00:00:00 IGIHE NETWORK KN KINYARWANDA EN ENGLISH FR FRANCAIS

Handball: U Rwanda mu itsinda rimwe na Misiri mu Gikombe cya Afurika

Yanditswe na Byiringiro Osée Elvis
Kuya 24 July 2022 saa 08:49
Yasuwe :

Ikipe y’u Rwanda ya Handball y’Abatarengeje imyaka 18 n’iy’Abatarengeje imyaka 20 zamenye amatsinda ziherereyemo mu Gikombe cya Afurika cy’abatarengeje imyaka 18 ndetse na 20, giteganyijwe kuzabera i Kigali hagati ya tariki ya 20 Kanama n’iya 6 Nzeri 2022.

Ku gicamunsi cyo kuri uyu wa Gatanu, tariki ya 22 Nyakanga 2022 i Abidjan muri Côte d’Ivoire, ku cyicaro cy’Impuzamashyirahamwe y’Umukino wa Handball muri Afurika (CAHB), habereye tombola y’uko amakipe azahura mu Gikombe cya Afurika.

Tariki 29 Kanama kugeza 4 Nzeri ni bwo igikombe cya Afurika cy’abatarengeje imyaka 18 kizabera i Kigali, ku nshuro yacyo ya 28.

Kizitabirwa n’amakipe icyenda harimo u Rwanda ruzakira, Uganda, Burundi, Congo, Algérie, Maroc, Misiri, Libya na Madagascar.

Itsinda rya mbere ‘A’ rigizwe na Maroc, Libya, Uganda na Congo, mu gihe Itsinda rya kabiri ‘B’ ririmo Misiri, Algérie, Rwanda, Burundi na Madagascar.

Nyuma y’imikino y’amatsinda, amakipe abiri ya mbere azayobora itsinda azabona itike ya ½, mu gihe andi azakina imikino yo guhatanira imyanya (Classement).

Igikombe cya Afurika cy’Abatarengeje imyaka 20 cyo kigiye kuba ku nshuro yacyo ya 29. Guhera tariki ya 20-28 Kanama 2022, kizitabirwa n’u Rwanda ruzakira, Misiri, Tunisia, Algérie, Libya, Maroc, Angola, Congo na Centrafrique.

Itsinda rya mbere ‘A’ ririmo u Rwanda, Maroc, Tunisia, Angola, na Centrafrique. Mu igihe irya kabiri rigizwe na Algérie, Misiri, Libya na Congo.

U Rwanda ni rwo ruzakira imikino Nyafurika ya Handball

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .