Uyu mukino wabereye ku Mumena mu gitondo cyo kuri uyu wa Gatatu aho abatoza bombi bakoresheje abakinnyi bose bafite kuko hari abakiri kugeragezwa mbere yo guhabwa amasezerano.

Umuhungu w’Umugaba Mukuru w’Ingabo z’Igihugu, Gen. Mubarakh Muganga, Niyonshuti Hakim Mubarak wari umaze imyaka ine muri APR FC, ni umwe mu bahawe umwanya ku ruhande rwa Vision FC mu gice cya kabiri.

Uyu mukinnyi wo hagati mu kibuga ukina asatira izamu, anyuze ku ruhande, ntarasinyira iyi kipe ari kwitorezamo, ariko ashobora kuyikomerezamo mu gihe Umutoza Calum Shaun Selby yashima urwego rwe.

Ku Mumena, Vision FC ni yo yafunguye amazamu hakiri kare ku gitego cyatsinzwe na Twizerimana Onesme warobye umunyezamu Cuzuzo Aimé Gaël nyuma yo gusiga ba myugariro ba AS Kigali barimo Ishimwe Saleh, Ndayishimiye Thierry na Rwabuhihi Aimé Placide.

Hashize iminota ine amakipe yombi avuye kuruhuka, Rugangazi Prosper wari umaze umwanya muto asimbuye, yatsindiye Vision FC igitego cya kabiri ku mupira wari uturutse mu ruhande rw’iburyo.

Byasabye AS Kigali gutegeza umunota wa 68, ibona igitego cy’impozamarira cyatsinzwe na myugariro Nkubana Marc ku mupira wari uteretse inyuma y’urubuga rw’amahina.

Umwongereza Calum Shaun Selby wigeze gutoza Etincelles FC hagati ya 2020 na 2021, yavuze ko nubwo Vision FC igizwe n’abakinnyi bato “ariko ubushake bwo gutsinda buzatuma igera ku ntego zo kuguma mu Cyiciro cya Mbere.”

Yangeyeho ati “Ndatekereza ko ari Shampiyona igiye gukomera, ubwo ntari ndi gutoza hano narebaga imikino yaho, ugereranyije na nyuma gato ya COVID-19, ubu amakipe ari gushora amafaranga menshi yiyubaka.”

Umutoza wa AS Kigali, Guy Bukasa, yavuze ko azaganira n’itangazamakuru mbere gato yo gutangira Shampiyona kuko amaze igihe gito agarutse mu ikipe ndetse hakaba hari abakinnyi benshi akigerageza ku buryo hari n’abo ashobora gusezerera.

Vision FC izakina umukino wayo wa mbere mu Cyiciro cya Mbere ubwo izaba yakiriwe na Gorilla FC ku wa Kane, tariki ya 15 Kanama kuri Kigali Pelé Stadium.

Ni mu gihe AS Kigali izakirwa na Kiyovu Sports ku Munsi wa Mbere, mu mukino uzabera kuri iki kibuga cy’Umujyi wa Kigali ku wa Gatanu saa Cyenda.

Vision FC na AS Kigali zakinnye umukino wa gicuti wabaye mu gitondo cyo kuri uyu wa Gatatu

Abakapiteni b'amakipe yombi bifotozanya n'abasifuzi

Abakinnyi ba Vision FC babanje mu kibuga

Abakinnyi 11 bitabajwe n'Umutoza Guy Bukasa ku ruhande rwa AS Kigali

Ndekwe Felix ni umwe mu bashya bari muri Vision FC

Ishimwe Saleh agerageza gukurura Twizerimana Onesime watsinze igitego cya mbere cya Vision FC

Twizerimana Onesme yishimira igitego yatsinze mu gice cya mbere

Iyabivuze Osée ni umwe mu bakinnyi babanje mu kibuga ku ruhande rwa AS Kigali

Myugariro Rwabuhihi Aimé Placide atera umupira ubwo yari asatiriwe na Ndekwe Felix

Vision FC yahinduye imyambaro mu gice cya kabiri

Rugangazi Prosper na Nkubana Marc ni bo batsindiye amakipe yombi mu gice cya kabiri

Niyonshuti Hakim Mubarak, umuhungu wa Gen. Mubarakh Muganga ni umwe bifashishijwe ku ruhande rwa Vision FC

Hakim Mubarakh yari amaze imyaka ine akina muri APR FC ndetse ahamagarwa mu Ikipe y'Abatarengeje imyaka 23

Amafoto: Kasiro Claude