Umuyobozi wa Siporo ni umwanya ukenewe mu makipe yacu?

Yanditswe na Reagan Ndayishimiye
Kuya 23 Kanama 2019 saa 10:36
Yasuwe :
0 0

Mu myaka yashize imyubakire y’ubuyobozi bw’amakipe menshi ya ruhago ku mugabane w’u Burayi wasangaga igaragaramo imyanya itatu y’ingenzi ariyo Perezida w’ikipe, Umunyamabanga Mukuru ndetse n’Umutoza mukuru.

Imibereho y’ikipe yabaga ishingiye kuri aba bantu batatu gusa inshingano zabo zabaga zitandukanye.

Tugarutse by’umwihariko ku bakinnyi, wasangaga kubagura no kubagurisha, aba bayobozi batatu twagarutseho bose babihuriraho.

Ku makipe amwe n’amwe wasangaga kugura abakinyi bigirwamo uruhare na Perezida cyane cyane nka Real Madrid na FC Barcelone.

Ubwo Manchester United yatozwaga na Sir Alex Ferguson wasangaga igurwa ry’abakinnyi ari we urifataho icyemezo, uwo ashaka akaza uwo adashaka akagenda.

Imikorere nk’iyi yagiye itanga umusaruro ku makipe mu bihe byashize kandi ni mu gihe kuko abatoza barambaga mu makipe imyaka myinshi ku buryo kubakira ikipe y’igihe kirambye ku mutoza byabaga ari inzira nyayo, ingero ni iza Sir Alex Ferguson na Arsène Wenger.

Kuramba kw’abatoza mu makipe muri iki gihe biragoye kuko uwitwaye neza mu yo arimo usanga agurwa n’ikipe yisumbuye ku yo yatozaga kandi n’umutoza uri mu ikipe yisumbuye iyo atsinzwe ntagere ku ntego (gutwara ibikombe) kwihanganirwa ntibikunze kubaho abenshi bahita birukanwa.

Uku kutaramba mu makipe kw’abatoza byatumye amakipe menshi ahindura uburyo bwayo bw’imiyoborere maze niko kongeramo Umuyobozi wa siporo (Directeur Sportif) mu buyobozi bwayo bityo umutoza akaba uwo gutoza cyangwa se abazwa umusaruro wo mu kibuga, ibijyanjye no kugura cyangwa kugurisha abakinnyi no kubakirwaho uruhererekane rw’ahazaza h’ikipe bihabwa Umuyobozi wa siporo.

Ese umwanya w’Umuyobozi wa Siporo washyizweho kubera iki?

Nk’uko bizwi abatoza benshi iyo bagiye mu makipe bayasaba kubagurira abakinnyi runaka bakaza basanga abari bahari, bamara kuba benshi imishahara yabo ikagora amakipe maze mu rwego rwo gukemura icyo kibazo ikipe ihitamo kugabanya igiciro ku bakinnyi bamwe bari bahasanzwe ikabagurisha abandi ikabarekura nta n’urumiya ibabonyeho.

Ikibabaje wa mutoza mushya waje mu ikipe akagurirwa abakinnyi benshi bahenze iyo abashyize mu kibuga umusaruro ukabura abafana barigumura bagasaba ko yirukanwa. Ubuyobozi buramwirukana, undi mutoza mushya uje na we aza asaba abakinnyi bashya!

Impinduka za hato na hato z’abatoza bashya n’abakinnyi bashya buri mwaka zateje amakipe menshi igihombo gikomeye niko kugana amabanki zifata imyenda yishyurwa hongeweho inyungu.

Mu rwego rwo kugabanya iki gihombo ni imwe mu mpamvu zatumye hashyirwaho Umuyobozi wa siporo akaba ariwe ugura abakinnyi kuko abona ari ngombwa, umutoza mushya mbere yo guhabwa akazi akerekwa abahari akanabwirwa abo azongererwamo ku buryo bwateguwe budatunguye ikipe ngo buyiteze igihombo. Kugura no kugurisha byabaye akazi k’Umuyobozi wa siporo.

Ikipe z’abakiri bato zafatwaga nk’izidafite icyo zimaze kuko wasangaga amakipe akomeye adakoresha benshi mu bana yirereye, ibi byavaga ahanini mu kuba ihindagurika ry’abatoza rizana n’izindi mpinduka mu mikinire y’ikipe (Style of play).

Mu busanzwe ikipe zigira umuco w’imikinire yazo usanga byanabaye nk’imwe mu biranga ikipe A bikayitandukanya n’ikipe B.

Iki kibazo cy’abasore bato bahindagurirwaho uburyo bw’imikinire cyavugutiwe umuti maze Umuyobozi wa siporo ahabwa inshingano zo kwereka umutoza mushya uburyo bw’imikinire bw’ikipe ndetse no kumufasha kuzamura abakiri bato bakisanga mu ikipe nkuru bagakina, bigakunda kuko uburyo bakinaga mu makipe y’abato ni nako basanga bikorwa mu ikipe nkuru.

Umuyobozi wa siporo ahagarariye igura n’igurishwa ry’abakinnyi, guhitamo umutoza mushya uhuje n’uburyo ikipe isanzwe ikinamo. Ibi biyirinda guhora ihindagura politike bijyanye n’ihindagurika ry’abatozi.

Umuyobozi wa siporo aba afite ubumenyi bw’ibanze ku mupira ndetse n’ubukungu ku buryo aba ariwe uyobora umutoza mu buryo bwo kumwereka icyo ikipe ishaka aho uwo asimbuye yagejeje kugira ngo akomerezeho cyangwa se akamwereka bimwe mu byagoye uwo asimbuye bakaba bafatanya kubishakira igisubizo byaba ari ukugura abakinnyi runaka cyangwa kwifashisha abo bafite mu makipe yabo mato ariko byose bigakorwa wa murongo uhoraho w’ikipe udatandukiriwe.

Umutoza asimbura undi aje gukomerezaho, ntabwo umutoza mushya aza aje gusenya ngo ikipe itangirire kuri zero. Umuyobozi wa siporo ni we ugena politiki ya siporo y’ikipe hanyuma umutoza akaba ushyira iyo politike mu bikorwa, gusa bikorwa mu buryo bombi buzuzanya buri wese akamenya inshingano ze.

Ese ni abahe bayobozi ba Siporo bakomeye, ibyo bakoze n’amakipe bakorera?

1. Raul Sanllehi, Umuyobozi ushinzwe ibikorwa bya Siporo muri Arsenal FC

Yize ibijyanye n’ubukungu, icungamari ndetse no kwamamaza, akaba yaranakoze imyaka 10 mu ruganda rwa Nike. Mu gihe gito amaze muri Arsenal amaze kugira uruhare mu kuzana abakinnyi nka Dani Ceballos , Nicholas Pépé, Kieran Tierny ndetse na David Luis.

Uyu mugabo azwiho kuba umuhanga mu biganiro byo kugura abakinnyi kuko ni akazi yanakoze muri FC Barcelone.

Raul Sanllehi, ni Umuyobozi wa Siporo muri Arsenal FC (ibumoso) hamwe n'Umutoza Unai Emery

2. Michael Zorc

Benshi bemeza ko ari we Muyobozi wa Siporo wa mbere ku Isi muri ruhago.

Yabaye umukinnyi wa Borussia Dortumund imyaka 17 nyuma aza kugirwa Umuyobozi wa Siporo muri iyi kipe.

Kuva mu 1998 afashe uyu mwanya muri iyi kipe, Borussia Dortumund yatwaye Shampiyona y’u Budage inshuro eshatu ndetse igera no ku mukino wa nyuma wa UEFA Champions League, ibi byose byagezweho ku kiguzi kiri hasi cyane.

Michael Zorc afatwa nk’ishyiga ry’inyuma muri Borussia Dortumund kuko ni we washyizeho umurongo ngenderwaho w’umukino wayo kuva mu makipe y’abato kugeza ku ikipe nkuru (ubu buryo bwo gukina mu buryo bumwe butuma abasore bazamuwe mu ikipe nkuru biborohera gukina neza byihuse kuko ni bwo baba baratojwemo kuva bakiri bato).

Uyu mugabo ni we uhitamo abatoza ba Borussia Dortumund ashingiye cyane ku buryo bwabo bw’imikinire buba buhuje n’ubwo ikipe ye isanzwe ikinamo. Zorc ni na we kandi ugura abakinnyi ba Dortumund.

Uretse kuba Dortumund izamura abasore benshi b’abahanga mu ishuri ryayo ry’umupira, izwiho no kugura abakiri bato b’abahanga .

Mu ikipe bafite uyu mwaka birereye Mario Götze (bagaruye bamukuye muri Bayern Munich) na Jacob Bruum Larsen mu gihe Lucasz Piszczek, Mahmoud Dshoud, Julien Weighl, Marco Reus na Jadon Sancho baguzwe bakiri bato cyane ku kiguzi kiri hasi cyane.

3. Pep Guardiola ni umutoza ukomeye cyane, umwe mu beza ba mbere Isi ifite gusa avuga ko ibyo ageraho abikesha umwe mu bagabo ufatwa nk’ukuboko kwe kw’iburyo ari we Muyobozi wa Siporo Txiki Begiristain.

Aba bombi bakoranye muri FC Barcelone yaciye ibintu bafatanya kuyubaka no kuyihesha ibikombe ndetse ubu barakorana muri Manchester City.

Ni ikipe bubatse neza irakomera mu gihe gito, ikina umukino mwiza, itwara ibikombe ariko icyo Txiki ashimirwa cyane ni uko ari we ushaka abakinnyi beza kandi bakiri bato hanyuma akanicarana na Pep Guardiola bakemeza uwo bagura.

Amakipe ari gutwara ibikombe muri iyi myaka amenshi ni amaze kongera Umuyobozi wa Siporo mu buyobozi bwayo nka Liverpool, FC Barcelone, Manchester City, Bayern Muninch n’andi.

Haba hari ikipe bigaragara ko ikeneye Umuyobozi wa Siporo?

Mu gihe usanga abenshi banenga Manchester United ko ishora amafaranga menshi mu kugura abakinnyi ariko ntibashe gutwara ibikombe, bamwe bemeza ko biterwa no kuba ugura abakinnyi muri iyi kipe, Umuyobozi ushinzwe ibikorwa, Ed Woodward ari umuhanga mu by’ubukungu kurenza kumenya ubwiza bw’abakinnyi yagura.

Iki kibazo cyo kudatwara ibikombe kandi ikipe yaguze abakinnyi benshi bahenze gituma iyi kipe isigaye isezerera abatoza cyane ibashinja umusaruro muke.

Ababikurikiranira hafi bavuga ko kuba nta muntu w’impuguke mu kugura abakinnyi ndetse no gushyiraho umurongo ngenderwaho w’ikipe mu bijyanye n’imikinire ariyo ntandaro yo kutitwara neza bityo bakemeza ko icyakemura ibyo byose ari ugushyiraho Umuyobozi wa Siporo.

Byaravuzwe cyane ko azashyirwaho gusa n’ubu ntibiraba, aho uwo benshi bemeza ko yabikora neza ari Edwin Van Der Sar wabaye umunyezamu ukomeye muri iyi kipe.

Edwin van der Sar ashobora kugirwa Umuyobozi wa Siporo muri Manchester United yabereye umunyezamu

Amakipe yo mu Rwanda yaba akeneye Umuyobozi wa Siporo?

Imwe mu mbogamizi ituma amakipe yacu mu Rwanda adatera imbere bituruka ku cyuho kiri mu buyobozi bw’ayo makipe.

Imwe mu myanya usanga idahabwa agaciro cyane ni iy’abantu bafata ibyemezo biri tekiniki, aho usanga abayobora amakipe bakunze kuba ari abahanga cyangwa se impuguke mu yindi mirimo idafite aho ihuriye na ruhago , ariko ugasanga ni nabo bafata ibyemezo biri tekiniki byerekeranye n’amakipe bayobora nko kugura abakinnyi, gushyiraho abatoza n’ibindi.

Ibyemezo byinshi usanga bifatwa na Perezida w’ikipe ndetse n’Umunyamabanga Mukuru mu by’ukuri ugasanga ibyo bazobereyemo bidafite aho bihuriye n’umupira w’amaguru.

Iki ni cyo kibazo nyamukuru kidindiza iterambere ry’amakipe yacu mu Rwanda, aho uwagikemura agaha abatekinisiye muri ruhago umwanya mu byemezo bifatwa byaba ari intambwe nini yaba itewe mu iterambere ry’amakipe yacu.

Umuyobozi wa Siporo yaba igisubizo gikomeye mu makipe yacu hano mu Rwanda dukurikijre umumaro wigaragaza ndetse n’impinduka nziza tubona mu makipe yamaze guha akazi bene aba bantu.

Impinduka za hato na hato z’abatoza, kutagira umurongo uhoraho w’aho ikipe yerekeza, kutagira amakipe y’abato , ihuzagurika ryigaragaza mu migurire y’abakinnyi bamwe bakaza nta n’amakuru ahagije ikipe ibafiteho nyuma y’igihe gito akisanga mu gihombo cyo kubarekura batatanze umusaruro uhagije, abandi bakarekurwa kubera ko abatoza babazanye na bo basezerewe, cyangwa umuyobozi wamuguze atakiri ku ntebe.

Ibi byose bituma mu makipe yacu hataba uruhererekane rwiza rwafasha mu iterambere ry’amakipe yacu uwabivugutira umuti yaha akazi Umuyoboziwa Siporo ubishoboye akanamwegurira inshingano kandi ntiyivange mu kazi ke.

Ababishinzwe bakwiye kubitekerezaho, bagakora impinduka mu buyobozi bw’amakipe yabo.

Umupira wacu ukeneye ko abawufiteho ubumenyi bahabwa agaciro bagakora akazi kabo, kutabaha imirimo ni igihombo cy’igihe kirambye naho kubaha umwanya n’imirimo ni ukunguka mu buryo burambye.

Ndayishimiye Rugaju Reagan, ni Umunyamakuru wa Radio 1.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza