00:00:00 IGIHE NETWORK KN KINYARWANDA EN ENGLISH FR FRANCAIS

Hatangijwe umupira w’amaguru w’abagore bafite ubumuga mu Rwanda

Yanditswe na Eric Tony Ukurikiyimfura
Kuya 3 Ukuboza 2021 saa 10:38
Yasuwe :

Ku bufatanye na Komite Mpuzamahanga y’Umuryango Utabara Imbabare (ICRC), Komite y’Igihugu y’Imikino y’Abafite ubumuga mu Rwanda (NPC Rwanda) yatangije umupira w’amaguru w’abagore bafite ubumuga mu muhango wabereye ku kibuga cya Kimisagara- Football Hope Center ku wa Kane, tariki ya 2 Ukuboza 2021.

Uyu muhango wari witabiriwe n’abayobozi batandukanye barimo abahagarariye Minisiteri ya Siporo, ICRC, NPC Rwanda na Komite Olempike Mpuzamahanga.

Habanje kuba umukino wa gicuti w’amakipe y’abagabo, Musanze itsinda Nyarugenge ibitego 2-1.

Mu gutangiza umukino w’abagore ku mugaragaro, Musanze yatsinze Nyarugenge kuri penaliti 4-0 nyuma yo kunganya igitego 1-1 mu minota 15 yakinwe.

Perezida wa NPC Rwanda, Murema Jean Baptiste, yavuze ko bishimishije kuba hatangijwe umupira w’amaguru ku bagore bafite ubumuga kuko harimo icyuho ugereranyije na basaza babo.

Ati “Twari dusanzwe dufite ikibazo cy’imikino y’abagore n’abakobwa mu bantu bafite ubumuga, kuba habaye iki gikorwa cyo kumurika ikipe yabo mu mupira w’amaguru biratwereka ko turi kujya imbere.”

Abajijwe niba na bo bazashyirirwaho Shampiyona nk’uko bimeze mu bagabo, uyu muyobozi yavuze ko bagiye gushishikariza amakipe y’uturere y’abafite ubumuga kugira n’ay’abagore.

Ati “Tugomba gutangira kureba uko amakipe y’uturere ya Amputee Football na yo yagira amakipe y’abagore, icyo ni cyo cya mbere, noneho na bo bagatangira gukina Shampiyona y’Igihugu ku buryo tugera ku rwego rwo gukina imikino mpuzamahanga.”

Umuyobozi w’Ishami rishinzwe Ubugororangingo mu Muryango wa Afurika y’Iburasirazuba muri ICRC, Subhash Sinha, yavuze ko bazakomeza gukorana na NPC Rwanda kugira ngo bashyigikire imikino y’abafite ubumuga binyuze no mu gutegura amahugurwa yo kubongerera ubumenyi guhera mu mwaka utaha.

Ati “Twishimiye gutangiza uyu mukino kuko birerekana ko abagore bafite ubumuga batasigaye inyuma. Dukorana na NPC Rwanda mu mikino itatu kandi tuzakomeza gufatanya kugira ngo tuyiteze imbere.”

Kapiteni wa Musanze, Niyoyita Faina, yavuze ko bishimiye kuba na bo bagiye kujya bakina “Amputee Football” kuko hari abajyaga bibwira ko ntacyo bashoboye.

Ati “Ni ubwa mbere tugiye muri uyu mukino, twajyaga tubona abandi bawukina tukumva ko natwe twagerageza. Twishatsemo ubushobozi twumva ko natwe twawushobora. Twishimira ko natwe twabashije kuwinjiramo kuko hari abumvaga ko ntacyo dushoboye, ariko turashoboye. Tugiye kurushaho kwitoza.”

Uyu mukino wa “Amputee Football” mu bagore, watangijwe mu gihe kuri uyu wa Gatanu, tariki ya 3 Ukuboza, mu Karere ka Rubavu harizihizwa umunsi mpuzamahanga w’abantu bafite ubumuga ku Isi.

Amputee Football nk’uko umupira w’amaguru uhuza abafite ubumuga witwa, ikinwa n’amakipe abiri, buri imwe igizwe n’abakinnyi barindwi (cyangwa bari munsi yabo) barimo n’umunyezamu mu gihe abakinnyi b’imbere bagendera ku mbago.

Abakinnyi b’imbere bashobora kugira amaboko abiri, ariko bakagira ukuguru kumwe mu gihe abanyezamu bashobora kugira amaguru abiri, ariko bafite ukuboko kumwe.

Abakinnyi ntibaba bemerewe gukoresha imbago mu gushorera umupira.

Ku wa Kane ni bwo hatangijwe umupira w'amaguru w'abagore bafite umubuga mu Rwanda
Abakinnyi ba Musanze bishimira gutsinda Nyarugenge mu mukino wabereye ku kibuga cya Kimisagara
Amputee Football ikinwa n'abafite ubumuga bagendera ku mbago

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .