00:00:00 IGIHE NETWORK KN KINYARWANDA EN ENGLISH FR FRANCAIS

Youvia WFC itarabona amikoro ahagije, yabonye abatoza bashya barimo Umunya-Tanzania Baraka Hussein

Yanditswe na Iradukunda Olivier
Kuya 11 Mutarama 2023 saa 10:09
Yasuwe :

Umunya-Tanzania Baraka Hussein wanyuze mu makipe yo mu Cyiciro cya Mbere mu Rwanda nka Etincelles na Musanze FC, yagizwe Umuyobozi wa Siporo muri Youvia WFC ikenera ingengo y’imari y’asaga miliyoni 40 Frw ariko ikabona miliyoni 20 Frw gusa.

Youvia WFC yakandagiye muri Shampiyona y’Icyiciro cya Mbere mu bagore uyu mwaka, yagerageje gushaka abaterankunga bashya bazayifasha kubaho muri iki cyiciro. Nubwo babonetse, ariko haracyari impungenge ko yazasoza iri mu myenda.

Perezida wa Youvia WFC, Marc Ndarama, yavuze ko ubushobozi butunga ikipe ari bwinshi cyane, ariko bitababuza guhangana n’ibibazo ifite ngo bagere ku ntsinzi ikenewe.

Ati “Tukimara kuzamuka twabonye umuterankunga duhuje izina wa Youvia BV wadufashije cyane mu mikino ibanza, twabonye undi ufite ubushobozi bwo kuduha 1% rifite ubushobozi bwo guhemba abakozi bose.”

Yakomeje agira ati “Turi kuganira n’undi witwa Seeders na we uzadufasha. Mu baterankunga tubona byibuze miliyoni 20 Frw ku mwaka, ariko ayo ni 50% y’ayo dukeneye. Abanyamuryango rero twishakamo 25% yayo bigatuma indi 25% iba ideni.”

Yongeyeho ko amakipe y’abagore agifite ikibazo cy’abaterankunga ba Shampiyona kuko biyagora cyane kubaho, cyane ko imikino myinshi akina itishyuza.

Impera z’umwaka wa 2022 kandi zasize Youvia WFC iri ku mwanya mubi ahanini biterwa no kubura umusaruro yari yiteze ku mutoza Ishimwe Patrick wanahagaritswe iminsi 30, ariko bikarangira ahisemo kwegura kuri uyu wa 10 Mutarama 2023.

Ishimwe yasize ikipe ya Youvia WFC iri ku mwanya wa cyenda, ari na yo manota ifite bikaba byarayiganishaga habi kuko irusha inota rimwe iziyikurikiye.

Iyi ni yo mpamvu umutoza mushya wahawe inshingano, Nteziryayo Patrick, yasabwe kuzamura iyi kipe ikava aho iri, byibuze ikazasoreza mu makipe atanu ya mbere.

Nteziryayo wigeze gutoza Indahangarwa WFC, yavuze ko inshingano azazuzuza kuko ibyo yasabwe n’ubuyobozi abishoboye, kandi na we yijejwe guhabwa byinshi mu bisabwa ngo ikipe ibone umusaruro.

Ati “Gahunda ikipe ifite ni ukubanza kuguma mu Cyiciro cya Mbere. Ikindi badusabye ni ugusoza turi mu myanya itanu ya mbere. Ikindi bansabye ni ukugeza ikipe muri ½ cy’Igikombe cy’Amahoro. Byose nizeye ko nzabigeraho.”

Uyu mutoza yahawe amezi atandatu yo kubana n’ikipe mu mikino 11 isigaje ngo isoze shampiyona, ariko ashobora kongerwa mu gihe yagera ku musaruro yasabwe.

Yongeyeho kandi ko ashaka kongera abakinnyi batandatu mu ikipe kugira ngo abashe kugera ku nshingano yahawe. Aba bose ubuyobozi bumaze kubona bane abandi babiri nabo bari gushakwa kugira ngo buzuze abo bakeneye.

Youvia WFC yagize Umuyobozi wa Siporo, Baraka Hussein, wahoze atoza Musanze FC, akaba yarananyuze muri Etincelles FC. Ashimangira ko yahawe inshingano zo kuyobora ibikorwa byose bya siporo mu ikipe no gufasha abatoza.

Ati “Gufata icyemezo cyo kujya muri Youvia WFC, byaje maze kumva gahunda ikipe ifite mu guteza imbere umupira w’amaguru mu batoza. Nzabafasha gahunda zose zirebana n’abatoza.”

Baraka yongeyeho ko umupira w’u Rwanda ugikennye abatoza n’abakurikiranira hafi umupira w’abagore bari ku rwego rwo hejuru. Muri Youvia WFC yiyemeje kuzamura urwego rwayo mu miyoborere.

Perezida wa Youvia WFC, Marc Ndarama, yavuze ko ikipe yari ikiri mu bihe byo kwiyubaka, ari wo mwanya mwiza babonye wo kongera ikipe kuko icyiciro bari bagiyemo cyasabaga ubushobozi bwisumbuyeho.

Ati “Umwanya dusorejeho igice cya mbere cya Shampiyona, twari tuwiteguye. Impamvu ni uko icyiciro cya mbere gisaba ubushobozi kandi ntitwari kwitegurira rimwe. Ubu rero twujuje inzego tugiye gukomeza guhatana.”

Icyiciro cya Mbere muri Shampiyona y’Abagore cyarangiye AS Kigali ari yo iyoboye izindi ifite amanota 33, aho irusha amanota umunani Inyemera WFC iyikurikiye. Kayonza WFC yasoreje ku mwanya wa nyuma n’amanota atatu gusa.

Nteziryayo Patrick ni we wahawe inshingano zo kuzahura Youvia WFC
Nteziryayo Patrick yagizwe Umutoza Mukuru wa Youvia WFC
Baraka Hussein yahawe inshingano zo gukurikirana Ibikorwa bya Siporo muri Youvia WFC
Baraka Hussein wanyuze muri Musanze FC ni we ushinzwe Siporo muri Youvia WFC
Uwizeyimana Clémentine yahembwe nk'umukinnyi witwaye neza mu myaka itanu ishize
Perezida wa Youvia WFC, Marc Ndarama, yasabye abaterankunga gushora imari mu makipe y'abagore

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .