mu Buyapani muri Mutarama, basinya amasezerano atandukanye hamwe na Minisitiri w’Intebe w’Ubuyapani, muri ibyo harimo no guteza imbere Siporo.”

“Abari hano benshi ni abatoza, ni abayobozi ba Siporo turizera ko hari ubundi bumenyi bahakura ndetse bakagira n’ubunararibonye burushijeho.”

Mu ngingo zibandwaho muri aya mahugurwa harimo imiyoborere ya siporo, kurwanya ikoreshwa ry’imiti yongerera ingufu abakinnyi no guteza imbere impano z’abakinnyi bakiri bato.

Abitabiriye aya mahugurwa ni: Muhirwa Jean Claude, Mwambali Serge, Buhake Albert, Mutokambali Moïse, Seninga Innocent, Mbabazi Alain, Nsengiyumva Jean Marie Vianney, Sibomana Aimable, Murangwa Usenga Sandrine, E’Gairma Hermine, Mukashema Eline, Niragire Angelique.

Hari kandi Nkuranyabazi Noël, Rugambwa Alain, Rugigana Jean Claude, Ndizeye Yves, Ngarambe François Xavier, Gatsinzi Claude, Murenzi Emmanuel, Sharangabo Alex, Nzabanterura Eugène, Mugisha Jean Jacques, Habyarimana Florent, Kayisire Jacques na Mana Jean Paul.

Amahugurwa yahuje abatoza n'abayobozi b'imikino bagera kuri 26
Ambasaderi w’Ubuyapani mu Rwanda, Miyashita Takayuki yasabye abatoza b'abanyarwanda kubyaza umusaruro ubumenyi bakura muri aya mahugurwa
Aya mahugurwa ari gutangwa n'abarimu bo muri iyi kaminuza yo mu Buyapani
Prof. Rakwal Randeep uyoboye abatanga amahugurwa baturutse muri Kaminuza ya Tsukuba
Umuyobozi wa Siporo muri Minispoc, Rurangayire Guy Didier yasoreje amasomo y’icyiciro cya gatatu cya Kaminuza “Master’s” mu bya Siporo n’amasomo y’ibya Olempike (Sports and Olympic Studies) muri Kaminuza ya Tsukuba
Umunyamabanga Nshingwabikorwa wa NPC Rwanda, Nizeyimana Célestin na we yize muri iyi kaminuza
Umusifuzi Mpuzamahanga wa Basketball Shema Maboko Didier na we ni undi munyarwnada wize muri Kaminuza ya Tsukuba

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza