00:00:00 IGIHE NETWORK KN KINYARWANDA EN ENGLISH FR FRANCAIS

Handball: Ku nshuro ya mbere, ikipe y’ishuri ryisumbuye yitabiriye irushanwa rya ECAHF hanze y’u Rwanda

Yanditswe na Eric Tony Ukurikiyimfura
Kuya 30 Ugushyingo 2021 saa 09:19
Yasuwe :

Guhera ku wa Mbere w’iki cyumweru, tariki ya 29 Ugushyingo 2021, i Dar es Salaam muri Tanzania hari kubera irushanwa rihuza amakipe yo muri Afurika y’Iburasirazuba no Hagati muri Handball (ECAHF), aho u Rwanda ruhagarariwe n’amakipe abiri ari yo Police HC mu bagabo, na Kiziguro SS mu bagore ndetse ni ubwa mbere ishuri ryisumbuye ryo mu Rwanda ryitabiriye iri rushanwa.

Ku ruhande rw’ikipe ya Police HC isanzwe yitabira aya marushanwa ikaba ari na yo ifite iki gikombe giheruka kubera mu Rwanda mu mwaka wa 2019, icyiciro cya mbere cy’abakinnyi bayo cyageze muri Tanzania ku wa Gatanu mu gihe abandi bagezeyo ku wa Gatandatu w’icyumweru gishize.

Ku ruhande rw’abakobwa, ishuri ryisumbuye rya Kiziguro ni ryo ryahagarariye u Rwanda, bikaba ari ubwa mbere iyi kipe yitabiriye aya marushanwa, ikaba ari nayo kipe y’ishuri ryisumbuye yitabiriye iyi mikino hanze y’u Rwanda.

Umutoza w’iyi kipe, Sindayigaya Aphrodis, yavuze ko intego bajyanye muri iyi mikino bitabiriye bwa mbere ari ugutwara igikombe.

Yagize ati “Tumaze hafi ukwezi twitegura iyi mikino, intego tujyanye ni ugushaka igikombe, ikipe tuzaba duhanganye ni iya Nairobi Water isanzwe itwara ibikombe.“

Abajijwe aho amikoro yo kugira ngo bitabire iyi mikino yavuye, uyu mutoza yavuze ko batewe inkunga na Kompanyi icukura amabuye y’agaciro ya ‘Gamico Mining Company Ltd’, ikaba ari yo yabaguriye amatike y’indege yatumye berekeza muri Tanzania kuko kugenda n’imodoka bitari gushoboka.

Ati “Twegereye abantu batandukanye na kompanyi zitandukanye, ariko umuterankunga wacu mukuru ni Gamico. Isanzwe idufasha kuko nk’ikigo cy’ishuri ntitwashobora kwitabira amarushanwa atandukanye.”

Aya makipe abiri yo mu Rwanda azatangira imikino yayo kuri uyu wa Gatatu, aho mu bagabo ikipe ya Police HC iri mu itsinda rimwe na Black Mamba yo muri Kenya ndetse na Nyuki yo muri Zanzibar.

Mu bagore, amakipe yose yitabiriye irushanwa azahura hagati yayo, nyuma izagira amanota menshi ikazegukana igikombe, hakaba haritabiriye Cereals na Nairobi Water zo muri Kenya, Ngome na JKT zo muri Tanzania ndetse na Kiziguro SS yo mu Rwanda.

Ikipe ya Kiziguro SS yahagurutse i Kigali ku wa Mbere yerekaza muri Tanzania
Ni ubwa mbere ikipe y'ishuri ryisumbuye yitabiriye irushanwa rya ECAHF hanze y'u Rwanda
Sindayigaya Aphrodice na Mudaharishema Sylvestre ni bo batoza ikipe ya Kiziguro SS

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .