00:00:00 IGIHE NETWORK KN KINYARWANDA EN ENGLISH FR FRANCAIS

Uwayezu wari Umunyamabanga Mukuru wa FERWAFA yeguye

Yanditswe na Eric Tony Ukurikiyimfura
Kuya 12 Nzeri 2021 saa 09:58
Yasuwe :
0 0

Uwayezu François Régis wari umaze imyaka itatu ari Umunyamabanga Mukuru w’Ishyirahamwe ry’Umupira w’Amaguru mu Rwanda (FERWAFA), yeguye kuri izo nshingano avuga ko ari ku mpamvu ze bwite.

Uwayezu w’imyaka 38 yari yagiye kuri aka kazi nyuma yo gusimbura Habineza Emmanuel utaragiriwe icyizere na Komite ya Sekamana Jean Damascène.

Gusa, abakunzi benshi b’umupira w’amaguru ntibamuvaga kimwe ndetse benshi bakamushinja ko ari mu badatuma umupira w’u Rwanda utera imbere.

Bimwe mu byagiye bigarukwaho cyane kandi bigashyirwa ku mutwe we harimo isubikwa ry’imwe mu mikino ya Shampiyona n’iya gicuti muri ibi bihe bya COVID-19, kuba yaradashyigikiye ibyo kongerera amasezerano Mashami Vincent utoza Amavubi n’itinda ry’amafaranga FIFA yageneye umupira w’abagore mu bihe bya COVID-19.

Mu ibaruwa yanditse kuri iki Cyumweru, ateguza iminsi 30 izarangira ku wa 12 Ukwakira, Uwayezu yagize ati "Mbandikiye mbamenyesha ko nsezeye ku mwanya w’Umunyamabanga Mukuru wa FERWAFA ku mpamvu zanjye bwite."

Uwayezu ufite impamyabumenyi y’icyiciro cya gatatu cya kaminuza mu masomo y’imari n’ubutegetsi, yageze muri FERWAFA muri Gicurasi 2018. Akazi k’Ubunyamabanga Bukuru yagafatanyaga no kuba Umuvugizi w’iri Shyirahamwe.

Mbere yo kugera muri FERWAFA, yari amaze imyaka irindwi ari Umuyobozi ushinzwe imari n’ubutegetsi mu kigo cy’Inteko Nyarwanda y’Ururimi n’Umuco (RALC ) ndetse yigeze gukora no muri Minisiteri y’Umutekano ikibaho.

Kuva mu 2017, yari ari muri Komisiro ya Siporo ya bose muri Komite Olempike ndetse akaba na Perezida wungirije mu Ishyirahamwe ry’abatoza mu Rwanda. Afite n’impamyabushobozi y’ubutoza ya UEFA Licence B yakuye i Koblenz mu Budage mu 2010.

Mu byo azibukirwaho muri FERWAFA harimo kuba asize hari hafi gushingwa Shampiyona yigenga (League), isubukurwa ry’imirimo yo kubaka hoteli ya FERWAFA yari imaze hafi imyaka itanu yarahagaze, gukemurira ku gihe ibibazo binyuranye byarangawaga muri iri Shyirahamwe n’itangwa mu mucyo ry’amasoko.

Uwayezu François Régis yari amaze imyaka itatu muri FERWAFA

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .