00:00:00 IGIHE NETWORK KN KINYARWANDA EN ENGLISH FR FRANCAIS

Umutoza Gatera Moussa yavuze ku majwi yumvikanyemo asaba ‘komisiyo yo gufasha amakipe kugura imikino’

Yanditswe na Bukuru JC
Kuya 7 Ukuboza 2022 saa 02:49
Yasuwe :

Nta munsi w’ubusa muri ruhago y’u Rwanda ushira hatavuzwe inkuru y’uburyo hakorwa amanyanga mu gushaka intsinzi mu nzira zose zaba iziboneye n’izindi zitandukanye.

Inkuru ya bugufi ni iyubakiye ku majwi yakwirakwijwe yumvikanamo Umutoza wa Gorilla FC, Gatera Moussa, aganira n’undi muntu [IGIHE yamenye ko ari umufana wa Espoir FC] amubwira ko KNC [Perezida wa Gasogi United] ngo yishyuye miliyoni 1 Frw kugira ngo atsinde Kiyovu Sports [umukino warangiye ari ibitego 3-1], Espoir FC isabwa ibihumbi 500 Frw ngo itsinde Sunrise FC na AS Kigali irabibura.

Aya majwi yumvikanye kuri Fine FM ku wa 6 Ukuboza mu gihe Gorilla FC yitegura gucakirana na Rayon Sports mu mukino uteganyijwe ku mugoroba wo kuri uyu wa Gatatu, tariki ya 7 Ukuboza 2022.

Bamwe mu bayobozi ba Gorilla FC n’abakunzi bayo bahuje amajwi yatangajwe no kubica mu mutwe mu gihe bategura umukino kuko uburyo bazi Rayon Sports “yasohora n’ikitari kiriya.’’

Umutoza wa Gorilla FC, Gatera Moussa, mu kiganiro na IGIHE na we yashimangiye ko amajwi yatangajwe hagamijwe kumukura mu mukino wa Rayon Sports.

Yavuze ko amajwi yagiye hanze akubiyemo ibyo yaganiriye n’umwe mu bantu b’i Rusizi mu gihe cyashize, bityo kuba yabizanye ku munsi ubanziriza umukino wa Rayon Sports ari ugushaka kwica Gorilla FC mu mutwe ngo itsindwe.

Yagize ati “Urabona biriya bintu twabiganiriye n’umuntu w’i Rusizi hashize ibyumweru bibiri. Ni ikiganiro ugirana n’umuntu musanzwe muganira ku migendekere y’umupira w’amaguru. Kuba abizanye ubu buri buke dukina na Rayon Sports ni icyerekana ko icyo agambiriye nta kindi ari ukudukura mu mukino ngo tuwutakaze.’’

Yakomeje avuga ko “nta byinshi nabivugaho byagiye hanze. Uyu munsi biravugwa ejo biraba byarangiye ubuzima bukomeze.’’

  Espoir FC yavuze ku majwi yatangajwe na Gatera Moussa

IGIHE yamenye ko amajwi yumvikanamo Gatera Moussa asaba komisiyo ngo afashe Espoir FC gutsinda imikino yashyizwe hanze n’umufana ukomeye w’iyi kipe y’i Rusizi witwa Hitayezu Daniel usanzwe akora akazi k’ubumotari.

Yabikoze agamije kwereka abayobozi ba Espoir FC ibyo umutoza Gatera Moussa abasaba mu gushaka intsinzi ku mikino ya Rwamagana City FC na Sunrise FC. Uko ni uko amajwi yakomeje guhererekanywa ku rubuga rwa WhatsApp kugeza ageze hanze y’ikipe.

Gatera yumvikana avuga ko igituma Espoir FC itabona intsinzi muri uyu mwaka w’imikino ari ukudategura imikino yayo.

Avuga ko yasobanuriye neza Perezida n’Umunyamabanga ba Espoir FC uburyo muri shampiyona bikorwa aho hari utuntu twa ‘maguyi’ ugomba kunyuramo kugira ngo ikipe itsinde.

Yagize ati “Mwebwe mushake amafaranga nzabafasha gutsinda imikino ibiri yikurikiranya, mushake ibihumbi 500 [Frw].’’

“Umukino w’ejo bundi wa Sunrise FC, ikurikiyeho si AS Kigali? AS Kigali ni yo mwabona (inota) rimwe ni i Kigali ariko iya mbere ni iya Sunrise (Sunrise yatsinze Espoir FC 2-0) atatu ewana njyewe nzayajyamo nanjye.”

Yakomeje atanga ingero z’andi makipe yafashije kubona intsinzi kandi bigakunda.

Ati “Ni yo mpamvu uri kubona za Rayon Sports zitari kongera gutsinda, wenda nshobora kukubwira ko KNC yatsinze Kiyovu Sports naramufashije, wenyine yatanze miliyoni 1 Frw kugira ngo atsinde kuko bari bamubwiye amagambo menshi.”

Yanenze Perezida wa Espoir FC, Twizeyimana Vincent, ko atajya ategura imikino aciye mu gutanga ruswa cyangwa amarozi ari na yo ntandaro y’umusaruro nkene wa Espoir FC muri uyu mwaka w’imikino.

Yagize ati “Hari abantu basohora amafaranga yabo ariko abo ni ukwitwa ba Perezida kandi navuye aho uwo mu Perezida (Twizeyimana Vincent) mubwiye ari kumwe n’umunyamabanga (Habimana François). Umupira w’amaguru urimo ibintu byinshi, urimo umwanda mwinshi, ntiwibaze ngo (ikipe) uzayiyobora nk’uyobora kompanyi yawe mu buryo bwo kuyishyira ku murongo. Niba ushaka intsinzi hari utuntu twinshi two ku ruhande twa maguyi tugufasha kubona intsinzi.’’

Perezida wa Espoir FC, Twizeyimana Vincent, yabwiye IGIHE ko ibyo Gatera Moussa avuga yabisanze mu ikipe umwaka ushize w’imikino ujya kurangira ariko atabyemera.

Yagize ati “Ibyo Gatera avuga ni byo, komite icyuye igihe yabivuze kenshi ko habagamo ibyo bintu mu ikipe cyane cyane umutoza wasabaga amafaranga yo gutegura umukino harimo amarozi n’ibindi. Twe twaje tuje guhindura ikipe haba mu bijyanye n’icungamutungo n’ibyo by’amafaranga yatangwaga muri ubwo buryo nabyo birimo."

"Espoir FC ni imwe mu makipe afata neza abakinnyi bayo hano mu cyiciro cya mbere muri Shampiyona y’u Rwanda uretse APR FC na Police FC ndakeka tuza ku mwanya wa gatatu."

"Ntiwakumva ikirarane cy’amafaranga yaguzwe umukinnyi cyangwa umushahara w’ukwezi tutaramuhemba, uduhimbazamusyi tuzira ku gihe, abakinnyi iyo bagiye gukina umukino w’i Rusizi bajya muri hoteli iminsi ibiri mbere n’ikindi kibazo cyose gisaba amafaranga tugikemura vuba na bwangu."

Yavuze ko we nka Perezida ibindi byo gutegura bitandukanye no gufata neza abakinnyi “atabyemera”.

Gatera Moussa yinjiye muri Gorilla FC nyuma yo gutandukana na Espoir FC mu mpera za shampiyona y’umwaka ushize. Yageze muri Espoir FC muri Kamena 2020, ayifasha kuba iya gatatu mu mwaka wa mbere.

Yatoje amakipe arimo Sunrise FC, Isonga FC na Rayon Sports FC nk’umwungiriza kimwe no mu Ikipe y’Igihugu y’Ingimbi (U17) ndetse yanabaye Umutoza Mukuru wa Gasogi United ikiri mu Cyiciro cya Kabiri.

Umutoza wa Gorilla FC, Gatera Moussa, yavuze ko uwashyize hanze amajwi yumvikanyemo asaba ‘komisiyo y'amafaranga yo gufasha Espoir FC kuyitegurira umukino', yari agamije kubica mu mutwe mu gihe bitegura guhura na Rayon Sports

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .