00:00:00 IGIHE NETWORK KN KINYARWANDA EN ENGLISH FR FRANCAIS

Hasojwe icyiciro cya mbere cy’amahugurwa y’abasifuzikazi ba Judo (Amafoto)

Yanditswe na Eric Tony Ukurikiyimfura
Kuya 27 Mata 2021 saa 10:21
Yasuwe :
0 0

Ku wa Mbere tariki ya 26 Mata 2021, kuri Stade Amahoro hasojwe icyiciro cya mbere cy’amahugurwa y’abasifuzi b’abagore b’umukino wa Judo bari ku rwego rw’Igihugu, yamaze iminsi itanu.

Ni amahugurwa yateguwe n’Ishyirahamwe Nyarwanda ry’umukino wa Judo ku bufatanye na Ministeri ya Siporo n’Inama y’Abaminisitiri b’Urubyiruko na Siporo bo mu bihugu bikoresha Ururimi rw’Igifaransa (CONFEJES).

Mu muhango wo kuyasoza wabaye ku wa Mbere tariki ya 26 Mata 2021, Habyarimana Florent ushinzwe amashyirahamwe ya siporo muri Minisiteri ya Siporo, yasabye abayahawe kuzakoresha ubumenyi bungutse no gufasha abandi bagore kuzamura urwego rw’umukino wa Judo.

Yabasezeranyije ko Minisiteri ya Siporo yiteguye gukomeza kubashyigikira ndetse izabaha icyumba cyo kwitorezamo nibagaragaza ko biteguye guteza imbere uyu mukino.

Ati “Abahuguwe ni bo bazaba umusingi w’iterambere ry’umukino wa Judo mu Rwanda, kuba ari abagore ni igisobanuro cy’uko iterambere rya siporo ritagomba kwirengagiza abagore kuko abagabo bamaze kuba benshi.”

“Akenshi ikibazo ntabwo kiba ari ubushobozi, iyo ubushake buhari, ukagaragaza n’ibikorwa ushaka kugeraho n’ubushobozi ntibubura. Ntawagaragaje icyo ashaka gukora ngo abure umufasha. Judo kimwe n’indi mikino njyarugamba yose iri muri gahunda ya Minisiteri yo kuzayiteza imbere kugira ngo na yo igire uruhare mu iterambere rya siporo.”

Perezida w’Ishyirahamwe ry’Umukino wa Judo mu Rwanda, Bishyika Christian, yavuze ko aya mahugurwa azafasha kongera umubare w’abagore bakina Judo mu gihe akenshi wasangaga abakobwa bayikina bayivamo uko imyaka igenda yiyongera.

Ati “Wasangaga Judo ikinwa n’abana bato bamara gukura bakajya mu bindi. Muri federasiyo yacu twabonye ko dukeneye abagore kuko nta kintu wateza imbere batarimo. Dufite icyizere ko n’aba bazagenda bazana n’abandi tugateza imbere umukino wacu.”

Uwayo Clarisse uri mu bahuguwe, yavuze ko hari byinshi bungutse ndetse bagiye gukomeza gushishikariza abandi bagore gukina uyu mukino.

Ati “Ntabwo twari dusanzwe dufite abagore bafite ubumenyi bwo kuba basifura hano mu Rwanda, tubaye aba mbere bahawe ubwo bumenyi bwo kuba basifura ku rwego rw’Igihugu ndetse no hanze yacyo.”

Yakomeje agira ati “Twamenye byinshi kandi tuzakomeza kwihugura. Uruhare rwacu nk’abahuguwe ni ugushishakariza abagore gukina Judo kuko ari umukino mwiza nk’iyindi yose akandi akarusho ukaba udufasha kwirwanaho.”

Nyuma y’iki cyiciro cy’amahugurwa, abahuguwe bazagirana ibiganiro n’abashinzwe siporo muri CONFEJES hifashishijwe ikoranabuhanga, aho hazatoranywa abahabwa ikindi cyiciro cy’amahugurwa.

Abasifuzikazi batanu bayitabiriye ni Uwayo Clarisse, Mukashema Eline, Mugorewase Elysée Fabrice, Gikundiro Françoise na Ingabire Gemma.

Umukino wa Judo watangiye gukinwa mu Rwanda mu 2009, federasiyo yawo yemerwa mu 2011.

Kuri ubu hari amakipe (Club) atanu arimo ane yo mu mashuri akina umukino. Ayo ni iya Kimisigara [kuri Maison des Jeunes], itozwa n’Umunye-Congo Joel Wawina Kafita [Umuyobozi wa Tekinike], iya Kagugu, Ecole Belge n’iya Green Hills.

Abitabiriye amahugurwa bafashe ifoto nyuma yo kuyasoza
Habyarimana Florent ushizwe amashyirahamwe ya siporo muri Minisiteri ya Siporo (iburyo) na Bishyika Christian uyobora Ishyirahamwe ry'umukino wa Judo mu Rwanda
Habyarimana Florent yijeje abakina Judo ko Minisiteri ya Siporo yiteguye kubashakira aho bazajya bitoreza
Perezida w'Ishyirahamwe Nyarwanda ry'Umukino wa Judo, Bishyika Christian
Abahuguwe bahawe n'umwanya wo gushyira mu bikorwa ibyo bize
Umunye-Congo Joel Wawina Kafita ni umwe mu bafasha mu guteza imbere umukino wa Judo

Amafoto: Niyonzima Moïse


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .