Handball: Amakipe y’u Rwanda akomeje kwitwara neza muri Zanzibar

Yanditswe na Eric Tony Ukurikiyimfura
Kuya 13 Werurwe 2019 saa 07:28
Yasuwe :
0 0

Ikipe y’igihugu y’abangavu batarengeje imyaka 18 n’iy’abatarengeje imyaka 20 mu mukino wa Handball, zombi zikomeje kwitwara neza mu mikino y’akarere ka gatanu ya ‘IHF Challenge Trophy’ ikomeje kubera muri Zanzibar.

Iyi mikino yatangiye kuri uyu wa Kabiri, aho ikipe y’u Rwanda y’abatarengeje imyaka 18 yatsinze iy’u Burundi ibitego 19-14 mu mukino wo mu itsinda B.

Mu mikino yabaye kuri uyu wa Gatatu, abanyarwandakazi batarengeje imyaka 20 bitwaye neza mu mukino wabo wa mbere, batsinda Tanzania ibitego 28-14. Undi mukino wabaye muri iki cyiciro, Kenya yatsinze Ethiopia ibitego 26-12.

Mu cyiciro cy’abatarengeje imyaka 18, ikipe y’u Rwanda yongeye kwitwara neza, itsinda umukino wayo wa kabiri yahuyemo na Djibouti ku bitego 56 kuri 13, yiyongerera amahirwe yo gusoza imikino yo mu itsinda B iri ku mwanya wa mbere.

Umutoza w’ikipe y’igihugu y’abangavu batarengeje imyaka 18, Muhirwa Nkusi Ezechiel yabwiye IGIHE ko ikipe ye imeze neza, ndetse biteguye kwitwara neza mu mukino usoza iyo mu itsinda, bakaba aba mbere.

Ati “Tumaze gukina imikino ibiri. Uw’ejo twarawutsinze ubwo twakinaga n’Abarundi. Uyu munsi twakinnye na Djibouti, yose aba ari amakipe y’ibihugu akomeye, twabatsinze ibitego 56-13. Wari umwanya wo kugira ngo abakinnyi bose mbakinishe cyane cyane ko ari abana batoya, ari ubwa mbere basohotse, ariko ikigaragara ni uko intsinzi ishoboka.”

“Abana bafite ishyaka, babayeho neza, barabyishimiye kandi bari gukina ubona nta gihunga. Dusigaje umukino w’ejo tuzakina na Ethiopia turi kunganya amanota. Uzatsinda ni we uzayobora itsinda, ariko nta bwoba inteye, ndabona bizashoboka.”

Yashimangiye ko intego ya mbere bafite ari uko ikipe y’u Rwanda igomba gusohoka ari iya mbere mu itsinda irimo.

Mudaharishema Sylvestre, umutoza w’ikipe y’abakobwa batarengeje imyaka 20, we yavuze ko n’ubwo amakipe bahanganye nayo atoroshye, bafite icyizere cyo kwitwara neza bakagera ku mukino wa nyuma.

Ati “Ikigaragara ni uko amakipe turi kubona hano afite ubushobozi bugerageza kuba bukomeye ariko natwe ntabwo twaje gutembera. Hatagize ikibazo kibaho wenda ngo abana bagire ikibazo cy’ikirere batamenyereye, dushobora gukina tukaba twagera ku mukino wa nyuma n’igikombe tukaba twagitwara, birashoboka.”

Mu cyiciro cy’abatarengeje imyaka 18 u Rwanda ruri mu itsinda B hamwe n’u Burundi, Djibouti na Ethiopia mu gihe abatarengeje imyaka 20 bo bari mu itsinda A hamwe na Ethiopia, Kenya na Tanzania.

Ikipe y'abatarengeje imyaka 20 na yo yitwaye neza mu mukino wayo wa mbere yakinnye kuri uyu wa Gatatu
Ikipe y'igihugu y'abatarengeje imyaka 18 yatsinze imikino ibiri ibanza

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza