Zinedine Zidane arateganya gusezera ku butoza kubera igitutu cy’akazi

Yanditswe na Eric Tony Ukurikiyimfura
Kuya 30 Kamena 2020 saa 08:23
Yasuwe :
0 0

Umutoza wa Real Madrid, Zinedine Zidane, yemeje ko bitazafata igihe kirekire kugirango asezere ku butoza kuko igitutu cy’akazi kimaze kuba cyinshi.

Ni ku nshuro ya kabiri uyu mutoza w’Umufaransa ari muri Los Blancos nk’uko Real Madrid bayita ndetse ahanganiye igikombe n’abakeba bayo, FC Barcelone. Real Madrid iri ku mwanya wa mbere n’ikinyuranyo cy’amanota abiri mu gihe hasigaye imikino itandatu.

Nubwo yagize ibihe byiza muri iyi kipe cyane mu irushanwa rya UEFA Champions League, Zidane yahishuye ko atazamara igihe kinini muri aka kazi ari gukora ubu.

Ati “Ntabwo nzatoza imyaka 20. Nzasezera mbere yaho.”

“Ndi umutoza udasanzwe, buri kimwe gishobora kuba. Ntacyo mfite muri gahunda zanjye. Buri munsi ku wundi umpa ibyo ngomba gukora. Igihe bizamara, ntabwo nkizi.”

“Mu mutwe wanjye nahoze ndi umukinnyi. Nakinnye imyaka 18 cyangwa 19 nyuma yaho abantu bambajije niba naba umutoza, nababwiye oya.”

“Nyuma nafashe icyemezo cyo kumuba. Gusa ibi birarambirana. Ntabwo nzageza ku myaka 20, ibyo ndabibijeje.”

Real Madrid imaze imyaka itatu idatwara igikombe cya shampiyona ya Espagne nyuma y’uko icyo iheruka n’ubundi yagiheshejwe na Zinedine Zidane mu mwaka w’imikino wa 2016/17.

Zidane n’ikipe ye, bazagaruka mu kibuga ku wa Kane tariki ya 2 Nyakanga bahura na Getafe mu gihe FC Barcelone ikina na Atlético Madrid kuri uyu wa Kabiri.

Uyu mutoza w’imyaka 48, ategerejweho kongera kugeza Real Madrid ku bihe byiza muri UEFA Champions League, ni nyuma yo kwegukana ibikombe bitatu byikurikiranya hagati ya 2015 na 2018.

Mu mukino ubanza wa 1/8 wabaye mbere y’uko irushanwa ry’uyu mwaka risubikwa kubera icyorezo cya Coronavirus, Real Madrid yatsindiwe mu rugo na Manchester City ibitego 2-1. Umukino wo kwishyura uzaba mu ntagiriro za Kanama uyu mwaka.

Zinedine Zidane yahishuye ko ashobora gusezera ku butoza hakiri kare kubera igitutu cy'akazi
Real Madrid yatwaye ibikombe bibiri bya La Liga mu myaka isaga 10 iheruka

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .