00:00:00 IGIHE NETWORK KN KINYARWANDA EN ENGLISH FR FRANCAIS

Abakinnyi b’abagore bakorerwa ihohoterwa ’bakarerembura amaso’ bakebuwe

Yanditswe na Mihigo Saddam
Kuya 24 May 2022 saa 07:59
Yasuwe :

Umunyamuryango muri Komite Mpuzamahanga y’imikino Olempike ku Isi (IOC), Rwemarika Félicité, yavuze ko ihohoterwa rishingiye ku gitsina rikorerwa abagore n’abakobwa ritizwa umurindi n’abarikorerwa ariko ntibarivuge.

Kuva kuwa 19-20 Gicurasi 2022, Komite Olempike y’u Rwanda yagize amahugurwa y’iminsi ibiri agamije kurebera hamwe ibibazo byugarije abagore bari muri siporo.

Ihohoterwa, ibibazo byo mu mutwe n’umubare ukiri muto w’abagore mu nzego za siporo ni zimwe mu ngingo zagarutsweho nk’izikibangamiye iterambere ry’abagore muri siporo.

Muri ibi bibazo, ikijyanye n’ihohoterwa rishingiye ku gitsina ni cyo kiri ku ruhembe rw’ibihangayikishije.

Rwemarika avuga ko ihohoterwa rikorerwa umugore muri siporo ritinda kuranduka bitewe n’abarikorerwa batabivuga.

Yagize ati ”Ku bijyanye n’ihohoterwa, tubakangurira ko igihe wahohotewe wihutira kubivuga, ukavuga uti ’kanaka ari kunkorera ibi n’ibi’, hanyuma abantu bakabishakira umuti aho kugira ngo baceceke.”

Yakomeje agira ati “Niba bashaka gutera imbere, bakwiye gukora bakamenya icyo bashaka, uzicara gusa akarerembura bizakomeza kubabaho.”

Aba bagore basabwe kwigirira icyizere, bagashaka amakuru ahagije no kumenya icyo siporo barimo izabamarira, bakamenya n’uko babyitwaramo hakiri kare.

Umukinnyi akaba na Kapiteni w’Ikipe ya United Volleyball Club (UVC), Cyuzuzo Gihozo Yvette, yahamije ko abakobwa bo mu mikino itandukanye bakorerwa ihohoterwa.

Yagize ati “Ntabwo navuga ko ku giti cyanjye ryambayeho ariko hari amakuru uba wumva navuga ngo ni inyuma y’amarido ariko bisaba kwegera abo bavigwaho, gusa biba bivugwa.”

Gihozo yakomeje avuga ko kimwe mu bibangamiye siporo muri rusange ari ubusumbane mu bihembo bihabwa abagabo n’abagore, ati “Ibijyanye n’agaciro byo bibaho ko habamo ubusumbane kuko mushobora gukina irushanwa rimwe, abagabo bagahembwa miliyoni 2 Frw, abakobwa bagahabwa nka kimwe kane cya miliyoni (500.00 Frw).”

Yongeyeho ko muri siporo y’abagore hadakunze kuba amahugurwa ahagije y’abatoza, abasifuzi ndetse n’ibikorwaremezo bikaba bikiri bike ku bakobwa.

Mu rwego rwo gufasha abanyamuryango bayo bava mu mashyirahamwe y’imikino mu Rwanda mu guteza imbere imikino bafite mu nshingano, Komite Olempike y’u Rwanda ibagenera amahugurwa.

Aya mahugurwa atangwa hagamijwe guteza imbere urwego rw’imiyoborere, imitoreze, imisifurire, uburinganire muri siporo n’ibindi.

Hari na porogaramu zigenerwa abanyamuryango mu gufasha abakinnyi bafite impano. Komite Olempike ifatanya na Minisiteri ya Siporo hagamijwe guteza imbere siporo y’u Rwanda.

Umunyamuryango muri Komite Mpuzamahanga y’imikinno Olempike ku Isi (IOC), Umunyarwandakazi Rwemarika Félicité avuga ko hari abakobwa n'abagore bitwaza ko umusaruro batanga muri siporo uterwa no kutitabwaho
Gashagaza Solange ummunyarwandakazi ukina umukino wa Karate wanatsindiye umwanya wa kabiri mu irushanwa ryo kwibuka ku nshuro ya 28 Jenoside yakorewe Abatutsi mu Rwanda mu 1994
Umusifuzi mpuzamahanga wo ku ruhande muri ruhago, Sandrine Usenga Murangwa nawe amaze kwiteza imbere
Cyuzuzo Gihozo Yvette avuga ko agasumbane kaba mu bihembo muri siporo we abifata nk'ihohoterwa
Uwayo Clarisse, umukinnyi umaze kubaka izina mu mukino njya rugamba wa Taekwondo mu cyiciro cy'abagore
Abagore bari muri siporo basobanuriwe aho uburenganzira bwabo muri siporo buhera n'aho burangirira
Visi Perezida wa kabiri muri Komite Olempike y'u Rwanda, Umutoni Salama, nk'uwakinnye akanatoza yari afite impanuro yaha abakizamuka umugore uri muri siporo
Abagore muri siporo bavuga ko bakeneye kuzamurirwa urwego rw'abatoza, abasifuzi, ibihembo batsindira no guhabwa amahirwe angana n'ayahabwa abagabo bari muri siporo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .