Amakipe y’abafite ubumuga bwo mu mutwe yashimiwe kubera imidali yakuye mu mikino Nyafurika

Yanditswe na Eric Tony Ukurikiyimfura
Kuya 3 Gashyantare 2020 saa 11:38
Yasuwe :
0 0

Amakipe y’u Rwanda y’abafite ubumuga bwo mu mutwe mu bahungu n’abakobwa, kuri iki Cyumweru yashimiwe ku midali ibiri yegukanye mu mikino Nyafurika ya “Special Olympics 1St Pan African Games 2020”, iheruka kubera mu Misiri.

Iyi mikino yabaye ku nshuro ya mbere yahuje ibihugu 42 i Cairo mu Misiri kuva tariki 23 kugeza 31 Mutarama 2020, yitabirwa n’amakipe abiri y’u Rwanda mu mupira w’amaguru.

Ikipe y’abahungu yegukanye umudali wa Zahabu naho ikipe y’abakobwa yegukana umudali wa Feza.

Mu muhango wabereye kuri Serena Hotel kuri iki Cyumweru, abakinnyi 15 bari bagize amakipe abiri y’u Rwanda bakiriwe n’Ubuyobozi bwa Special Olympics Rwanda kugira ngo bashimirwe ku midali ibiri bakuye mu Misiri.

Umuyobozi w’Umuryango “Special Olympics Rwanda” wita ku bana bafite ubumuga bwo mu mutwe binyuze mu mikino, Pasiteri Sangwa Deus, yashimiye abakinnyi uko bitwaye, bakongera guhesha ishema u Rwanda mu mahanga.

Mwenedata Egide, umwe mu bakinnyi bagize ikipe y’abahungu, yavuze ko gukina byatumye umubiri we umera neza ndetse yishimira uko we na bagenzi be bakomeje gushyikigirwa.

Aba bakinnyi ni 15 barimo abakobwa barindwi ndetse n’abahungu umunani nibo bari baserukiye u Rwanda

Mu bakobwa hari Umuhire Joyeuse, Uwase Immaculée, Sugira Violette, Mushimiyimana Rahabu, Mukamanzi Yvette, Kayirebwa Liliose na Abimana Consolée.

Ikipe y’abahungu yari igizwe na Ukwishaka Pascal, Uwiduhaye Protogène, Ngabonziza Daniel, Ngendahimana Dieudonné, Mwenedata Egide, Muhawenimana Emmanuel, Ishimwe Jean Claude na Byiringiro Samuel.

Iyi mikino ya Pan African Games izongera kuba mu 2022, yakirwe n’u Rwanda.

Umuyobozi w’Umuryango “Special Olympics Rwanda” Pasiteri Sangwa Deus yashimiye abakinnyi begukanye imidali mu mikino ya Pan African Games ibaye bwa mbere'
Uturutse ibumuso ni: Umuyobozi wa Siporo, Muhire Patrick, Pasiteri Sangwa Deus uyobora Special Olympics Rwanda na Mukamurigo Aurore, visi perezida wa Special Olympics Rwanda
Umuyobozi wa Siporo muri Special Olympics, Muhire Patrick ni we wari uyoboye Delegasiyo y'u Rwanda yagiye mu Misiri
Abakinnyi nabo bashimiye Ubuyobozi uko bitabwaho
Ndayishimiye Gilbert watozaga ikipe y'abahungu yegukanye umudali wa Zahabu
Ikipe y'u Rwanda y'abahungu n'iy'abakobwa zatahanye imidali ibiri irimo uwa Zahabu n'uwa Feza

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .