Umutoza wa APR FC yashinje Sugira kwiyumva kandi ari ku rwego rwo hasi

Yanditswe na Eric Tony Ukurikiyimfura
Kuya 23 Ukwakira 2019 saa 07:15
Yasuwe :
0 0

Umunya-Maroc Adil Mohammed Erradi utoza APR FC yavuze ko zimwe mu mpamvu zatumye Sugira Ernest amaze iminsi atitabazwa mu busatirizi bw’iyi kipe harimo kuba abakinnyi bakinana bamurusha nubwo we yumva ko kuba atsinda mu ikipe y’igihugu bimugira umukinnyi ukomeye ufite umwanya uhoraho mu ikipe y’ingabo.

Sugira Ernest yahagaritswe ku wa Mbere nyuma y’amagambo yatangaje ko yisanga cyane mu ikipe y’igihugu ndetse ko muri APR FC bamusaba gukina agaruka inyuma gato mu kibuga hagati bigatuma atabona uburyo bwinshi bwo gutsinda.

Mu kiganiro yahaye itangazamakuru nyuma y’umukino APR FC yari imaze gutsindamo Marines FC ibitego 2-1 kuri uyu wa Kabiri, umutoza Adil Mohammed Erradi, yavuze ko impamvu atitabaza Sugira riko kugeza ubu afite Usengimana Danny n’abandi bakinnyi bagaragaje ko bakwiye gukina.

Ati“ Ngiye kubabwira ukuri yego, ukuri kurigaragaza. Icya mbere mbona ari ukudutesha icyubahiro kumbwira kubanza mu kibuga Sugira. Icya mbere ni uko mfite rutahizamu utsinda ibitego bine mu mikino ine ya shampiyona. Kuri ubu mfite Danny utsinda ibitego bine. Uyu munsi nazanye undi rutahizamu ampesha penaliti mu gice cya kabiri yatumye dutsinda bityo mba numva ari ugusuzugura ikipe, abakinnyi, ba rutahizamu bannjye.”

“Mfite Danny, mfite Nshuti, Yves, mfite Lague ukina imyanya itandukanye, nkagira Djuma na we ukina imyanya myinshi. Si Sugira wenyine uri mu ikipe dufite abakinnyi 24”.

Adil Erradi yavuze ko ubwo yageraga muri APR FC muri Kanama, yafashe Sugira akamugirira icyizere, akamuha umwanya ubanza mu mikino ya gisirikare aho yatsinze ibitego bine byatumye yongera guhamagarwa mu ikipe y’igihugu.

Ati “APR ni ikigo, bafite ubuyobozi hari byinshi bashoye muri Sugira,.. ndaje mbwiye Sugira nti umeze neza? Ati yego. Nti rero imikino ya gisirikare ni wowe uzabanzamo ariko ugomba gukora cyane rero ugakorera ku gihe. Twakoranye na Sugira atsinda ibitego bine birangira ahamagawe mu ikipe y’igihugu. Kubera nde? Kubera abayobozi ba APR, abafana ba APR, n’abatoza ba APR. Kubera ko nkimara kubona CECAFA Kagame Cup, hari gahunda yihariye naje guha Sugira nshishije muri Dr Nabil unyungirije, atakaza ibiro, yongera ingufu birangira atsinze ibitego mu mikino nyafurika.”

Uyu mutoza wa APR FC w’imyaka 40, yashinje Sugira Ernest kuba ari ku rwego rwo hasi, aho mu mukino wa Shampiyona aheruka gukiniramo APR FC, yapfushije ubusa uburyo 12 burimo na penaliti yahushije byongeye akagongana na Mutsinzi Ange kuri ubu utaragaruka mu kibuga kubera ikibazo yagize.

Ati“ Nko ku mukino wa AS Kigali urashaka ko nkubarira ibyo yakoreyemo? Imvune ya Ange (bakubitanye imitwe)...mu bijyanye no kugaragara yanze kumvira umutoza na bagenzi be, afashe penaliti ntayitsinze, namweretse mu mashusho uburyo 12 atatsinze. Imibare ya GPS (igaragaza uburyo abakinnyi bakora mu kibuga) yari munsi y’abandi bakinnyi bose bari mu kibuga ku kigero cya 50%. Nshuti ntabwo ndi hano gushimisha Sugira cyangwa undi wese. Ndi hariya gushimisha ubuyobozi, akazi kacu ni ugukina tugatsinda imikino, tugakora cyane. Si ubucuti.”

Adil yemeje ko impamvu uyu mukinnyi atongeye kwitabazwa mu mikino ya APR FC mbere y’uko ahagarikwa mu gihe kitazwi, ari ukugira ngo yongere yitekerezo, amenye ko agomba guhanganira umwanya.

Ati” Icya kane, Sugira, ntabwo twamuhamagaye mu mukino ukurikiye kugira ngo yihangane amenye ko iwacu umwanya umuntu awuharanira, urahenze bisaba gukora nshuti kubera ko aha haba hari abafana baba baje kureba umukino, baturutse kure, hari abayobozi baba barashoyemo , hari ruhago nyarwanda iba itegereje abakinnyi beza mu ikipe bakina mu ikipe y’igihugu, hari ikipe iba igomba gukora ibishoboka ngo ikine Champions League, hari abakinnyi bo kubaha, ok?

“Sugira ntabwo yakinnye, haza umukinnyi mwiza aratsinda, ku mukino wa As Kigali twinjijemo Yves ahindura ibintu, bivuze ko amurusha, Danny aramurusha, Nshuti yitwaye neza uyu munsi… umwanya wa Sugira uri he?”

Sugira Ernest w’imyaka 28, yakiniye APR FC bwa mbere mu mwaka w’imikino wa 2013/14 ubwo yari avuye muri AS Muhanga, ariko nyuma yo kudahirwa yerekeza muri AS Kigali.

Yagarutse muri iyi kipe y’ingabo muri Kanama 2017 amaze gutandukana na AS Vita Club, ahita agira imvune yatumye amara umwaka urenga adakina.

Kuva agarutse mu kibuga hagati mu mwaka ushize w’imikino, amaze gutsindira APR FC ibitego bibiri mu marushanwa abiri yemewe ategurwa na FERWAFA.

Mu mikino ine ya Shampiyona APR FC imaze gukina uyu mwaka, yitabajwe ku munsi wa mbere (ku mukino wa AS Kigali), asimburwa na Mugunga Yves mu gice cya kabiri.

Adil Mohammed Erradi utoza APR FC yashinje Sugira Ernest kwiyumva kandi adakora cyane ngo agaragaze ko akwiye umwanya wo gukina
Adil Erradi yashimangiye ko atari muri APR FC kugira ngo ashimishe Sugira kuko afite abandi bakinnyi bashobora gutsinda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza