00:00:00 IGIHE NETWORK KN KINYARWANDA EN ENGLISH FR FRANCAIS

Gasabo, Rusizi na Gisagara zitwaye neza muri Shampiyona ya ’Sitting Volleyball’ (Amafoto)

Yanditswe na Eric Tony Ukurikiyimfura
Kuya 15 Mutarama 2023 saa 07:03
Yasuwe :

Amakipe ya Gasabo, Rusizi na Gisagara mu bagabo ndetse na Musanze na Bugesera mu bagore, ni yo yitwaye neza kurusha ayandi i Huye mu mpera z’iki cyumweru, asoza imikino y’agace ka kabiri ka Shampiyona ya Sitting Volleyball adatsinzwe.

Shampiyona ya Sitting Volleyball ikinwa n’abafite ubumuga yakomeje ku wa Gatandatu no kuri iki Cyumweru hakinwa agace kayo ka kabiri mu nzu y’imikino n’imyidagaduro ya Kaminuza y’u Rwanda i Huye.

Ku munsi wa mbere w’irushanwa mu bagabo, Intwari ya Gasabo yongeye kwigaragaza nk’ikipe ikomeye itsinda imikino ine yahuyemo na Nyamasheke, Burera na Kicukiro ku maseti 2-0 ndetse na Musanze ku maseti 2-1.

Kuri iki Cyumweru, nabwo Gasabo yatsinze indi mikino ibiri yahuyemo na Rwamagana ndetse na Muhanga, yombi ku maseti 2-0.

Indi kipe yitwaye neza mu bagabo ni iya Rusizi, na yo yatsinze imikino yose yahuyemo n’amakipe ya Karongi, Kicukiro, Rwamagana na Muhanga ku wa Gatandatu. Kuri iki Cyumweru, yatsinze Ngoma na Rutsiro, zombi ku maseti 2-0.

Gisagara yakinnye imikino itanu muri iyi minsi ibiri n’amakipe ya Gatsibo, Ngoma, Nyamasheke, Burera na Ruhango, yose iyitsinda ku maseti 2-0.

Mu bagore, amakipe yitwaye neza agasoza agace ka kabiri adatsinzwe ni Musanze na Bugesera. Iyi kipe yo mu Majyaruguru yabigezeho itsinze Ruhango, Rubavu, Gicumbi na Nyanza mu gihe iyo mu Burasirazuba yatsinze Rubavu, Nyarugenge, Ruhango na Gakenke.

Umutoza wa Bugesera SVB y’Abagore, Ndamyumugabe Emmanuel, yavuze ko kugira abakinnyi bakinira Ikipe y’Igihugu iheruka muri Shampiyona y’Isi hari icyo byamufashije, cyane mu mukino utaboroheye batsinzemo ikipe ya Rubavu amaseti 2-1 ku wa Gatandatu.

Ati “Ntabwo byabura kuko umukinnyi uvuye mu irushanwa mpuzamahanga nka ririya hari urwego aba amaze kugeraho, akuze mu mutwe. Budafashije cyane imbere y’ikipe ya Rubavu yashakaga kwica umukino wacu.”

Murema Jean Baptiste uyobora Komite y’Imikino y’Abafite ubumuga (NPC Rwanda), yashimye urwego imikino yariho, avuga ko bigaragaza iterambere ry’umukino wa Sitting Volleyball muri rusange.

Ati “Biratwereka ko amakipe yo mu turere yaba ay’abagore cyangwa ay’abagabo amaze gutera imbere ndetse ukabona ko n’urwego rw’abatoza hari aho rugeze ku buryo umukino ugenda uzamuka.”

Yongeyeho ko kimwe mu biri gufasha uyu mukino kuzamuka ari uko basabye amakipe kugira abakinnyi bakina Sitting Volleyball ukwabo ndetse n’abakina Sitball ukwabo.

Agace ka gatatu ka Shampiyona ya Sitting Volleyball kazakinwa hagati ya tariki 11 n’iya 12 Werurwe 2023 mu Karere ka Gicumbi.

Nyuma y’aka gace ni bwo amakipe ane ya mbere muri buri cyiciro azahurira mu gace ka kane (play-offs) kazatanga ikipe zegukana ibikombe. Iyi mikino ya nyuma izabera i Gisagara hagati ya tariki ya 6 n’iya 7 Gicurasi 2023.

Intwari za Gasabo zikomeje kwigaragaza nk'ikipe ikomeye muri Sitting Volleyball y'abagabo
Ikipe ya Gatsibo iri ku makipe atarorohewe mu mpera z'iki cyumweru
Nyarugenge ikina na Rusizi mu bagore
Hakinwaga agace ka kabiri ka Shampiyona ya Sitting Volleyball
Uburyo amakipe y'abagore yatsindanye ku wa Gatandatu
Uko amakipe y'abagore yatsindanye kuri iki Cyumweru
Ibyavuye mu mikino y'abagabo yakinwe ku wa Gatandatu
Uko amakipe y'abagabo yatsindanye kuri iki Cyumweru

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .