Amakipe arindwi yo mu Rwanda yitwaye neza ku munsi wa gatatu wa FEASSSA 2019

Yanditswe na Eric Tony Ukurikiyimfura
Kuya 20 Kanama 2019 saa 09:46
Yasuwe :
0 0

Imikino ihuza ibigo by’amashuri byo mu karere ka Afurika y’Iburasirazuba iri kubera i Arusha muri Tanzania yakomeje kuri uyu wa Mbere hakinwa umunsi wa gatatu, aho amakipe arindwi yo mu Rwanda ari yo yitwaye neza, agatahana intsinzi.

Iyi mikino iri kuba ku nshuro ya 18, yatangijwe ku mugaragaro ku wa Gatanu mu Mujyi wa Arusha muri Tanzania, aho u Rwanda ruhagarariwe n’amakipe 16 mu mikino irimo Umupira w’Amaguru, Volleyball, Basketball, Handball, Gusiganwa ku maguru, Koga na Tennis.

Mu mikino yabaye kuri uyu wa Mbere, mu mikino 13 amakipe y’u Rwanda yakinnye, arindwi muri yo yaratsinze; aho muri Volley y’abahungu nta n’imwe yatsinze mu gihe muri Handball y’abahungu, ikipe ya ES Kigoma yarushijwe igitego kimwe ku munota wa nyuma.

Muri Handball y’abahungu, ES Kigoma yatsinzwe na Kakunguru yo muri Uganda ibitego 22-21, Kilombero SS yo muri Tanzania itsindwa na ADEGI y’i Gituza ibitego 40-15 naho Collège de Gisenyi itsinda Mbooni yo muri Uganda ibitego 20-18 mu gihe mu bakobwa, ES Kiziguro yatsinze Kirombero yo muri Tanzania ibitego 33-14.

Muri Volleyball y’abakobwa, St Aloys y’i Rwamagana yatsinze Kinawa yo muri Uganda amaseti 3-2.

Mu bahungu, Don Bosco Gatenga yatsinzwe na Stahiza yo muri Uganda amaseti 3-2, IPRC Karongi itsindwa na Mogonga yo muri Kenya amaseti 3-2 ndetse na PSV Karubanda itsindwa na Lelmokwo amaseti 3-2.

Muri Basketball y’abakobwa, Ste Bernadette yatsinzwe na Nabisunsa yo muri Uganda amanota 56-40.

Mu mupira w’amaguru, mu bakobwa, GS Remera Rukoma yatsinzwe na Itigo yo muri Kenya ibitego 2-0 naho mu bahungu, Lycée de Kigali yanganyije na Alliance yo muri Tanzania ubusa ku busa.

Abakinnyi n’ababahagarariye basuwe n’Umunyamabanga w’umuryango wa Afurika y’Iburasirazuba (EAC) , ushinzwe Imari n’Ubutegetsi, Bazivamo Christophe, arabaganiriza, abizeza ko diaspora y’Abanyarwanda iri Arusha ibashyigikiye kandi ko izagenera ibihembo amakipe azitwara neza.

Umunyamabanga wa EAC, ushinzwe Imari n’Ubutegetsi, Bazivamo Christophe yasuye amakipe y'u Rwanda ari mu mikino ya FEASSSA 2019
Yababwiye ko abazitwara neza hari ibihembo azagenerwa n'abanyarwanda baba i Arusha

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza