00:00:00 IGIHE NETWORK KN KINYARWANDA EN ENGLISH FR FRANCAIS

Abarusiya bari bitabiriye Imikino Paralempike i Beijing bahambirijwe

Yanditswe na Bukuru JC
Kuya 5 Werurwe 2022 saa 10:29
Yasuwe :

Abakinnyi b’Abarusiya bagombaga guhatana mu Mikino Paralempike iri kubera i Beijing mu Bushinwa bagiye gusubira iwabo nyuma y’uko bahagaritswe na IPC ku wa Kane ndetse na bo bakavuga ko badashaka kujuririra iki cyemezo.

Ku wa Gatanu ni wo wari umunsi wa mbere w’Imikino Paralempike ibera mu rubura i Beijing, yitabiriwe n’abakinnyi benshi baturuse hirya no hino ku Isi mu gihe 71 bavuye mu Burusiya bitegura gusubira iwabo.

Kubera uruhare u Burusiya na Belarus bifite mu ntambara iri kubera muri Ukraine, Komite Mpuzamahanga y’Imikino y’Abantu bafite ubumuga (IPC), yafashe icyemezo cyo guhagarika abakinnyi babyo ku wa Kane.

IPC yari yabanje kwemerera aba bakinnyi kwitabira ku giti cyabo [nta gihugu bahagarariye], ariko byamaganiwe kure n’amakipe menshi, mu rwego rwo kugabanya igitutu iyi Komite ihitamo guhagarika ibihugu byombi.

Nyuma yaho, Komite y’Imikino y’Abantu bafite ubumuga mu Burusiya (RPC) yatangaje ku wa Gatanu ko iri gutegura uburyo abakinnyi bava mu Bushinwa ndetse ititeguye kujuririra icyemezo cya IPC mu Rukiko rwa Siporo (CAS) kubera inama yagiriwe.

Yagize iti “Komite y’Imikino y’Abantu bafite ubumuga mu Burusiya n’abakinnyi ubu ntibiteguye kuguma i Beijing ndetse bari guteganya kuva muri uyu mujyi uri kuberamo Imikino yo mu gihe cy’urubura.”

Iyo abakinnyi b’Abarusiya bemererwa gukina ku giti cyabo muri iyi Mikino, si ubwa mbere byari kuba bibaye.

Kubera gukoresha imiti itemewe, abakinnyi b’Abarusiya bahagaritswe kwitabira imikino Paralempike y’i Rio mu 2016, nyuma bitabira iyabereye i PyeongChang ku giti cyabo mu gihe mu 2021 bitabiriye Imikino y’i Tokyo bahagarariye ROC cyangwa Komite Olempike y’u Burusiya.

Abakinnyi b’Abarusiya begukanye imikino 24 ubwo bakinaga nta gihugu bahagarariye mu mikino yabereye i Pyeongchang mu myaka ine ishize.

Kuki Belarus yahagaritswe?

Belarus iri gufasha cyane u Burusiya kwinjira muri Ukraine, byatumye na yo ifatirwa ibihano na Komite Mpuzamahanga y’Imikino y’Abantu bafite ubumuga (IPC).

Komite Olempike ya Belarus yari ifite abakinnyi 12 mu Mikino Paralempike y’i Beijing, ntiyigeze isubiza ubwo yari isabwe n’Ibiro Ntaramakuru by’Abongereza (Reuters) kugira icyo ivuga ku bihano yafatiwe.

Nubwo Imikino yatangijwe ku mugaragaro ku wa Gatanu hasabwa amahoro muri Ukraine, u Bushinwa na guverinoma yabwo byirinze kunenga u Burusiya ku cyemezo bwafashe.

Imikino Paralempike y'i Beijing iri kuba mu gihe cy'urubura, yatangijwe ku mugaragaro ku wa Gatanu
Abakinnyi b'Abanya-Ukraine biyerekana ubwo hatangizwaga Imikino Paralempike ya Beijing 2022

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .