00:00:00 IGIHE NETWORK KN KINYARWANDA EN ENGLISH FR FRANCAIS

Handball: Ikipe y’u Rwanda y’Abatarengeje imyaka 20 yatsinzwe na Guinée mu Irushanwa Nyafurika

Yanditswe na Byiringiro Osée Elvis
Kuya 18 Mutarama 2023 saa 09:33
Yasuwe :

Ikipe y’igihugu ya Handball y’Abatarengeje imyaka 20 yatsinzwe n’iya Guinée ibitego 52-34 kuri uyu wa 18 Mutarama 2023, uba umukino wa mbere itsinzwe mu Irushanwa Nyafurika “IHF Trophy Continental Phase”.

Wari umukino wa gatatu u Rwanda rwakinaga muri iri rushanwa rikomeje kubera muri Congo Brazzaville.

Ikipe y’Igihugu ya Guinée, ni yo yatangiye iri hejuru ndetse itsinda n’ibitego byinshi. Ku munota wa 17 iyi kipe yari yakubye kabiri ibitego u Rwanda kuko byari 14-7.

Igice cya mbere cyarangiye Guinée iyoboye n’ibitego 23-15 by’u Rwanda.

Uko iminota yagendaga ni ko u Rwanda rwibonaga mu mukino, rutangira gutsinda ibitego byinshi, ariko Guinée na yo ntiyemeraga ko ikinyuranyo gishiramo.

Abasore b’u Rwanda bagowe no kugabanya ikinyuranyo, umukino urangira batsinzwe ibitego 50-34.

Nyuma y’umukino, Kapiteni w’Ikipe y’Igihugu, Kubwimana Emmanuel, yavuze ko umunaniro no kumenyerana kwa Guinée ari byo byabagoye.

Ati “Twazize umunaniro kuko ejo twakoreshekje imbaraga nyinshi, hiyongeraho kuba bari baziranye bikomeye bituma umukino utugora.”

Umutoza w’Ikipe y’Igihugu y’u Rwanda, Ntabanganyimana Antoine, na we yashimangiye ko bazize umunaniro.

Ati “Umukino w’ejo twakoresheje imbaraga nyinshi cyane, bituma dutangira umukino ubona tunaniwe. Twagerageje kugabanya ikinyuranyo ariko biranga, ubu ni ukureba umukino w’ejo wa Nigeria kuko mu mibare biracyashoboka, Guinée yadutsinze ni yo ituri imbere.”

U Rwanda rusigaje umukino wa Nigeria ku wa Kane n’uwa Zimbabwe bazakina nyuma. Muri iri rushanwa, amakipe yose azahura hagati yayo, nyuma babare amanota, izasozanya menshi ibe iya mbere ihabwe igikombe.

Ikipe y'Igihugu ya Guinea ikomeje kwitwara neza mu mikino Nyafurika
Abasore b'u Rwanda bagerageje kugabanya ikinyuranyo ariko birananirana

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .