00:00:00 IGIHE NETWORK KN KINYARWANDA EN ENGLISH FR FRANCAIS

Bugesera: Abana bafite impano muri Tennis bashyizwe igorora

Yanditswe na Eric Tony Ukurikiyimfura
Kuya 4 Ukuboza 2021 saa 02:42
Yasuwe :

Ishyirahamwe ry’umukino wa Tennis mu Rwanda (RTF) ryashyikirije Akarere ka Bugesera ibikoresho birimo ’rackets’ 25, imipira 96 na filets ebyiri mu rwego rwo gutangiza gahunda yo kuzamura impano z’abakiri bato muri uyu mukino.

Iki gikorwa kiri muri gahunda ya “Junior Tennis Iniative (JTI)” igamije guteza imbere umukino wa Tennis mu bakiri bato, igaterwa inkunga n’Ishyirahamwe Mpuzamahanga ry’umukino wa Tennis (ITF).

Binyuze muri iyi gahunda, Federasiyo ya Tennis ikorana n’ibigo by’amashuri kuko ari ho haba abana bakiri bato bari hagati y’imyaka ine n’itandatu n’ikindi cyiciro cy’abari munsi y’imyaka 12 iherwaho mu gukora Ikipe y’Igihugu.

Mu Karere ka Bugesera, JTI ikorerwa mu bigo birimo Les Colombes, aho abana biga kuri iri shuri ribanza bakinnye imikino itandukanye ku kibuga cya Stade y’aka Karere mbere y’uko hatangwa ibi bikoresho ku wa Gatanu, tariki ya 3 Ukuboza 2021.

Umuyobozi w’Akarere ka Bugesera, Mutabazi Richard, yavuze ko banejejwe n’ubufatanye bagiranye n’Ishyirahamwe ry’umukino wa Tennis mu Rwanda, yizeza ko iyi gahunda bazayishyigikira.

Ati “Turashima iyi nkunga ije. Turabizeza ko iyi gahunda tuzayishyigikira uko bishoboka kose, Bugesera n’ubundi dusanzwe turi igicumbi cya siporo.”

Yakomeje agira ati "Dufite ibigo by’amashuri byinshi bituriye hano, dufite n’ibikorwaremezo, uretse ibi byo kuri Stade, dufite n’abikorera bagiye bubaka ibikorwa byinshi cyane, amahoteli n’ amashuri ari hirya nayo ubwayo afite ibibuga bya tennis ariko n’ahatari bibuga nk’ibi abantu bashobora gutangirira ku bibuga byoroheje."

Perezida w’Ishyirahamwe ry’Umukino wa Tennis mu Rwanda, Karenzi Théoneste, yavuze ko iyi gahunda igamije gushaka abakinnyi b’ejo hazaza binyuze mu kwita ku bagaragaza impano zihariye.

Ati "Iyo ushaka guteza umukino wa Tennis imbere uhera mu bana. Twagize ngo turebe impano ziri mu bana, na zo tuzigirire gahunda zizavemo abakinnyi bo ku rwego rw’igihugu no ku rwego mpuzamahanga."

Uretse ubufasha bw’ibikoresho, Ishyirahamwe Nyarwanda ry’Umukino wa Tennis rigira uruhare mu ishyirwaho ry’umutoza w’uyu mukino ku kigo cy’ishuri mu gihe kandi iyi gahunda ikurikiranwa n’Umuyobozi wa Tekinike, Ndugu Philbert.

Uretse Bugesera, gahunda ya Junior Tennis Initiative (JTI) imaze kugera mu bigo by’amashuri byo mu turere turimo Nyanza, Musanze n’utwo mu Mujyi wa Kigali.

Meya w'Akarere ka Bugesera, Mutabazi Richard, ashyikirizwa ibikoresho bya Tennis wa Perezida wa RTF, Karenzi Théoneste
Ibikoresho byatanzwe biri muri gahunda ya JTI igamije kuzamura impano z'abakiri bato
Abana biga mu ishuri rya Les Colombes riri mu bigo bikoreramo iyi gahunda ya Junior Tennis Initiative

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .