Kabera Godfrey na Uwase Sandrine nibo bakinnyi beza b’umwaka wa 2019 muri Chess

Yanditswe na Eric Tony Ukurikiyimfura
Kuya 30 Ukuboza 2019 saa 02:47
Yasuwe :
0 0

Muri izi mpera z’umwaka wa 2019 ni bwo Ishyirahamwe Nyarwanda ry’Umukino wa Esheke (FERWADE) ryateguye irushanwa ryo gutoranya umukinnyi mwiza w’umwaka (National Champion), mu cyiciro cy’abagabo no mu cyiciro cy’abagore.

Iri rushanwa ryabereye kuri ONOMO Hotel, ryari rigizwe n’imikino umunani (8 classical rounds) mu bagabo n’imikino itanu mu bagore, ryatangiye kuwa Kane tariki ya 26 Ukuboza 2019 risozwa kuri iki Cyumweru tariki ya 29 Ukuboza 2019.

Ni irushanwa ryari rikomeye aho abasore bakiri bato bigaragaje cyane batungurana batsinda bakuru babo bafite uburambe mu gukina uyu mukino.

Mu cyiciro cy’abagore, Uwase Sandrine w’imyaka 17 ni we wegukanye igikombe cy’umukinnyi mwiza w’umwaka wa 2019 ndetse ni ku nshuro ya gatatu yikurikiranya abaye umukinnyi w’umwaka abigezeho (2017, 2018, 2019) kandi abona amanota yose (5/5) nkuko yabigenje n’umwaka ushize.

Ku ikubitiro inota rya mbere yaribonye atsinze Uwase Joselyne (Women FIDE Master) w’imyaka 17 waherukaga kwitwara neza mu irushanwa mpuzamahanga rya Esheke (World Chess Olympiad 2018) ryabereye muri Georgia, mu mujyi wa Batumi.

Inota rya nyuma yaribonye atsinze Uwamahoro Christella (Women Candidate Master) w’imyaka 15 na we wari waritwaye neza muri iryo rushanwa mpuzamahanga.

Mu cyiciro cy’abagabo, Kabera Godfrey (Candidate Master) yegukanye igikombe nyuma yo gutsinda abakinnyi bakomeye barimo Joseph Nzabanita, Ben Tom Zimurinda n’abandi.

Yakomwe mu nkokora gusa na Murara Maxence (CM) wamutsinze mu mukino wa kane, aza no kunganya na Munyurangabo Rongin mu mukino wa gatandatu.

Munyurangabo Rongin wabaye uwa kabiri mu cyiciro cy’abagabo yigaragaje cyane ubwo yatsindaga Murara Maxence (CM) ku mukino wa gatanu abasha no kunganya na Kabera Godfrey (CM) mu mukino wa gatandatu.

Joseph Nzabanita wari usanganywe igikombe cy’umukinnyi mwiza w’umwaka wa 2018 ntiyahiriwe muri iri rushanwa kuko amahirwe yo kongera gutwara igikombe yayatakaje ku mukino wa kabiri ubwo yatsindwaga na Murara Maxence (Candidate Master), ndetse n’umukino wa gatatu atabonetsemo.

Perezida wa FERWADE, Ganza Kevin, avuga ko abo basore bakiri bato barimo Munyurangabo Rongin w’imyaka 19 na Cyubahiro Ben Patrick w’imyaka 16 batanga icyizere cy’ejo hazaza.

Ganza Kevin avuga ko muri rusange uko iminsi igenda imbaraga z’abakinnyi ziri kugenda ziyongera, bitanga icyizere ko igihugu kizahagararirwa neza mu irushanwa mpuzamahanga (World Chess Olympiad 2020) riteganyijwe kubera mu mujyi wa Moscow mu Burusiya muri Kanama 2020.

Amajonjora y’imbere mu gihugu yo gushaka ikipe y’igihugu ateganyijwe gutangira tariki ya 18 Mutarama 2020.

Kuva 2014 iri rushanwa risubukuwe, ibikombe bimaze gutwarwa na Ruzigura Alexis na Shimwa Marie Faustine (2014), Niyibizi Alain Patience na Shimwa Marie Faustine (2015), Dr. Ben Karenzi na Uwase Sandrine (2017), Dr. Joseph Nzabanita na Uwase Sandrine (2018) mu gihe muri 2016, iri rushanwa ritigeze rikinwa.

Uwamahoro Christella (Woman Candidate Master), afite imyaka 15
Uwase Sandrine wabaye umukinnyi w'umwaka mu bagore
Shimwa Marie Faustine yabaye umukinnyi w'umwaka mu bagore muri 2014 na 2015
Kagabo Mugema Eugène akina na Ivan Mugisha
Ivan Mugisha yiga amayeri yo gutsinda umukino
Murara Maxence (Candidate Master), wabaye uwa gatatu muri iri rushanwa
Kabera Godfrey (Candidate Master), wabaye uwa mbere mu bagabo
Kabera Godfrey akina na Zimurinda Ben Tom (wambaye umutuku)
Perezida w'Ishyirahamwe Nyarwanda ry'Umukino wa Esheke (Chess) Ganza Kevin yashimiye abakinnyi bitabiriye aya marushanwa asoza umwaka
Shimwa Marie Faustine ashyikirizwa igihembo na James Karuhanga cy'umukinnyi wa kabiri mu bagore
James Karuhanga na Ganza Kevin bashyikiriza ibihembo Uwase Sandrine watwaye igikombe mu bagore
James Karuhanga na Ganza Kevin bashyikiriza igihembo Munyurangabo Rongin, nk'umukinnyi wa kabiri mu bagabo
James Karuhanga na Ganza Kevin bashyikiriza ibihembo Kabera Godfrey
Abakinnyi beza b'umwaka wa 2019, Kabera Godfrey na Uwase Sandrine bafata ifoto hamwe na James Karuhanga uyobora Eagles Chess Club na Perezida wa FERWADE Kevin Ganza

Amafoto: Umurerwa Delphin


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .