Umushinga wa hoteli y’inyenyeri enye ya FERWAFA ushobora guhagarikwa burundu

Yanditswe na Manzi Rema Jules
Kuya 18 Kanama 2018 saa 09:32
Yasuwe :
0 0

Perezida w’Ishyirahamwe ry’Umupira w’Amaguru mu Rwanda, FERWAFA, (Rtd) Brig Gen Sekamana Jean Damascène, yatangaje ko hari gutekerezwa niba umushinga waryo wo kubaka hoteli y’inyenyeri enye wahagarikwa, amafaranga yagenewe agashyirwa mu bikorwa biteza imbere ruhago mu gihugu.

Imirimo yo kubaka iyi hoteli yatangiye muri Kanama 2015, biteganyijwe ko izuzura mu mpera za 2016 itwaye miliyari 4 Frw.

Yari yitezweho gucumbikira amakipe y’igihugu n’abandi bantu basanzwe, ariko yaje guhagarara muri Gashyantare 2016 nyuma y’itahurwa ry’amanyanga mu gutanga isoko ryo kuyubaka, ndetse bamwe mu bari abayobozi muri Ferwafa barafungwa.

Byiyongeraho ko n’abaterankunga batahise batanga amafaranga akenewe, ndetse FIFA bari bizeye yemeye gushyiraho amafaranga ari uko hoteli yenda kuzura.

Gen Sekamana umaze hafi amezi atanu asimbuye Nzamwita Vincent de Gaulle watangije uwo mushinga wa hoteli, kuri uyu wa Gatanu tariki 17 Kanama yabwiye abanyamakuru ko nyuma yo gusanga nta kintu gifatika izamarira iterambere ry’umupira w’amaguru, batekereza kuyireka burundu.

Yagize ati “Dusigaye dutekereza icyo twahitamo hagati yo kuyikomeza no kutayikomeza. Icyo mbishingiraho, nahuye n’abantu ba FIFA mu Gikombe cy’Isi turaganira, barambaza ngo ariko iriya hoteli murabona muzayikomeza? Ndababwira nti ibyo ni ibintu byo gutekerezaho neza tukareba igikwiye.”

Yavuze ko hari n’intumwa za FIFA ziheruka mu Rwanda mu gusuzuma ibiri gukorwa, zabwiye Ferwafa ko iyi hoteli izayigusha mu gihombo gikomeye.

Ati “Narababajije nti ariko ko amafaranga ya FIFA aza [muri Ferwafa] agomba gushorwa mu kuzamura umupira noneho ahubwo ibivuye muri iryo terambere akaba ari byo washora mu bindi bikorwa, byagenze gute kugira ngo mwemere ko abantu bubaka hoteli ngo abe ariyo izazamura umupira? Murumva ko bicuritse. Baransubiza bati ‘ariko ni mwe mwabisabye’.”

Yavuze ko bitewe nuko yumva iterambere rikenewe ari iry’umupira ukaba ariwo wazabyara ibindi, kubaka iyi hoteli bishobora guhagarara cyane ko n’amafaranga yo kuyikomeza Ferwafa ntayo irabona.

Yakomeje agira ati “Amafaranga twari twaremerewe na Maroc yo kuyubaka, yarifashe, yatubwiye ko izatangira kubitekerezaho muri Nzeri, naho FIFA yo ivuga ko mu gihe twaba tutarubaka nibura kugera kuri 75% nta mafaranga yaduha kandi ntidushobora gufata ideni kuko hashobora kuzagurishwa ibintu birimo amafaranga ya FIFA kandi ibyo ntibibaho. Ni ikibazo kitoroshye.”

Iyi hoteli y’inyenyeri 4 yagombaga kuba ifite ibyumba 88 n’ubushobozi bwo kwakira amakipe atatu y’ibihugu icyarimwe, ikaba yari kuzajya inakoreshwa mu bikorwa bigamije kwinjiza amafanga bifite aho bihuriye n’umupira w’amaguru.

Igishushanyo mbonera cya Hotel ya Ferwafa
Biteganyijwe ko iyi hotel izajya icumbikira amakipe y'igihugu
Perezida wa FIFA Gianni Infantino ni we washyize ibuye ry'ifatizo ahubakwa iyi hoteli
Iyi hoteli yari igeze kure yubakwa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza