Watford yanyagiye Liverpool yari imaze imikino 44 idatsindwa

Yanditswe na Eric Tony Ukurikiyimfura
Kuya 1 Werurwe 2020 saa 07:42
Yasuwe :
0 0

Icyizere cyo kuba Liverpool yasoza uyu mwaka w’imikino wa Shampiyona y’u Bwongereza (Premier League) idatsinzwe, cyaraye gishyizweho akadomo na Watford yayitsinze ibitego 3-0 mu mukino wabereye kuri Vicarade Road kuri uyu wa Gatandatu.

Ismaila Sarr yatsinze ibitego bibiri muri uyu mukino mbere y’uko Troy Deeney ashyiramo icya gatatu mu mukino wagarutsweho kurusha iyindi muri uyu mwaka.

Watford yari imbere y’abafana bayo, yabonye uburyo butandukanye mu gice cya mbere, Liverpool itabarwa n’umunyezamu Alisson Becker wakuyemo umupira wa Troy Deeney.

Igitego cya mbere cyo muri uyu mukino w’umunsi wa 28 wa Premier League, cyabonetse ku munota wa 54 gitsinzwe na Ismaila Sarr ku mupira wari uhinduwe na Abdoulaye Doucoule.

Liverpool yaherukaga kugorwa cyane na West Ham, yarushijwe bigaragara no muri uyu mukino ndetse nyuma y’iminota itandatu itsindwa ikindi gitego cya Ismaila Sarr waherejwe na Troy Deeney.

Kapiteni wa Watford, yashimangiye intsinzi ku munota wa 72, ubwo yaherezwaga na Ismaila Sarr, umupira yaterereye ku murongo w’urubuga rw’amahina ukaruhukira mu nshundura.

Gutsindwa uyu mukino ntacyo bihindura ku mahirwe ya Liverpool ku gikombe cya Shampiyona cy’uyu mwaka, aho iyoboye n’amanota 79, ikaba irusha 22 Manchester City ya kabiri mu gihe hasigaye imikino 10.

Liverpool yari imaze imikino 44 ya Shampiyona idatsindwa, kuva muri Mutarama 2019 ubwo yatsindwaga na Manchester City. Arsenal niyo kipe yamaze imikino myinshi ya Shampiyona idatsinzwe (49) mu mateka ya Premier League.

Ni ubwa mbere kandi Liverpool yananiwe gutsinda igitego mu mukino wa Premier League guhera muri Werurwe 2019 ubwo yanganyaga ubusa ku busa na Everton, ikaba yari imaze imikino 36.

Liverpool yari imaze imikino 44 ya Shampiyona idatsindwa, yahagaritswe na Watford
Troy Deeney, Abdoulaye Doucoule na Ismaila Sarr bishimira igitego cya Watford

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza