Urutonde rw’amadeni agera kuri miliyoni 788 Frw Rayon Sports ibereyemo abarimo Sadate uheruka kweguzwa

Yanditswe na Eric Tony Ukurikiyimfura
Kuya 25 Nzeri 2020 saa 09:22
Yasuwe :
0 0

Munyakazi Sadate wahoze ayobora Rayon Sports, yagaragaje ko mu madeni agera kuri miliyoni 788 Frw Frw uyu muryango ufitiye abantu n’ibigo bitandukanye, harimo miliyoni 50 Frw ze ku giti cye yayigurije.

Ku wa Kane nibwo habaye umuhango w’ihererekanyabubasha hagati ya Komite yayoborwaga na Munyakazi Sadate n’iya Murenzi Abdallah yashyizweho na RGB mu nzibacyuho y’iminsi 30, kugira ngo ishyire uyu muryango ku murongo mu rwego rw’amategeko n’ikoreshwa ry’umutungo.

Hari amakuru avuga ko mu gihe cy’amezi agera kuri 14 yari amaze ari umuyobozi wa Rayon Sports, Munyakazi Sadate yashyizemo amafarange ye asaga miliyoni 95 Frw.

Hari kandi amakuru IGIHE yamenye ko mbere y’uko haba ihererekanyabubasha, uyu muyobozi yari yanditse asaba ko uyu muhango wasubikwa kugira ngo habanze hanozwe ibibazo by’amadeni ikipe imubereyemo.

Nyuma y’ihererekanyabubasha, yabajijwe n’itangazamakuru uko bizagenda ku mafaranga asaga miliyoni 50 Frw yagaragaje ko Umuryango Rayon Sports umubereyemo.

Munyakazi Sadate yavuze ko kuri ubu icyihutirwa atari umwenda Rayon Sports imubereyemo, ahubwo abayobozi bamusimbuye bakwiye kubanza gushyira ku murongo inshingano bahawe, icyo kibazo kikazashakirwa igisubizo nyuma y’iminsi 30.

Ati “Kuba muri Rayon Sports bisaba ubwitange, ntabwo ari n’amafaranga gusa, bisaba umwanya, hari ibitekerezo, hari ayo mafaranga… Hari uburyo bubiri rero umuyobozi ashobora gutangamo amafaranga iyo amaze kubyemererwa na Komite Nyobozi baba bakorana.”

“Ubwa mbere hari umusanzu umuyobozi ashobora gutanga kugira ngo ikipe ibashe kubaho, ariko n’iyo bibaye ngombwa umuyobozi akora ku mufuka we akaguriza ikipe, nkeka ko ariho werekezaga ikibazo.”

“Ariko numva aka kanya, reka ibyo kwishyuza ndetse n’amafaranga tube tubyihoreye ahubwo iminsi 30 abayobozi babanze barwane nabyo, bashyire ibintu ku murongo, nibimara kujya ku murongo, tuzicara turebe igisubizo cy’ayo mafaranga. Icyo numva ni uko aka kanya batahugira ku mafaranga twabagurije ahubwo bahugira ku by’akazi, abafana ba Rayon Sports n’abakunzi ba siporo babitezeho muri iyi minsi 30.”

Uretse miliyoni 50 Frw aberewemo ku giti cye, hari kandi na miliyoni 10 Frw Umuryango Rayon Sports ubereyemo kompanyi ye ya MK Sky Vision kuva muri Mutarama 2019.

Urutonde rw’abo Rayon Sports ibereyemo amadeni

  1. RRA (2014-2019): 535,000,000 FRW
  2. Musayidire Eugenie (2013): 1,600,000 FRW
  3. Hitimana Thierry (2013): 6,700,000 FRW
  4. RBA (2017): 649,000 FRW
  5. Uwimana Mariam (2016-2019):16,500,000 FRW
  6. Ivan Jacky Minnaert (2018): 5,165$ na 500,000 FRW
  7. Akagera Business Group (Mutarama 2019): 54,100,000 FRW
  8. MK Sky Vision (Mutarama 2019): 10,000,000 FRW
  9. Inter Brands (Ukuboza 2019): 921,000 FRW
  10. Olympic Hotel (Kanama 2019): 1,947,000 FRW
  11. Kelly Abraham (2020): 331,000 FRW
  12. Munyakazi Sadate (2019-2020): 50,512,000 FRW
  13. Nsekera Muhire Jean Paul (2019-2020): 13,800,000 FRW
  14. Rutayisire J Bosco (2020): 1,370,500 FRW
  15. Nisengwe Marie Chantal (2020): 2,000,000 FRW
  16. Cassion Peia Travel Agency (2019): 141,7024 FRW
  17. Bank of Africa (2019): 25,000,000 FRW
  18. Twagirayezu Thadée (2019): 1,014,000 FRW
  19. Amafaranga yaguzwe abakinnyi ntibishyurwe (2019-2020): 27,443,000 FRW
  20. Imishahara ya Kayiranga Baptiste (2020): 11,000,000 FRW
  21. Economat Diocesain de Kibungo (2019): 2,206,800 FRW
  22. KN Sports (Mutarama 2019): 6973$ na1000 ,000 FRW
  23. U&I Travel Agency (2020): 612$
  24. Gatsibo Academy Center (Indezo ya Manishimwe Djabel-2018): 500,000 FRW
  25. Kanamugire Fidèle (Heroes FC, 2020): 3,000,000 FRW
  26. DT amatara ya decoration kuri Rond-point (2019): 921,000 Frw
  27. Matinna (2019-2020): 5,927,800 Frw
  28. B-Life (2020): 600,000 Frw

Mu bafitiye amadeni Rayon Sports ho habarwamo gusa uruganda rwa SKOL ari narwo mufatanyabikorwa mukuru w’iyi kipe, aho bibarwa ko ibafitiye 72, 050, 000 Frw yo mu myaka ya 2019-2021.

Indi nkuru wasoma: Abakozi 55, ibikombe bibiri, amadeni n’imanza mu byo Sadate yashyikirije Komite ya Murenzi Abdallah.

Murenzi Abdallah (ibumoso) na Munyakazi Sadate bafata ifoto nyuma yo guhererekanya ububasha bwo kuyobora Umuryango Rayon Sports
Munyakazi Sadate yavuze ko icyihutirwa atari ukwishyuza amafaranga Rayon Sports imubereyemo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .