00:00:00 IGIHE NETWORK KN KINYARWANDA EN ENGLISH FR FRANCAIS

Coronavirus: Abakinnyi, abatoza n’abasifuzi b’umukino wa Rugby bahawe inkunga y’ingoboka

Yanditswe na Mukwaya Olivier
Kuya 4 Nyakanga 2020 saa 11:30
Yasuwe :
0 0

Abakinnyi, abatoza n’abasifuzi b’umukino wa Rugby mu Rwanda, bahawe inkunga n’Impuzamashyirahamwe y’umukino wa Rugby ku mugabane wa Afurika, yo kubafasha muri ibihe bya COVID-1, ifite agaciro ka miliyoni 5 Frw.

Iyi nkunga igizwe n’imiti isukura intoki, imashini zipima Covid-19, imiti batera mu kibuga n’ibikoresho byifashishwa mu mukino ndetse n’ibiribwa, yatangiwe kuri Stade ya Kigali i Nyamirambo ku wa Gatanu.

Bimenyimana David, umuyobozi w’ikipe ya Lion de Fer nyuma yo kwakira iyi nkunga yashimye abayitanze avuga ko izabafasha mu gukomeza kwirinda.

Ati “Twabyakiriye neza kandi bizadufasha kuko hari icyizere cy’uko dushobora kuzasubukura imyitozo bitewe n’uko bizaba byifashe, kandi tuzakomeza gufata ingamba nk’uko turimo kubikora kuko nta mukinnyi wa Rugby n’umwe urafatwa na Covid 19. Nka njye mfite amakipe abiri: Abahungu n’abakobwa, umuntu uguhaye ibiribwa muri ibi bihe aba akoze igikorwa gikomeye.”

Umuyobozi w’Ishyirahamwe rya Rugby mu Rwanda, Kamanda Tharcisse, nyuma yo kubagezaho iyi nkunga, yabasabye kuyikoresha neza bakurikiza amabwiriza ya Minisiteri y’Ubuzima.

Ati "Buri kipe yahawe ibikoresho, twabyishimye kuko bije tubikeneye kandi hari icyizere cy’uko dushobora gutangira imyitozo bityo bikazabafasha kwirinda kuko ntabwo twifuza ko hari umukinnyi wacu uzandura.”

“Bahawe n’ibiribwa biri bufasha abakinnyi kuko abenshi, aba ‘bouncer’ bakorera mu tubyiniro kandi akazi karahagaze biraba bibafasha kubaho. Turabasaba ko ibi bikoresho babifata neza bakabikoresha uko byagenwe bakurikiza amabwiriza ya Minisiteri y’Ubuzima.”

Ni ku nshuro ya kabiri muri Rugby mu Rwanda, hakorwa igikorwa nk’iki nyuma y’icyabaye mu ntangiriro za Gicurasi, aho nabwo Ishyirahamwe ry’uyu mukino mu Rwanda ryatanze ibyo kurya ku bakinnyi bagizweho ingaruka cyane n’ibihe bya Guma mu Rugo.

Abakinnyi, abatoza n'abasifuzi b'umukino wa Rugby bahawe inkunga yo kubafasha muri ibi bihe bya Coronavirus
Mu byo bahawe harimo imiti isukura intoki, iyo gutera ku mupira cyangwa mu kibuga

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .