Victor Osimhen yegukanye igihembo cy’umukinnyi mwiza w’Umunyafurika muri Shampiyona y’u Bufaransa

Yanditswe na Eric Tony Ukurikiyimfura
Kuya 29 Kamena 2020 saa 12:07
Yasuwe :
0 0

Umunya-Nigeria Victor Osimhen ni we wegukanye igihembo cyitiriwe umunya-Cameroun Marc-Vivien Foé witabye Imana mu 2003 aguye mu kibuga.

Igihembo cyitiriwe Marc-Vivien Foé cyashyizweho na RFI mu 2009 mbere yo gufatanya na France 24 kugitegura mu 2011, gihabwa umukinnyi w’Umunyafurika witwaye neza kurusha abandi mu bakina muri shampiyona y’icyiciro cya mbere mu Bufaransa ‘Ligue 1’.

Ku majwi 284, Umunya-Nigeria Victor Osimhen ukinira Lille LOSC ni we wegukanye icy’uyu mwaka wa 2020 ahigitse Umunya-Algèrie Islam Slimani wa AS Monaco n’umunya-Maroc Yunis Abdelhamid wa Stade de Reims.

Uyu rutahizamu w’imyaka 21 n’amezi atandatu, usimbuye Umunya-Côte d’Ivoire Nicolas Pépé wegukanye iki gihembo mu mwaka ushize, yabaye umukinnyi muto w’Umunyafurika witwaye neza muri Ligue 1.

Ibitego 13 yatsinze mu mwaka ushize w’imikino akanatanga imipira ine yavuyemo ibitego kuri bagenzi be mu mikino 27, byamuhesheje kugira amanota 284 arushije Islam Slimani w’imyaka 32 na Yunis Abdelhamid w’imyaka 32.

Victor Osimhen yabaye umukinnyi wa gatanu wa Lille wegukanye iki gihembo mu nshuro 12 kimaze gutangwamo, nyuma ya Gervinho (2010, 2011), Vincent Enyeama (2014), Sofiane Boufal (2016) na Nicolas Pépé (2019).

Abantu 79 barimo abanyamakuru, abakurikirana umupira cyane n’abahoze ari abakinnyi nibo batoye uhabwa igihembo cy’uyu mwaka wa 2020, aho buri wese yahitagamo abakinnyi batatu. Uwa mbere yahabwaga amanota atanu, uwa kabiri atatu mu gihe uwa gatatu yahabwaga inota rimwe.

Abakinnyi begukanye iki gihembo cyitiriwe Marc-Vivien Foé kuva gitangiye gutangwa:

  • 2009*: Marouane Chamakh (Bordeaux/Maroc)
  • 2010*: Gervinho (Lille/Côte d’Ivoire)
  • 2011 : Gervinho (Lille/Côte d’Ivoire)
  • 2012 : Younès Belhanda (Montpellier/Maroc)
  • 2013 : Pierre-Emerick Aubameyang (Saint-Étienne/Gabon)
  • 2014 : Vincent Enyeama (Lille/Nigeria)
  • 2015 : André Ayew (Marseille/Ghana)
  • 2016 : Sofiane Boufal (Lille/Maroc)
  • 2017 : Jean Michaël Seri (Nice/Côte d’Ivoire)
  • 2018 : Karl Toko Ekambi (Angers SCO/Cameroun)
  • 2019 : Nicolas Pépé (Lille/Côte d’Ivoire)
  • 2020 : Victor Osimhen (Lille/Nigeria)
Victor Osimhen yabaye umukinnyi wa gatanu wa Lille LOSC wegukanye igihembo cyitiriwe Marc-Vivien Foé

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .