Umushinga wa European Super League watesheje umutwe FIFA na UEFA uteye gute?

Yanditswe na Eric Tony Ukurikiyimfura
Kuya 23 Mutarama 2021 saa 04:25
Yasuwe :
0 0

Ku wa Kane w’iki cyumweru, Ishyirahamwe ry’Umupira w’Amaguru ku Isi (FIFA) ku bufatanye n’impuzamashyirahamwe y’uyu mukino ku migabane itandatu, byamaganye ishyirwaho ry’irushanwa rya European Super League ryahurirwamo n’amakipe 20 akomeye i Burayi.

Mu itangazo ryashyizwe hanze n’ibi bigo biyobora umupira w’amaguru ku Isi, byavuze ko “Umukinnyi uzagagara mu irushanwa nk’iri azajya ahagarikwa.”

Impamvu FIFA n’izi mpuzamashyirahamwe byateye utwatsi umushinga w’ishyirwaho rya European League ni uko uburyo bwagenderwaho mu kwemeza amakipe azakina iri rushanwa butanoze ndetse budashingiye k’uko yaba yitwaye mu kibuga.

European Super League ni iki?

European Super League ntabwo ari umushinga mushya kuko watangiye kuvugwa mu myaka yo mu 1990, ariko ucibwa intege no kwagurwa ku irushanwa rya UEFA Champions League.

Muri Nyakanga 2009, Perezida wa Real Madrid, Florentino Pérez, yavuze ko “Byaba byiza hashyizweho Super League yajya ikinwa n’amakipe akomeye kuko muri Champions League atari ko bikimeze.”

Abandi bagiye bagaragaza ko umushinga w’iri rushanwa uhari barimo umutoza Arsenal, Arsène Wenger, wavugaga ko rishobora kuzatangira mu myaka 10 uhereye mu 2009, mu gihe Clarence Seedforf na we yarikomojeho ndetse akerekana ko arishyigikiye mu 2012.

Mu 2016, Impuzamashyirahamwe y’Umupira w’Amaguru ku mugabane w’u Burayi (UEFA) yize uburyo hashyirwaho irushanwa ryihariye ku makipe 16 akomeye, akagabanywa mu matsinda abiri. Nyuma y’imikino 56, buri kipe yagiye ihura n’indi biri mu itsinda, ayabaye hagati y’iya mbere n’iya kane, akajya muri ¼.

Iki gitekerezo byarangiye gitewe utwatsi na UEFA ubwayo, mu rwego rwo kwirinda ishyirwaho rya Super League, ahubwo yemeza ko havugururwa uburyo UEFA Champions League na Europa League bikinwamo.

Aha ni ho havuye impinduka, u Bwongereza, u Butaliyani, Espagne n’u Budage, byemererwa kujya byinjiza amakipe ane muri Champions League, ikipe yatwaye Europa League ikabona itike y’iri rushanwa rikomeye i Burayi.

Kuki FIFA n’impuzamashyirahamwe bibivuzeho muri uyu mwaka?

Nubwo UEFA yari yafashe kiriya cyemezo, mu Ugushyingo 2018, ikinyamakuru Football Leaks cyatangaje ko hari ibiganiro biba rwihishwa byo gushyiraho irushanwa ry’amakipe rya European Super League kuva mu 2021.

Mu Ukwakira 2020, ikinyamakuru Sky Sports cyatangaje ko FIFA yifuza ko hashyirwaho irushanwa rya European Premier League, rizajya rihuza amakipe 18 akomeye, rigasimbura Champions League ndetse rikajya rikinwa mu buryo nk’ubwa NBA, ku buryo nta kumanuka (relegation) kubaho.

Amakipe arimo ayo mu Bwongereza, Espagne, u Butaliyani, u Bufaransa n’u Budage, yatumiwe muri iri rushanwa ndetse bivugwa ko FC Barcelone yari yamaze kubyemera, umunsi umwe mbere y’uko uwari Perezida wayo, Josep Maria Bartomeu, yegura mu mwaka ushize.

Abakunzi b’umupira w’amaguru batandukanye bagaragaje impungenge ko mu gihe hashyirwaho European Super League, byagira ingaruka kuri za shampiyona zo mu bihugu bitadukanye.

Umudage ukinira Real Madrid, Toni Kroos, yavuze ko biramutse bikozwe, “Icyuho kiri hagati y’amakipe manini (akomeye kandi akize) n’amakipe mato, kiziyongera cyane.”

Iri rushanwa ryari kuba riteye gute?

Ikinyamakuru The Times cyatangaje ko cyabonye inyandiko y’amapaji 18 igaragaza uburyo iri rushanwa ryari kuba riteye, aho ku isonga ry’amakipe yari kurikina harimo Manchester United, Real Madrid na Milan AC.

The Times yakomeje ivuga ko amakipe 20 ari yo yari yapanzwe muri iri rushanwa, 15 muri ayo agafatwa nk’abanyamuryango shingiro, andi atanu agatumirwa.

Ryari kuba rigabanyije mu matsinda abiri y’amakipe 10. Amakipe ane ya mbere muri buri tsinda agakina ¼, ½ n’umukino wa nyuma ndetse imikino ikajya iba mu mpera z’icyumweru.

Amakipe yakwitabira iri rushanwa yakina imikino iri hagati ya 18 na 23 mu mwaka w’imikino, akanakina amarushanwa y’imbere mu bihugu abarizwamo.

Bivugwa ko amakipe atatu yo mu Bwongereza ari yo yari kujya mu banyamuryango shingiro, akaba ashobora kuva hagati Liverpool, Manchester City, Manchester United, Chelsea, Arsenal na Tottenham Hotspur, aya akiyongeraho atatu yo muri Espagne, atatu yo mu Butaliyani, ayo mu Budage n’imwe yo mu Bufaransa.

Uyu mushinga wari guterwa inkunga na banki ya JP Morgan Chase, buri kipe yashyizwe muri iri rushanwa igahabwa miliyoni 310£ (asaga miliyari 417 Frw) mu gihe kandi yagenerwa n’andi miliyoni 213£ (miliyari 287 Frw) yo kurikina.

Perezida wa FIFA, Gianni Infantino (ibumoso) na Perezida wa UEFA, Aleksander Čeferin, ni bamwe mu basinye ku itangazo ryamagana ishyirwaho rya European Super League n'andi marushanwa ameze nka ryo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .