Ishyirahamwe rya Tennis ikinirwa ku meza ryabonye Ubuyobozi bushya, Birungi yongera kuba Perezida

Yanditswe na Eric Tony Ukurikiyimfura
Kuya 22 Ukuboza 2019 saa 10:41
Yasuwe :
0 0

Inama y’Inteko Rusange y’Abanyamuryango b’Ishyirahamwe Nyarwanda rya Tennis ikinirwa ku meza (Rwanda Table Tennis Federation) yateranye kuri uyu wa Gatanu, yasize hashyizweho ubuyobozi bushya buyobowe na Birungi John Bosco wari usanzwe ari Perezida.

Muri iyi nama yabaye kuri uyu wa Gatanu mu cyumba cy’inama cya Minisiteri ya Siporo, hasuzumwe ibyakozwe muri iri Shyirahamwe kuva mu 2017 kugeza mu 2019 ndetse hareberwa hamwe ibiteganywa gukorwa mu mwaka utaha wa 2020.

Mu byagezweho muri iyi myaka ibiri ishize, harimo kuba iri Shyirahamwe rifite ubuzimagatozi, kuba kuri ubu hari amakipe ane yitabira amarushanwa ndetse hakaba harateguwe irushanwa ryo kwibuka Jenoside yakorewe abatutsi mu 1994 ndetse n’amahugurwa yahawe abatoza 21 ku bijyanye n’iterambere ry’uyu mukino.

Hagarutswe kandi kuri gahunda RTTF yihaye yo kugeza uyu mukino mu mashuri, mu bigo by’urubyiruko no mu bigo bya Leta, aho hose hagezwa ibikoresho byifashishwa muri uyu mukino.

Iyi nama y’Inteko Rusange yabereyemo kandi amatora ya Komite Nyobozi y’Ishyirahamwe, aho Birungi John Bosco wari usanzwe ari Perezida yagiriwe icyizere 100%.

Nyuma yo gutorwa, yavuze ko muri iyi manda nshya y’imyaka ine, we n’abo bazakorana bagiye kongera imbaraga mu byo bakora bityo u Rwanda ruzabe nibura mu bihugu bitatu cyangwa bitanu muri Afurika mu mukino wa Tennis ikinirwa ku meza, anavuga ko bafite umushinga wo kubaka ikigo cya Tennis yo ku meza (TTF centre), aho bakirimo kuganira n’abafatanyabikorwa nka Minisiteri ya Siporo, Ambasade y’Ubushinwa n’abandi batandukanye kugira ngo iki gikorwa cy’indashyikirwa kizabashe kugerwaho.

Umunyamabanga Mukuru wa Komite y’igihugu y’imikino Olempike mu Rwanda, Sharangabo Alex, wari n’umushyitsi mukuru muri iki gikorwa, yijeje ubufatanye Ishyirahamwe ry’umukino wa Tennis ikinirwa ku meza mu Rwanda nk’uko basanzwe babigenza, anabashimira uburyo abanyamuryango bagaragaza ubufatanye muri byose.

Muri aya matora, Frere Burasa Maurice yatorewe kuba Visi Perezida, Paul Ntaganda atorerwa kuba Umunyamabanga Mukuru mu gihe Mukamuhizi Fontaine yatorewe kuba Umubitsi.

Nyiraziraje Appollinarie yashinzwe iterambere ry’umukino mu bagore, Rukeratabaro Cynthia atorerwa guteza imbere umukino hirya no hino mu Ntara, Muhama Alphonse atorerwa guteza imbere umukino mu mashuri.

Iriza Marie Claire yashinzwe iterambere ry’uyu mukino mu bafite ubumuga mu gihe Ishimwe François Régis we yatorewe guhagararira abakinnyi bagenzi be muri iyi komite nyobozi.

Birungi John Bosco yongeye gutorerwa kuyobora Ishyirahamwe Nyarwanda rya Tennis ikinirwa ku meza (RTTF)
Umunyamabanga Mukuru muri Komite Olempike y'u Rwanda, Sharangabo Alex, yari yitabiriye aya matora ya RTTF
Komite Nyobozi y'Ishyirahamwe Nyarwanda rya Tennis ikinirwa ku meza
Inama y'Inteko Rusange ya RTTF yabereye mu cyumba cy'inama cya Minisiteri ya Siporo
Abanyamuryango ba RTTF biyemeje gukomeza gufatanya guteza imbere uyu mukino

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .