Muri uyu mukino wa nyuma wabaye ku wa Gatandatu, Springboks ya Afurika y’Epfo yahiriwe n’igice cya mbere yatsinzemo ‘try’ enye z’amanota 20 zirimo ebyiri za Aphelele Fassi n’indi imwe yatsinzwe na Cheslin Kolbe ku mupira yamuhaye.

Pieter-Steph du Toit wabaye umukinnyi w’umukino, na we yatsinze ‘try’ imwe mu gice cya mbere, atsinda indi mu gice cya kabiri.

Muri iyi minota 40 ya nyuma, abandi batsinze ‘try’ [kugeza umupira ku murongo wo gutsindiraho bitanga amanota atanu] ni Malcolm Marx na Jesse Kriel.

Ni mu gihe abatsinze ‘conversion’ [uburyo bw’amanota abiri wongezwa umaze gutsinda try] za Afurika y’Epfo ari Hendrikse watsinze ebyiri na Handre Pollard watsinze eshatu mu gihe kandi Hendrikse yatsinze penaliti y’amanota atatu.

Argetine yatsindiwe na Tomas Albornoz kuri ‘try’ na ‘conversion’ yahawe mu gice cya mbere.

Byahinduye isura mu gice cya kabiri ubwo Pablo Matera wa Los Pumas ya Argentine, yahabwaga ikarita y’umuhondo nyuma yahinduwemo itukura y’iminota 20 nyuma yo kugonga Vincent Koch n’umutwe.

Amakosa atandukanye y’abarimo Santiago Carreras yatanze icyuho ku ruhande rwa Argentine, Afurika y’Epfo ibibyaza umusaruro kugeza ubwo yatsinze umukino ku manota 48-7.

Afurika y’Epfo yaherukaga kwegukana iri rushanwa mu 2019. Riyihuza hamwe na Nouvelle-Zélande, Argentine na Australie nk’ibihugu bihagaze neza kurusha ibindi mu gice cy’Amajyepfo y’Isi.

Ni rimwe n’iribera mu Majyaruguru y’Isi ryo rihuza u Bwongereza, u Bufaransa, u Butaliyani, Écosse, Pays de Galles na Irlande yatwaye irushanwa ry’uyu mwaka.

Abakinnyi bari bitabajwe:

Afurika y’Epfo: Fassi, Kolbe, Kriel, De Allende, Arendse; Libbok, Hendrikse; Nche, Mbonambi, Malherbe, Etzebeth, Nortje, Kolisi (capt), Du Toit, Wiese.

Abasimbura: Marx, Steenekamp, Koch, Louw, Smith, Reinach, Pollard, Am.

Argentine: S Carreras; Isgro, Moroni, Chocobares, M Carreras; Albornoz, Garcia; Gallo, Montoya (capt), Sclavi, Rubiolo, Lavanini, Gonzalez, Grondona, Oviedo.

Abasimbura: Ruiz, Calles, Delgado, Molina, Matera, Bazan Velez, Cinti, Cruz Mallia.

Afurika y'Epfo yatsinze Argentine iyirusha mu mukino wa nyuma wabaye ku wa Gatandatu

Muri Rugby, iyo utsinze 'try' binyuze ku kugeza umupira ku murongo batsindiraho, uhabwa amanota atanu ukongezwa n'ubundi buryo bw'amanota abiri

Afurika y'Epfo ifite Igikombe cy'Isi cya 2023, yaherukaga kwegukana iri rushanwa mu 2019