Abanyarwanda baba muri Kenya bitabiriye imikino itangiza icyumweru cyahariwe Intwari z’igihugu

Yanditswe na Eric Tony Ukurikiyimfura
Kuya 26 Mutarama 2020 saa 08:42
Yasuwe :
0 0

Ambasade y’u Rwanda muri Kenya ifatanyije n’itsinda ry’Abanyarwanda “Ingenzi” rituye muri Kenya ryishyize hamwe mu bijyanye na siporo, bateguye ibikorwa bya siporo bitangiza icyumweru cyahariwe Intwari z’Igihugu byabaye kuri uyu wa Gatandatu tariki ya 25 Mutarama 2020 kuri Marist University i Nairobi.

Ni mu gihe kuri ubu hari kuba icyumweru cyahariwe Intwari z’Igihugu, cyatangijwe ku rwego rw’igihugu kuri uyu wa Gatanu tariki ya 24 Mutarama 2020, gitangizwa n’imikino ngororamubiri na ngororangingo yiganjemo Volleyball, Basketball, Umupira w’Amaguru n’indi mikino itandukanye, aho insanganyamatsiko y’uyu mwaka igira iti “Ubutwari mu Banyarwanda, agaciro kacu”.

Muri Kenya, uyu munsi witabiriwe n’Abanyarwanda n’inshuti z’u Rwanda basaga 150; bakinnye Volleyball, Basketball, Umupira w’amaguru n’imikino gakondo nk’agati no gusiganwa ku maguru metero 100.

Abakinnye bari mu matsinda abiri ariyo Imihigo n’Umuganda yatoranyijwe hahereye kuri bimwe Abanyarwanda bakesha ubuyobozi bwiza.

Uyu munsi kandi wari witabiriwe n’abana ndetse n’urubyiruko rwiga muri kaminuza zitandukanye zo muri Kenya mu rwego rwo kubasangiza ibyiza u Rwanda rukesha intwari zarwo.

Nyuma y’iyi mikino, uhagarariye u Rwanda muri Kenya, Ambasaderi Dr. Richard Masozera, yaganirije abari bitabiriye iyo mikino abashimira ubwitange, umurava n’ubupfura bikomeje kubaranga mu gihugu cy’amahanga.

Yakomeje kandi ababwira bimwe mu biranga Intwari anasaba urubyiruko kubyigiraho no gutera ikirenge mu cy’intwari z’u Rwanda.

Ambasaderi kandi yagejeje ku bari aho ibikorwa biteganyijwe mu cyumweru cyahariwe kuzirikana Intwari z’Igihugu anabasaba kuzitabira ibirori byo kwizihiza umunsi ngarukamwaka wizihizwaho Intwari z’Igihugu uzaba ku itariki ya 1 Gashyantare 2020 ku cyicaro cya Ambasade y’u Rwanda muri Kenya ahitwa Gigiri.

Abanyarwanda baba muri Kenya bitabiriye imikino ngororamubiri na ngororangingo itangiza icyumweru cyahariwe Intwari z’igihugu
Basketball ni umwe mu mikino yitabiriwe n'aba Banyarwanda baba muri Kenya
Hari abakinaga umukino w'intoki wa Volleyball
Umupira w'amaguru na wo wakinwe n'aba Banyarwanda baba muri Kenya
Abitwaye neza bahawe ibikombe
Hatanzwe kandi ubutumwa bushishikariza aba Banyarwanda gutera ikirenge mu cy'Intwari u Rwanda ruzirikana
Ambasaderi w'u Rwanda muri Kenya, Dr. Richard Masozera,ageza ubutumwa kuri aba banyarwanda bari bitabiriye siporo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .