00:00:00 IGIHE NETWORK KN KINYARWANDA EN ENGLISH FR FRANCAIS

Hatangijwe ‘Icyumweru cya Tennis ku bagore’ (Amafoto)

Yanditswe na Eric Tony Ukurikiyimfura
Kuya 9 Werurwe 2022 saa 06:33
Yasuwe :

Guhera ku wa Kabiri, tariki ya 8 Werurwe kugeza ku ya 12 z’uku kwezi, muri IPRC Kigali hari kubera irushanwa rya Tennis ry’abagore mu rwego rwo kwizihiza Umunsi Mpuzamahanga wabahariwe. Iri rushanwa ry’iminsi ine ryiswe “Icyumweru cya Tennis ku bagore” ririmo kurushanwa no gukina byo kwishimisha ku batarabigize umwuga.

Igikorwa cyo gutangiza “Icyumweru cya Tennis ku bagore” hagamijwe guteza imbere uburinganire n’ubwuzuzanye mu mukino wa Tennis, cyabaye ku wa Kabiri, tariki 8 Werurwe, kibanzirizwa n’umukino wo gukangurira abakobwa bakiri bato n’abagore gukunda iyi siporo.

Wahuje amakipe abiri y’abakina ari babiri aho imwe yari igizwe na Perezida w’Ishyirahamwe Nyarwanda ry’Umukino wa Tennis, Karenzi Théoneste, wakinanye na Umulisa Joselyne wari uhagarariye abakinnyi b’Ikipe y’Igihugu ndetse akaba yaratwaye Shampiyona y’Igihugu inshuro zitandukanye.

Iyi kipe yatsinze iyari igizwe na Visi Perezida wa mbere wa RTF akaba n’Umutoza w’amakipe y’Igihugu ya Tennis, Ndejuru Aimable, wakinanye na Tuyishime Sonia uri mu bakobwa bato batanga icyizere mu mukino wa Tennis.

Karenzi Théoneste uyobora Ishyirahamwe rya Tennis mu Rwanda (RTF), yavuze ko gutegura iri rushanwa ari ukugira ngo hagaragazwe aho abagore bageze mu mukino wa Tennis.

Ati “Buri mwaka twizihiza umunsi w’abagore, tukizihiza ibyo abagore bamaze kugeraho. No muri siporo, turagira ngo tugaragaze ko hari aho abagore n’abakobwa bamaze kugera kandi barashoboye no muri Tennis.”

Yakomeje agira ati “Turashishikariza kandi n’abandi kwitabira iyi mikino ari benshi kuko bashobora kugera kuri byinshi nk’uko na basaza babo babigezeho. Iyo wigishije umugore uba wigishije n’abana kandi abana turabakeneye.”

Umuyobozi wa Tekinike muri RTF, Ndugu Philbert, yavuze ko “Icyumweru cya Tennis ku bagore” kigabanyijemo ibice bibiri birimo kurushanwa no gukina byo kwishimisha.

Ati “Ni irushanwa ryahuje abakobwa gusa. Hari icyiciro cy’abatarabigize umwuga baza bagakina kandi bakanatozwa. Hari kandi n’icyiciro cy’abarushanwa barimo abiga muri IPRC Kigali. Ababishaka bazakomeza kuza kuko ni ukugira ngo dufashe abantu kwitabira Tennis harimo n’abagiye kuyikina bwa mbere, ubu ni umwanya wabo.”

Ku ruhande rwa Umulisa Joselyne usanzwe utoza abana umukino wa Tennis, yavuze ko bishimiye iki “Cyumweru cya Tennis ku bagore”, ashimangira ko bizongera umubare w’abakina uyu mukino.

Ati “Sinzi niba nabyita amahirwe cyangwa gushyirwa imbere cyane, buriya mu buzima iyo ugize amahirwe ukagira iryo jambo ni ngombwa kubikoresha kugira ngo n’abakugiriye icyizere bakomeze bagufashe. Tugiye gushyiramo imbaraga kuko Umunyarwandakazi akwiye kugaragara muri siporo.”

Iri rushanwa rikaba ryateguwe n’Ishyirahamwe Nyarwanda ry’Umukino wa Tennis ku bufatanye n’Ishuri rya IPRC Kigali na Ecology Club ku nkunga ya Songa Logistics Company.

Imikino yatangiye kuri uyu wa Gatatu, tariki ya 9 Werurwe, izasozwa ku wa Gatandatu, tariki ya 12 Werurwe 2022.

Icyumweru cyahariwe abagore muri Tennis cyatangijwe ku wa Kabiri muri IPRC Kigali
Abagore n'abakobwa bashaka kwiga Tennis n'abarushanwa, bose bahawe amahirwe muri iri rushanwa rizasozwa ku wa Gatandatu
Habaye umukino wo gutangiza iki gikorwa kizamara iminsi ine
Ndejuru Aimable utoza amakipe y'Igihugu ya Tennis yafatanyije na Tuyishime Sonia uri mu bakobwa batanga icyizere muri Tennis
Perezida w’Ishyirahamwe Nyarwanda ry’Umukino wa Tennis, Karenzi Théoneste, yari mu bakinnye uyu mukino
Karenzi Théoneste na Umulisa Joselyne batsinze Ndejuru na Tuyishime
Ndejuru Aimable ari mu bazafasha abashaka kwiga gukina Tennis muri iyi minsi ine
Umulisa Joselyne usanzwe atoza abana Tennis, ni umwe mu bakinnyi bakomeye mu Rwanda
Amakipe yombi afata ifoto nyuma y'umukino
Abakobwa batandukanye bahawe amahirwe yo gukina Tennis
Mu bitabira iyi mikino harimo n'abakuru
Umuyobozi wa Tekinike mu Ishyirahamwe rya Tennis, Ndugu Philbert, akaba ari na we ushinzwe iri rushanwa ry'Icyumweru cya Tennis ku bagore

Amafoto: Nezerwa Salomon


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .