Zamalek yegukanye Igikombe kiruta ibindi muri Afurika itsinze Espérance

Yanditswe na Eric Tony Ukurikiyimfura
Kuya 15 Gashyantare 2020 saa 01:05
Yasuwe :
0 0

Zamalek SC yo mu Misiri yaraye yegukanye Igikombe kiruta ibindi muri Afurika “CAF Super Cup” itsinze Espérance Sportive de Tunis yo muri Tunisia ibitego 3-1 mu mukino wabereye kuri Stade Thani Bin Jassim yo muri Qatar ejo hashize ku wa Gatanu.

Iki gikombe gikinirwa n’ikipe yatwaye CAF Champions League (Espérance) ndetse n’iyatwaye CAF Confederation Cup (Zamalek SC) mu mwaka w’imikino wabanje.

Zamalek yayoboye umukino hakiri kare ubwo ku munota wa kabiri gusa Youssef Obama yahinduraga umupira wasanze Mohamed Abdel-Shafy watsinze igitego cya mbere.

Moustafa Mohamed yashoboraga gutsindira Abanya-Misiri igitego cya kabiri ahagana ku munota wa 16, umupira wo hejuru yateye ujya hanze kimwe n’ubundi buryo yabonye ku munota wa 25, umupira uca hejuru y’izamu ryari ririnzwe na Mo’az Ben Sherifia.

Zamalek yabonye uburyo bwo gutsinda igitego cya kabiri ku buryo bwabonye na Zizo, umupira ugarurirwa ku murongo na Chetti habura iminota itanu ngo igice cya mbere kirangire.

Mu gice cya kabiri, Espérance de Tunis yahinduye umukino ndetse ibona penaliti yinjijwe neza na Abdelraouf Bengiut nyuma y’uko ikoranabuhanga rya VAR rigaragaje ko El Wensh yakoze umupira ari mu rubuga rw’amahina.

Nyuma y’imino itatu, Zamalek yongeye kuyobora umukino itsindiwe igitego cya kabiri na Achraf Bencharki wanatsinze ikindi igitego cyashimangiye intsinzi y’Abanya-Misiri ku munota wa gatanu muri itandatu y’inyongera.

Gutsinda uyu mukino byatumye Zamalek SC yegukana Igikombe cya Super Cup ku nshuro ya kane mu gihe icyo yaherukaga yagitwaye mu 2003.

Ikipe yegukanye CAF Super Cup ihabwa ibihumbi 200$ mu gihe iyatsinzwe itwara ibihumbi 150$.

Perezida wa CAF, Ahmad Ahmad, ashyikiriza Igikombe kapiteni wa Zamalek SC, Hazem Emam
Zamalek SC yegukanye CAF Super Cup ku nshuro ya kane

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .