Uyu mwaka turashaka guhindura amateka, tugasubiza Abanyarwanda icyubahiro- Niyonzima Haruna

Yanditswe na Eric Tony Ukurikiyimfura
Kuya 12 Ugushyingo 2019 saa 10:37
Yasuwe :
0 0

Kapiteni w’ikipe y’igihugu ‘Amavubi’, Niyonzima Haruna yavuze ko intego we na bagenzi be bajyanye muri Mozmbique ari ukwitwara neza bagashaka itike y’igikombe cya Afurika cya 2021 ndetse yongeye gushimangira ko biyemeje guhindura amateka, bakagarurira ibyishimo Abanyarwanda.

Kugeza mu ntangiriro z’uyu mwaka, Amavubi yari afite umusaruro mubi ariko amaze gukina imikino itandatu yikurikiranya, adatsindwa mu marushanwa atandukanye.

Nyuma yo kugera muri Mozambique, aho Amavubi yagiye kwitegura umukino ubanza wo mu itsinda F ryo gushaka itike ya CAN 2021 izabera muri Cameroun, azakirwamo na Mozambique ku wa Kane, kapiteni wayo, Niyonzima Haruna yavuze ko intego bafite kuri uyu mukino ari ugutsinda cyangwa bakanganya.

Ati“ Intego dufite ntabwo navuga ngo ni kuri uyu mukino gusa, intego dufite ni imwe ni uko twakora ibishoboka tukajya muri CAN ariko nyine bizatangirira kuri uyu mukino. Intego dufite ni uko twawutsinda cyangwa ntituwutsindwe. Tutawutsinze, tugomba kunganya.”

Niyonzima Haruna yavuze ko Mozambique atari ikipe yakabaye itera ubwoba Abanyarwanda nubwo iheruka gutsindira Amavubi i Kigali mu mukino wahuje amakipe yombi muri 2016.

Ati” Mozambique ntabwo ari ikipe ntoya, nta n’ubwo ari ikipe mbi ariko nta nubwo ari ikipe yari ikwiye kudutera ubwoba kuko nubwo iheruka kudutsindira mu rugo ariko natwe twayitsindiye hano igitego kimwe, nari mpari. Nitwitegura neza tukumva ibyo abatoza batubwira, tukabishyira mu bikorwa tuzatsinda.”

Abajijwe niba icyo cyizere abona gihari ndetse koko u Rwnada rushobora kubona itike y’igikombe cya Afurika cya 2021 kizabera muri Cameroun, Niyonzima yavuze ko we na bagenzi biyemeje guhindura amateka mabi bari bafite, bakongera kugarurira ibyishimo Abanyarwanda.

Ati“ Birashoboka, harimo n’akanyamuneza dufite kuko tumaze imikino nk’itandatu tudatsindwa kandi hari n’intego twihaye nagiye mbivugaho ubushize, uyu mwaka ni umwaka dushaka guhindura amateka, dushaka gusubiza Abanyarwanda icyubahiro n’ibyishimo kandi natwe tukishima nk’abakinnyi.”

Nyuma yo kwakirwa na Mozambique ku wa Kane, Amavubi azagaruka i Kigali ku wa Gatanu, yitegure umukino w’umunsi wa kabiri wo mu itsinda F azakiramo Cameroun ku Cyumweru tariki ya 17 Ugushyingo kuri Stade ya Kigali saa 18:00.

Muri iyi mikino y’amatsinda, u Rwanda ruzaba rusabwa kuba urwa mbere cyangwa rukaba urwa kabiri mu gihe Cameroun yaza imbere kuko hazazamuka ikipe imwe mu itsinda F (Cameroun ifite itike).

Kapiteni w'Amavubi, Niyonzima Haruna na murumuna we, Hakizimana Muhadjiri, bari mu bakinnyi 23 b'ikipe y'igihugu yagiye muri Mozambique

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza