00:00:00 IGIHE NETWORK KN KINYARWANDA EN ENGLISH FR FRANCAIS

Hakizimana na Mutimukeye begukanye irushanwa rya ’Rubavu-FRATRI Duathlon Challenge’ (Amafoto)

Yanditswe na Eric Tony Ukurikiyimfura
Kuya 4 Ukuboza 2021 saa 09:56
Yasuwe :

Hakizimana Félicien mu bagabo na Mutimukeye Saidate mu bagore ni bo begukanye irushanwa rya ’Rubavu-FRATRI Duathlon Challenge’ riri ku ngengabihe ya Shampiyona ya Triathlon mu Rwanda, ryari ryitabiriwe n’abakinnyi barimo umwe wo muri Repubulika Iharanira Demokarasi ya Congo na batatu bo muri Centrafrique.

Iri rushanwa ryabaye kuri uyu wa Gatandatu, tariki ya 3 Ukuboza 2021, ryateguwe mu gihe i Rubavu hari kubera Inteko Rusange ya karindwi y’Ishyirahamwe ry’Umukino wa Triathlon mu bihugu bikoresha Igifaransa (FRATRI) yitabiriwe n’ibihugu 16.

Abasiganwa 29 mu byiciro byombi, babanje gukora intera y’ibilometero 10 ku maguru (ibilometero 2,5 inshuro enye) mbere yo gukora ibilometero 40 ku igare (bazenguruka ibilometero bitanu inshuro umunani) mu gihe basoje bakora ibilometero bitanu ku maguru.

Hakizimana Félicien watwaye amarushanwa atatu muri ane ya Duathlon yabanjirije iry’uyu munsi muri uyu mwaka, ni we wageze ku murongo mbere nyuma yo gukoresha amasaha abiri n’amasegonda 46.

Uyu mukinnyi ukomoka muri Rulindo aherutse kandi kwitabira Irushanwa ry’Amagare rya Kigali- Gicumbi, akinira Nyabihu Cycling Club, ariko icyo gihe yasizwe iminota igera kuri 22 na Manizabayo Eric ’Karadiyo’ waritwaye.

Kuri uyu wa Gatandatu, yakurikiwe na Ngendahayo Germain yasize amasegonda abiri mu gihe Mutijima François yabaye uwa gatatu nyuma yo gukoresha amasaha abiri, umunota umwe n’amasegonda 12.

Mu bakobwa, hatsinze Mutimukeye Saidate waherukaga kwegukana irushanwa ryabereye i Gicumbi. Kuri iyi nshuro, yakoresheje amasaha abiri, iminota 49 n’amasegonda 39, akurikirwa na Nyirakubwimana Euphrasie na Uwitonze Francine.

Mu bafite ubumuga, hasiganwe Rukundo Augustin wakoresheje amasaha abiri, iminota 15 n’amasegonda 30 mu gihe Ntagiruka Alphonse ufite ukuguru kumwe yakoresheje isaha imwe n’iminota 50 ku igare gusa.

Abakinnyi batanu barimo umukobwa bane ni bo batasoje iri rushanwa ryakiniwe hafi y’Ikiyaga cya Kivu.

Nyuma ya ’Rubavu- FRATRI Duathlon Challenge’ hateganyijwe irushanwa risoza umwaka rizabera i Kigali ku wa 19 Ukuboza. Umukinnyi wegukanye buri rushanwa ahabwa amanota 400, uko bakurikirana bakagenda barushanwa 7,5%.

Duathlon ni imikino ibiri iba ikomatanyije, irimo gusiganwa ku maguru no ku igare. Iyo hiyongeyemo siporo yo koga ni bwo uyu mukino witwa Triathlon.

Mutimukeye Saidate yatanze abandi bakobwa kugera ku murongo
Uweze Sandrine ari mu bakinnyi batasoje irushanwa
Hakizimana Félicien wabaye uwa mbere mu bagabo, asiganwa ku igare
Abakinnyi basoje kwiruka bwa mbere bahita bafata amagare
Abakinnyi batatu ba mbere mu bagabo nyuma yo guhembwa
Rukundo Augustin na Ntagiruka Alphonse barushanyijwe mu bafite ubumuga
Abanya-Centrafrique bari mu bari bitabiriye iri rushanwa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .