Youri Djorkaeff wakiniye PSG n’u Bufaransa ategerejwe mu Rwanda

Yanditswe na IGIHE
Kuya 28 Gashyantare 2020 saa 08:36
Yasuwe :
0 0

Youri Djorkaeff wakinaga hagati mu makipe atandukanye ku mugabane w’u Burayi na Leta zunze Ubumwe za Amerika ndetse n’ikipe y’Igihugu y’u Bufaransa, ategerejwe mu Rwanda kuri uyu wa Gatandatu tariki 29 Gashyantare 2020.

Ikigo cy’Igihugu gishinzwe Iterambere, RDB, kibinyujije kuri Twitter cyatangaje ko “Ejo u Rwanda ruzakira uwahoze akinira PSG ndetse agatwarana igikombe cy’Isi n’ikipe y’Igihugu y’u Bufaransa, Youri Djorkaeff, mu ruzinduko rw’iminsi ine. Uru ruzinduko ruri muri gahunda y’ubufatanye bwa Visit Rwanda na Paris Saint Germain bwasinywe mu Ukuboza umwaka ushize”.

Youri Raffi Djorkaeff yavutse kuwa 9 Werurwe 1968. Yakiniye amakipe yo mu Bufaransa, u Butaliyani, u Budage, u Bwongereza na Leta zunze Ubumwe za Amerika.

Djorkaeff yatsinze ibitego 28 mu mikino 82 yakinnye mu ikipe y’igihugu y’u Bufaransa hagati ya 1993 na 2002. Yatwaye igikombe cy’Isi mu 1998, atwara igikombe cy’u Burayi (Euro) mu 2000, umwaka ukurikiyeho (2001) atwara igikombe cy’ibihugu kibanziriza icy’Isi, FIFA Confederations Cup.

Yakiniye amakipe arimo; Grenoble, Strasbourg, Monaco, Paris Saint Germain, Inter Milan, Kaiserslauten, Bolton Wanderers, Blackburn Rovers na New York Red Bulls.

Mu Ukuboza umwaka ushize, RDB yatangiye ubufatanye n’ikipe ya Paris St Germain buzamara imyaka itatu bugamije kureshya abashoramari no gukomeza kuba icyerekezo kibereye ubukerarugendo.

RDB yatangaje ko ubu bufatanye buzafasha abakurikira PSG n’isi muri rusange kumenya ubwiza bw’u Rwanda, umuco ndetse n’udushya twaruhangwamo kimwe n’ibicuruzwa bigezweho birukorerwamo, bya ’Made in Rwanda.’

Ubu bufatanye kandi bwitezweho kurushaho gufungurira amarembo abashoramari bo mu Bufaransa no mu bindi bice by’Isi ku buryo babyaza umusaruro amahirwe aboneka mu Rwanda.

U Rwanda rwiteze ko binyuze muri ubu bufatanye, abakinnyi b’ikipe ya PSG n’ibindi byamamare mpuzamahanga, bizabafasha gusura u Rwanda, bakabona ibyiza bitatse igihugu cy’imisozi igihumbi uhereye ku bijyanye n’ubugeni, umuco, siporo, muzika, ubukerarugendo, amafunguro n’ubwiza bw’igihugu muri rusange.

Ibi bihe ntagereranywa bizajya bisangizwa abakurikira PSG ku mbuga nkoranyambaga zayo barenga miliyoni 70 bari hirya no hino ku Isi.

Muri ubu bufatanye, ikirango cya Visit Rwanda kizajya kigaragazwa kuri Stade ya Parc des Princes aho PSG yakirira imikino yayo ndetse no ku mugongo ku myenda iyi kipe ikoresha mu myitozo no mu gihe cyo kwishyushya mbere y’imikino, yaba iyo yambara yasuye indi kipe cyangwa iyo yambara iwayo muri Shampiyona y’u Bufaransa, Ligue 1.

Guhera umwaka utaha w’imikino, ubu bufatanye buteganya ko icyayi cy’u Rwanda n’ikawa aribyo byonyine bizajya bitangwa kuri Parc des Princes.

Hazabaho kandi icyumweru cy’imishinga y’abanyempano b’abanyarwanda n’Abafaransa. Icyo cyumweru cyiswe “Semaine du Rwanda à Paris” kizajya gitegurwa na PSG mu kumenyekanisha ibintu byose bikorerwa mu Rwanda.

Mu bijyanye no kuzamura impano z’u Rwanda, PSG izagira uruhare mu kuzamura abakiri bato binyuze mu gushinga ishuri ry’umupira w’amaguru i Kigali, aho iyi kipe izajya itegura imyitozo y’abatoza n’abakiri bato mu kubafasha kugira ubunararibonye bw’iyi kipe ikomeye mu Burayi, by’umwihariko yanditse amateka mu Bufaransa.

Youri Djorkaeff yakiniye PSG mu 1995–1996
Mu Ukuboza 2019 u Rwanda na PSG basinyanye amasezerano azamara imyaka itatu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza