Gakwaya Claude na Mugabo Claude bakoze amateka muri Rwanda Mountain Gorilla Rally 2019

Yanditswe na Eric Tony Ukurikiyimfura
Kuya 7 Ukwakira 2019 saa 09:06
Yasuwe :
0 0

Gakwaya Jean Claude na Mugabo Jean Claude bari muri Subaru Impreza N11 banditse amateka muri Rwanda Mountain Gorilla Rally 2019, baba Abanyarwanda ba mbere begukanye iri siganwa ry’imodoka ryabaga ku nshuro ya 16.

Rwanda Mountain Gorilla Rally 2019 yatangiye ku wa Gatanu ikamara iminsi itatu, yasojwe kuri iki Cyumweru hakinwa uduce dutandatu twa nyuma mu mihanda ya Gahengeri, Ntunga na Musha muri Rwamagana.

Umunsi wa mbere wakiniwe kuri Stade Amahoromu gihe uwa kabiri wakiniwe mu Karere ka Bugesera ku wa Gatandatu.

Kuri iki Cyumweru, imodoka esheshatu zari zisigaye mu isiganwa zakinnye agace ka 10 muri Gahengeri ku ntera y’ibilometero 10.16, aka 11 muri Ntunga ku ntera y’ibilometero 21.9 ndetse n’aka 12 muri Musha ku ntera y’ibilometero 21.04. Utu twose bongeye badusubiramo bakina agace ka 13, aka 14 n’aka 15.

Isiganwa ryose ryasojwe Gakwaya Jean Claude ukinana na Mugabo Jean Claude muri Subaru Impreza N11, ari bo begukanye Rwanda Mountain Gorilla Rally 2019 nyuma yo gukoresha amasaha atatu, umunota umwe n’amasegonda 18.

Umurundi Remezo Christian ni we wabaye uwa kabiri akoresheje amasaha atatu, iminota 21 n’amasegonda abiri, akurikirwa n’Umunyarwanda Jean Jean Giesen wakoresheje amasaha atatu, iminota 27 n’amasegonda 22.

Imodoka yari itwawe na Nshimiyimana Adolphe ‘Daddy’ yabaye iya kane nyuma yo gukoresha amasaha atatu, iminota 39 n’amasegonda 18 mu gihe iya Mayaka Felekeni Amigo yabaye iya gatanu nyuma yo gukoresha amasaha atatu, iminota 42 n’amasegonda ane.

Kayitankore Lionel yavuye mu isiganwa mu gace ka 13, yiyongera kuri Giancarlo Davite, Roshanali Mohamed Abbas ‘Momo’, Mwananteba Zamin na Din Imtiaz bavuyemo ku wa Gatandatu.

Gakwaya Jean Claude na Mugabo Jean Claude bakoze amateka muri iri siganwa ribarwa ku ngengabihe ya Shampiyona ya Afurika y’umukino wo gusiganwa mu modoka, baba abanyarwanda baryegukanye bwa mbere mu nshuro 16.

Mu mwaka ushize ryari ryegukanwe n’Umubiligi Giancarlo Davite wakoze impanuka ku wa Gatandatu imodoka ye ikangirika cyane.

Rwanda Mountain Gorilla Rally 2020 izaba muri Gicurasi ndetse izaba ari isiganwa rya gatatu ku ngengabihe ya Shampiyona ya Afurika.

Gakwaya Claude na Mugabo Claude babaye Abanyarwanda ba mbere begukanye Rwanda Mountain Gorilla Rally
Mitsubishi Lancer Evo 10 ya Giancarlo Davite yarangiritse bikomeye nyuma yo gukora impanuka ku munsi wa kabiri wa Rwanda Mountain Gorilla 2019

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza